ފަހަތުން އަރައި ޖަޕާން ބަލިކޮށް، ބްރެޒިލް ގަދަ 16 އަށް
މިހާތަނަށް ފަސް ފަހަރު ވޯލްޑް ކަޕް ކާމިޔާބު ކޮށްފައިވާ ބްރެޒިލް އަކީ، މުބާރާތުގެ އެންމެ ކާމިޔާބު ޓީމު. މުބާރާތުގެ ގަދަ 16 ގައި ބްރެޒިލް ނިކުންނާނީ އައިވަރީ ކޯސްޓް އަދި ނޯވޭ ކުޅޭ މެޗުން މޮޅުވާ ޓީމަކާ ދެކޮޅަށް.
މެޗުގައި ލަނޑު ޖެހުމަށް ފަހު ބްރެޒިލްގެ ކުޅުންތެރިން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕްގައި ޖަޕާން ބަލިކޮށް، ބްރެޒިލް އިން މުބާރާތުގެ ގަދަ 16 އިން ޖާގަ ހޯދައިފި އެވެ.
ހޯމަ ދުވަހުގެ ރޭ ކުޅުނު މެޗު ބްރެޒިލް އިން ކާާމިޔާބު ކުރީ 2-1 އިންނެވެ. މެޗުގައި ޖަޕާން އިން ލަނޑު ޖަހައި ލީޑު ނަގާފައި ވަނިކޮށް، ބްރެޒިލް އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފައި އެވެ.
މެޗު ފަށައިގެން 29 ވަނަ މިނެޓުގައި ޖަޕާން އިން ވަނީ ބްރެޒިލް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ޖަޕާން އަށް ޖަހައިދިނީ ކައީޝޫ އަސާނޯ އެވެ. ނަމަވެސް، މެޗުގެ ދެ ވަނަ ހާފު ފަށައިގެން 11 ވަނަ މިނެޓުގައި ބްރެޒިލް އިން ނަތީޖާ ހަމަހަމަ ކުރި އެވެ. އެއީ ކަސެމީރޯ ޖެހި ލަނޑުންނެވެ. އެ ލަނޑު ޖަހަން ކަސެމީރޯ އަށް ފުރުސަތު ތަނަވަސްކޮށްދިނީ ގަބްރިއެލް މަގާލައެސް އެވެ.
މެޗުގެ ނަތީޖާ ހަމަހަމަ ކުރި ފަހުން ބްރެޒިލް އިން ވަނީ ލީޑު ނަގަން ވަރަށް މަސައްކަތް ކޮށްފައި އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ބްރެޒިލް މޮޅު ކޮށްދިނީ ގެބްރިއެލް މާޓިނެލީ އެވެ. އެ ލަނޑު ޖަހަން މާޓިނެލީ އަށް ފުރުސަތު ތަނަވަސްކޮށްދިނީ ބްރޫނޯ ގިމާރޭސް އެވެ.
ބްރެޒިލް އިން މުބާރާތުގެ ގަދަ 16 އިން ޖާގަ ހޯދިއިރު، އެ ޓީމަކީ މުބާރާތުގެ ފޭވަރިޓުންގެ ތެރޭގައި ހިމެނޭ ޓީމެކެވެ. މިހާތަނަށް ފަސް ފަހަރު ވޯލްޑް ކަޕް ކާމިޔާބު ކޮށްފައިވާ ބްރެޒިލް އަކީ، މުބާރާތުގެ އެންމެ ކާމިޔާބު ޓީމެވެ. މުބާރާތުގެ ގަދަ 16 ގައި ބްރެޒިލް ނިކުންނާނީ އައިވަރީ ކޯސްޓް އަދި ނޯވޭ ކުޅޭ މެޗުން މޮޅުވާ ޓީމަކާ ދެކޮޅަށެވެ.
