ޖަރުމަނުވިލާތުން ޕެރަގުއޭއާ ދެކޮޅަށް ކުޅުނު މެޗުގެ އިތުރު ވަގުތުގައި ޖެހި ލަނޑު ބަލައިނުގަތުމަށް ނިންމި ސަބަބު ފީފާއިން ހާމަކޮށްފި

ޖަރުމަނުވިލާތުން ޕެރަގުއޭއާ ދެކޮޅަށް ކުޅުނު މެޗުގެ އިތުރު ވަގުތުގައި ޖެހި ލަނޑު ބަލައިނުގަތުމަށް ނިންމި ސަބަބު ފީފާއިން ހާމަކޮށްފި އެވެ. ފީފާއިން ބުނި ގޮތުގައި، ވޯލްޑް ކަޕް ފެށުމުގެ ކުރިން ކޯޗުންނާއި ކުޅުންތެރިންނަށް ވަނީ، ރެފްރީން މިފަދަ ފައުލްތަކަށް އަދަބު ދޭނެކަން އަންގާފަ އެވެ.

މި މެޗުގައި ޖޮނަތަން ޓާ ލަނޑެއް ޖަހައި ޖަރުމަނަށް 2-1 ގެ ލީޑެއް ހޯދައިދިން ކަމަށް ހީވި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރު) ގެ އެހީތެރިކަމާއެކު ރެފްރީ ޖަލާލް ޖައިދު ވަނީ އެ ލަނޑު ބަލައިނުގަތުމަށް ނިންމާފަ އެވެ. ރެފްރީ މިގޮތަށް ނިންމީ، ޖަރުމަނުގެ ވަލްޑެމާ އެންޓަން، ޕެރަގުއޭގެ ގޯލްކީޕަރު އޯލަންޑޯ ގިލްއަށް ފައުލްކުރި ކަމަށް ނިންމުމަށްފަހު އެވެ.

ގަދަ 32 ޓީމު ވާދަކުރި މި މެޗުގެ ފުރިހަމަ ވަގުތު ހަމަވިއިރު 1-1 އިން ދެޓީމު އެއްވަރުވެފައި އޮތުމުން، ނަތީޖާ ނެރުނީ ޕެނަލްޓީ ޖަހައިގެންނެވެ. ޕެނަލްޓީ ޝޫޓްއައުޓްގައި 4-3 އިން ޕެރަގުއޭ މޮޅުވިއިރު، ޖަރުމަނުގެ ޑިފެންޑަރު ޓާ ޖެހި ޕެނަލްޓީ ދިޔައީ ގޯލްގެ ހުރަސް ދަނޑިމަތިން ބޭރަށެވެ. މިއާއެކު ޕެރަގުއޭގެ ހޯސޭ ކަނާލޭއަށް ލިބުނު ފުރުސަތުގައި އޭނާ ވަނީ ލަނޑު ޖަހައި މެޗުން ޕެރަގުއޭ މޮޅުކޮށްދީފަ އެވެ.

މި ބައްޔާއެކު، ހަތަރު ފަހަރު ވޯލްޑް ކަޕް ކާމިޔާބުކޮށްފައިވާ ޖަރުމަނުވިލާތް ފުރަތަމަ ފަހަރަށް ވޯލްޑް ކަޕްގެ ޕެނަލްޓީ ޝޫޓްއައުޓަކުން ބަލިވިއިރު، އެ ޓީމުގެ ހެޑް ކޯޗު ޖޫލިއަން ނާގަލްސްމަން ބުނީ، އޭނާގެ ނަޒަރުގައި އެއީ ފައުލެއް ނޫން ކަމަށާއި، އެ ލަނޑު ބަލައިނުގަތުމަކީ ޖޯކެއް ކަމަށެވެ.

ނަމަވެސް، ފީފާގެ ރެފްރީންގެ އިސްވެރިޔާ ކޮލީނާ ބުނީ، ބޯޅައަށް ކުޅުމުގެ ބަދަލުގައި އިދިކޮޅު ކުޅުންތެރިންގެ ހަރަކާތްތަކަށް ހުރަސްއެޅުމަށް މަސައްކަތްކުރާ ހާލަތްތަކުގައި، ހާއްސަކޮށް ގޯލްކީޕަރުންނަށް ހުރަސްއަޅާނަމަ އެކަމަށް އަދަބު ދިނުމަށް ރެފްރީންނަށް އަންގާފައިވާނެ ކަމަށެވެ. "ވަކި މަގާމެއްގައި ހުރުމުން އަމިއްލަޒާތުގައި ފައުލެއް ނޫން ކަމަށް ދުށް ނަމަވެސް، އެޓޭކްކުރާ ކުޅުންތެރިޔާ ބޯޅައަށް ސަމާލުކަން ނުދީ، ގަސްތުގައި އިދިކޮޅު ކުޅުންތެރިޔާގެ ހަރަކާތަށް ހުރަސްއަޅައި، ބޯޅަ ދިފާއުކުރުމަށް ހުރަސްއަޅާނަމަ، ރެފްރީންނާއި ވީއޭއާރުން އެކަން ބަލައި ފިޔަވަޅު އަޅަންޖެހޭނެ،" ކޮލީނާ ބުންޏެވެ.

