ސަރަހައްދީ ޤައުމު ތަކަށް ހަމަލާ ދިނުމަށް، އިރާޤުގެ ބިން ބޭނުން ކޮށްފައިވާ ކަމުގެ ހެއްކެއް ނެތް: ބޮޑު ވަޒީރު އަލީ އަލް ޒައިދީ

ސަރަހައްދީ ޤައުމު ތަކަށް އަމާޒުކޮށް ދާދި ފަހުން ދިން ހަމަލާ ތަކަކީ، އިރާޤުގެ ބިން ބޭނުން ކޮށްގެން ދީފައިވާ ހަމަލާ ތަކެއް ކަމަށް ބުނާ ބުނުމަށް އެއްވެސް ހެއްކެއް ނެތް ކަމަށް، އެ ޤައުމުގެ ބޮޑު ވަޒީރު އަލީ އަލް ޒައިދީ ވިދާޅުވެއްޖެ އެވެ. 

އިރާޤުގެ ބޮޑު ވަޒީރު މިހެން ވިދާޅުވީ ސަރަހައްދީ މަސްރަހު ނުތަނަވަސްވެފައިވާ ދަނޑިވަޅެއްގައި ނޫސްވެރިންނާ ބައްދަލު ކުރައްވައި ވާހަކަ ދައްކަވަމުންނެވެ. 

ބޮޑު ވަޒީރު އަލް ޒައިދީ ވިދާޅުވީ، އިރާޤުގެ ސަރަހައްދީ ރަތް ރޮނގުގެ ބޭރުން އަންނަ އެއްވެސް ނުފޫޒެއް، ނުވަތަ އަމުރެއް ޤަބޫލު ނުކުރައްވާނެ ކަަމަށެވެ. އަދި އެއީ އިރުމަތީގެ ޤައުމަކުން ނުވަތަ، ހުޅަނގުގެ ޤައުމަކުން އަންނަ އަމުރެއް ކަމަށް ވީ ނަމަވެސް، އިރާޤުގެ މިނިވަންކަމާއި އިސްތިޤުލާލަށް ބުރޫ އަރާ ފަދަ އެއްވެސް ކަމަކަށް ފުރުސަތު ނުދެއްވާނެ ކަމަށް އޭނާ ތަކުރާރުކޮށް ވިދާޅުވި އެވެ. 

މި މޭރުމުން ވާހަކަ ދައްކަވަމުން ބޮޑު ވަޒީރު އަލް ޒައިދީ ފާހަގަ ކުރެއްވި ގޮތުގައި، އަވަށްޓެރި ޤަލްފުގެ ގައުމު ތަކަށް ދޭ ހަމަލާ ތަކުގައި އިރާޤުގެ ބައިވެރިވުމެއް އޮތް ކަމަށް ބުނެ ދެކެވޭ ވާހަކަ ތަކަކީ، އެއްވެސް އަސާސެއް ނެތް ވާހަކަ ތަކެއް ކަމަށެވެ. އަދި އެފަދަ ކަންކަމުގެ ސަބަބުން ސަރަހައްދީ ގުޅުން ތަކަށް ބުރޫ އަރާފާނެތީ އެކަމާ މެދު ސަމާލުވުމަށް ވެސް ބޮޑު ވަޒީރު ވަނީ ގޮވާލައްވައިފަ އެވެ. 

އިރާޤުގެ ސަރުކާރުން އަބަދުވެސް މަސައްކަތް ކުރަމުން ދަނީ ސަރަހައްދީ ހަމަޖެހުން ގާއިމު ކުރުމަށް ކަމަށާއި، އެއްވެސް ގައުމަކަށް ހަމަލާ ދިނުމަށް އިރާޤުގެ ބިން ބޭނުން ކުރުމުގެ ފުރުސަތު ނުދޭނެ ކަމުގެ ޔަގީންކަން ބޮޑު ވަޒީރު އަލް ޒައިދީ ވަނީ ދެއްވާފައި އެވެ. މީގެ އިތުރުން ބޭރުގެ ބާރު ތަކުން އިރާޤުގެ ދާޚިލީ ކަންކަމުގެ ތެރެއަށް ވަނުމަކީ، ބަލައި ގަނެވޭނެ ކަމެއް ނޫން ކަމަށް ވެސް އޭނާ ވިދާޅުވި އެވެ.

މި ފަހަކަށް އައިސް ގަލްފުގެ ބައެއް ޤައުމު ތަކަށް ޑްރޯން އަދި މިސައިލް ހަމަލާ ތަކެއް އަމާޒު ވެފައިވާއިރު، ބައެއް ފަރާތް ތަކުން ތުހުމަތު ކުރަމުން ދަނީ އެ ހަމަލާ ތަކަކީ އިރާޤުގައި ހަރަކާތްތެރިވާ ހަނގުރާމަވެރި ޖަމާއަތް ތަކުން ދީފައިވާ ހަމަލާ ތަކެއް ކަމަށެވެ. ނަމަވެސް ބޮޑު ވަޒީރު އަލް ޒައިދީގެ މި ބަޔާނާ އެކު، އެ ޤައުމުން ވަނީ އެ ހުރިހާ ތުހުމަތު ތަކެއް ރަސްމީކޮށް ދޮގު ކޮށްފައި އެވެ.