ބައިޑަންގެ ހޫނު ބަހުގެ ހަމަލާ ތަކެއް ޓްރަމްޕް އަށް!

އެމެރިކާގެ ކުރީގެ ރައީސް ޖޯ ބައިޑަން، އެ ޤައުމުގެ މިހާރުގެ ރައީސް ޑޮނަލްޑް ޓްރަމްޕް އަށް ވަރަށް ބޮޑަށް ފާޑު ވިދާޅުވެ، ހޫނު ބަހުގެ ހަމަލާ ތަކެއް އަމާޒު ކުރައްވައިފި އެވެ.

މޭރީލޭންޑުގައި ހޮނިހިރު ދުވަހުގެ ރޭ ކުރިއަށް ގެންދިޔަ ޑިމޮކްރެޓިކް ޕާޓީގެ އިވެންޓެއްގައި ބައިވެރިވެ ވަޑައިގެން ވާހަކަ ދައްކަވަމުން ބައިޑަން ވަނީ، ޓްރަމްޕް އަކީ ވަރަށް ނާކާމިޔާބު ބޭފުޅެއް ކަމަށް ވިދާޅުވެފައި އެވެ. އަދި ޓްރަމްޕްގެ ސަރުކާރުގައި ހިންގަމުން އަންނަ ކޮރަޕްޝަން އާއި، ނޭއްގާނީ ކަންކަމުގެ ވާހަކަ ބައިޑަން ވަނީ ދައްކަވައިފަ އެވެ. 

ބައިޑަން ވަނީ ޓްރަމްޕްގެ ވެރި ކަމުގެ ދެ ވަނަ ދައުރުގައި ކުރައްވަމުން އަންނަ ގިނަ ކަންކަމުގެ ވާހަކަ ދައްކަވައި، އެކަންކަމަށް ފާޑު ވިދާޅުވެފައި އެވެ. އެގޮތުން ރިޔާސީ ގަނޑުވަރު، ވައިޓް ހައުސްގެ އީސްޓް ވިންގް ތަޅާލައި ބޯލް ރޫމެއް ހެއްދެވުމާއި، ކެނެޑީ ސެންޓަރުގައި ޓްރަމްޕްގެ އަމިއްލަ ނަން ޖެއްސެވުމާއި، އަމިއްލަ ޝަރަފުގައި ބިނާތައް ކުރެއްވުމަށް ކުރެއްވި މަސައްކަތް ތަަކަށް ބައިޑަން މަލާމަތް ކުރެއްވި އެވެ. 

އެއާ އެކު ބައިޑަން ވިދާޅުވެފައި ވަނީ، ޓްރަމްޕްގެ ސަރުކާރުގައި ހިންގަމުން އަންނަ ކޮރަޕްޝަން އަކީ، މީގެ ކުރިން އެމެރިކާގެ އެއްވެސް ސަރުކާރެއްގައި ފެނިފައި ނުވާ ފަދަ ބޮޑު ކޮރަޕްޝަނެއް ކަަމަށް ބައިޑަން ތުހުމަތު ކުރެއްވި އެވެ. 

މިއީ 2024 ވަނަ އަހަރުގެ ރިޔާސީ އިންތިޚާބުގެ ބަހުސްގައި ބައިޑަން އާއި ޓްރަމްޕްގެ ކުރިމަތިލުމަށް ފަހު، ބައިޑަން ޓްރަމްޕްއާ ގުޅޭ ގޮތުން މިހާ ބޮޑަށް ފާޑު ވިދާޅުވި ފުރަތަމަ ފަހަރެވެ. ޖަނަވަރީ މަހުގެ ހަ ވަނަ ދުވަހު ހިނގި ހަމަނުޖެހުން ތަކުގައި ބައިވެރިވި މީހުންނަށް މާލީ ގޮތުން އެހީތެރިކަން ދިނުމަށް ޓްރަމްޕް ބޭނުންވާތީ، ބައިޑަން ވަނީ އެކަމަށް ވެސް ފާޑު ވިދާޅުވެފައި އެވެ. ބައިޑަން ވިދާޅުވީ، އެ ދުވަހުގެ ހަމަނުޖެހުން ތަކުގައި ބައިވެރިވި މީހުންނަށް ބަދަލު ދޭން ނުޖެހޭ ކަމަށާއި، އެމީހުންނަށް ހައްގުވަނީ ދިގު މުއްދަތުގެ ޖަލު ޙުކުމެއް ކަމަށެވެ. 

2025 ވަނަ އަހަރުގެ ޖަނަވަރީ މަހުގެ ތެރޭގައި ބައިޑަންގެ ރިޔާސީ ދައުރު ނިމުނު ފަހުން ވެސް، އެކި ފަހަރު މަތިން ބައިޑަން ވަނީ ޓްރަމްޕް އަށް ފާޑު ވިދާޅުވެފައި އެވެ. ވެރިކަމަށް ފަހު ބައިޑަން ސިޔާސީ ކަންކަމުގައި އުޅުއްވަނީ ވަރަށް މަދުންނެވެ. ބައިޑަންގެ ޞިއްޙީ ޙާލަތު ހުރި ގޮތުން ގިނައިން އޭނާ އުޅުއްވަނީ އަމިއްލަ ކަންކަމުގައި އެވެ. 

އުމުރުން މިހާރު 83 އަހަރުވެފައިވާ ބައިޑަން ގެންދަވަނީ ކަށީގެ ކެންސަރަށް ފަރުވާާ ހޯއްދަވަމުންނެވެ. ބައިޑަން ކެންސަރަށް ފަރުވާ ހޯއްދަވަމުން ގެންދަވާތާ ގިނަ ދުވަސް ތަކެއް ވެފައިވާއިރު، ބައިޑަންގެ އަނބިކަނބަލުން ޖިލް ބައިޑަން ވިދާޅުވެފައި ވަނީ ބައިޑަންގެ މުޅި އުމުރުގައި އުޅުއްވަން ޖެހޭނީ އެ ބައްޔާ އެކު ކަމަށެވެ. މި ހުރިހާ ގޮންޖެހުންތަކާ އެކު ވެސް، ބައިޑަން ގެންދަވަނީ އޭނާގެ ރިޔާސީ ލައިބްރަރީ ޤާއިމު ކުރުމާއި، އަމިއްލަ ޙަޔާތުގެ މައްޗަށް ލިޔުއްވާ ފޮތުގެ މަސައްކަތް ކުރައްވަމުންނެވެ.