ކޮލީނާ އިތުރަށް ބުނީ، މިއީ ހާއްސަކޮށް އިދިކޮޅު ގޯލްކީޕަރު ބޯޅަ ދިފާއުކުރުމަށް ކުރާ މަސައްކަތަށް ހުރަސްއެޅުމަށް ބޭނުންކުރާ އުކުޅެއް ކަމަށެވެ.

"ކޯޗުންނާއި ކުޅުންތެރިންނަށް މިކަން އޮތީ އަންގާފައި. އެހެންކަމުން ރެފްރީން މިފަދަ ފައުލްތަކަށް އަދަބު ދިނުމަކީ ހައިރާންވާންޖެހޭ ކަމެއް ނޫން،" އޭނާ ބުންޏެވެ.

މި މޮޅާއެކު ޕެރަގުއޭ ދެން ވާދަކުރާނީ ގަދަ 16 ގެ މެޗުގައި، ދެ ފަހަރުގެ ޗެމްޕިއަން ފްރާންސާ ދެކޮޅަށެވެ. މި މެޗު އޮންނާނީ އަންނަ ހޮނިހިރު ދުވަހު ފިލަޑެލްފިއާގަ އެވެ.

ވޯލްޑް ކަޕް ފެށުމުގެ ކުރިން  ކޮލީނާ ވަނީ މި މުބާރާތުގައި ރެފްރީންގެ ނިންމުންތައް ހުންނާނެ ގޮތާ ގުޅޭގޮތުން ޕްރެޒެންޓޭޝަނެއް ދީފަ އެވެ.

އޭރު ކޮލީނާ ވާހަކަ ދައްކާފައިވަނީ ބޯޅަ ކުޅުމުގެ ތެރެއަށް އައުމުގެ ކުރިން ކުޅުންތެރިން ބްލޮކްކުރުމާ ގުޅޭގޮތުންނެވެ. ފީފާއިން ވަނީ ވީއޭއާރުގެ އުސޫލުތަކަށް ބަދަލު ގެނެސް، ކޯނަރެއް ނެގުމުގެ ކުރިންވެސް ކުޅުންތެރިއަކު ބްލޮކްކޮށްފިނަމަ ލަނޑު ބާތިލްކުރެވޭ ގޮތަށް ހަދާފަ އެވެ.

ޖަރުމަނަށް ދިމާވި މި ހާދިސާއަކީ ސީދާ އެ އުސޫލުގެ ތެރެއަށް ފެތޭ ކަމެއް ނޫނެވެ. ސަބަބަކީ އެންޓަން އާއި ގޯލްކީޕަރު ގިލްއާ ދެމެދު ކުރިމަތިލުމެއް ހިނގީ ޖަރުމަނުން ކޯނަރު ނެގި ފަހުން ކަމަށްވާތީ އެވެ. 

މިއީ ވަރަށް އާދައިގެ ކަމެއްގެ ގޮތުގައި ފެންނަން އޮތްއިރު، ވީއޭއާރުން ރެފްރީއަށް އެ މަންޒަރު ބެލުމަށް އިރުޝާދު ދިނުމަކީ ގިނަ ބަޔަކަށް ހައިރާންކަން ލިބުނު ކަމެކެވެ.

ބޮޑަށް ބެލެވެނީ ޖަރުމަނުގެ ކުޅުންތެރިޔާ އޭނާ ހުރި މަގާމަށް ބަދަލެއް ނުގެނެސް ހުއްޓާ، ގޯލްކީޕަރު އޭނާގެ ގައިގައި ޖެހުނީ ކަމަށެވެ. އެ ދެމެދުގައި ހިނގި ކުރިމަތިލުމަކީ އޭގެ ނަތީޖާ އެވެ.

ގޯލްކީޕަރު ގިލްއަށް އެ ބޯޅަ ސަލާމަތްކުރުމަށް ހަގީގަތުގައިވެސް ހުރަސް އެޅުނު ހެއްޔެވެ؟ އަދި މިއީ ރެފްރީއަށް ހެދުނު ކަނޑައެޅިގެން އެނގެން އޮތް ބޮޑު ގޯހެއް ހެއްޔެވެ؟

އަންނަ ސީޒަނުގެ ޕްރިމިއާ ލީގުގައިވެސް ކުޅުންތެރިން ބްލޮކްކުރުމާއި ހިފެހެއްޓުމަށް ބޮޑު ސަމާލުކަމެއް ދޭނެ ނަމަވެސް، މިފަދަ ކަމެއްގައި ވީއޭއާރުން މެދުވެރިވާނެ ކަމަށް ބެލުމަކީ ދަތި ކަމެކެވެ.