ޗައިނާގެ ބިލިއަނަރު ގުއޯ ވެންގުއީ އަށް 30 އަހަރުގެ ޖަލުހުކުމް އިއްވައިފި

ޗައިނާގެ ކޮމިއުނިސްޓް ޕާޓީއާ ދެކޮޅަށް އަޑުއުފުލަމުންދިޔަ އަދި އަމިއްލައަށް އަރުވާލެވިގެން އެމެރިކާގައި އުޅެމުންދިޔަ ޗައިނާގެ ބިލިއަނަރު ގުއޯ ވެންގުއީ، މާލީ ޚިޔާނާތުގެ މައްސަލައިގައި 30 އަހަރަށް ޖަލަށްލުމަށް އެމެރިކާގެ ކޯޓަކުން ހުކުމްކޮށްފި އެވެ.

ފެޑަރަލް ފަނޑިޔާރަކު ވިދާޅުވި ގޮތުގައި ގުއޯ ހިންގި މި ޚިޔާނާތުގެ ސަބަބުން ދުނިޔޭގެ އެކި ކަންކޮޅުތަކުން 1،000 އަށްވުރެ ގިނަ މީހުންގެ އެތައް މިލިއަން ޑޮލަރެއް ވަނީ ގެއްލިފަ އެވެ.

މީގެ ދިހަ އަހަރު ކުރިން ޗައިނާއިން ފިލައިގެން އެމެރިކާއަށް ގޮސް، ޗައިނާގެ ކޮމިއުނިސްޓް ޕާޓީ (ސީސީޕީ) އަށް ވަރަށް ބޮޑަށް ފާޑުކިޔާ މީހެއްގެ ގޮތުގައި މަޝްހޫރުވި ގުއޯ ވެންގުއީގެ މައްޗަށް މި ހުކުމް އިއްވީ ހޯމަ ދުވަހު މެންހަޓަންގެ ކޯޓެއްގައި ފަނޑިޔާރު އަނަލީސާ ޓޮރޭޒް އެވެ. އެއްޒަމާނެއްގައި ޗައިނާގެ އެންމެ މުއްސަނދި މީހުންގެ ތެރޭގައި ހިމެނުނު ގުއޯގެ މައްޗަށް، ގެއްލުންވި މީހުންނަށް ބަދަލުގެ ގޮތުގައި 889 މިލިއަން ޑޮލަރު ދެއްކުމަށްވެސް ކޯޓުން ވަނީ އަމުރުކޮށްފަ އެވެ.

މީގެއިތުރުން، 2024 ވަނަ އަހަރު ޖޫރީން ވަނީ އިއްތިފާގުން ގުއޯގެ މައްޗަށް މާލީ އޮޅުވާލުމާއި، ސެކިއުރިޓީޒްއާ ގުޅުންހުރި ކުށްތަކާއި، ވަޔަރ ފްރޯޑް އަދި މަނީ ލޯންޑަރިންގެ ކުށް ސާބިތުވާކަމަށް ނިންމާފަ އެވެ.

އެފްބީއައި އިން ގުއޯ ހައްޔަރުކުރީ މިދިޔަ އަހަރު، މެންހަޓަންގެ ސެންޓްރަލް ޕާކް ފެންނަ ގޮތަށް ހުންނަ އޭނާގެ އަގުބޮޑު އެޕާޓްމަންޓުންނެވެ.

ހޯމަ ދުވަހުގެ ހުކުމް އިއްވުމުގެ މަޖިލީހުގައި ފަނޑިޔާރު ޓޮރޭޒް ވިދާޅުވީ، މައިލްސް ގުއޯ އަދި ހޯ ވަން ކުއޮކްގެ ނަމުންވެސް މަޝްހޫރުވެފައިވާ ގުއޯ، އަމިއްލަ މުއްސަނދި ދިރިއުޅުމެއް އުޅުމަށްޓަކައި ފައިސާ ހޯދާފައިވަނީ ޗައިނާއަށް ޑިމޮކްރަސީ ގެންނަން ބޭނުންވި މީހުންނަށް އޮޅުވާލައިގެން ކަމަށެވެ.

ކޯޓުގައި ވާހަކަދައްކަމުން ގުއޯ ވަނީ އޭނާގެ ސިއްހީ ހާލަތާ މެދު ޝަކުވާކޮށްފަ އެވެ. އަދި އޭނާގެ މައްޗަށް އުފުލާފައިވާ ޖިނާއީ ދައުވާތަކާ ގުޅޭގޮތުން ކުރުކޮށް ވާހަކަދައްކަމުން، އޭނާ އެމެރިކާއަށް އައީ ޗައިނާގެ ކޮމިއުނިސްޓް ޕާޓީ "ނައްތާލުމަށް" ކަމަށް ބުނެ އޭނާގެ އަމަލުތައް ވަނީ ދިފާއުކޮށްފަ އެވެ.

ފަނޑިޔާރު ޓޮރޭޒް ވަނީ އޭނާއަށް ލިބިފައިވާ އަނިޔާލިބުނު މީހުންގެ ސިޓީތަކުގެ ބައެއް ބައިތައް ކިޔައިދީފައެވެ. އެ ސިޓީތަކުގައި މީހުން ބުނެފައިވަނީ، އުމުރުދުވަހު އެއްކުރި ފައިސާ ގެއްލުމުގެ ސަބަބުން ނަފްސާނީ ބޮޑު ބިރުވެރިކަމަކާއި ލަދުވެތިކަމެއް ތަހައްމަލު ކުރަންޖެހުނު ކަމަށާއި، ނުބައި އިންވެސްޓްމަންޓެއް ކުރެވުމުގެ ސަބަބުން އާއިލާގެ މެންބަރުންވެސް އެމީހުންނާ ދެކޮޅުވެފައިވާ ކަމަށެވެ.

ފަނޑިޔާރު ވިދާޅުވި ގޮތުގައި، ގުއޯ އޭނާގެ އަމަލުތަކުގެ ޒިންމާ ނެގުމުގެ ބަދަލުގައި، އޭނާގެ ސަބަބުން އެއްވެސް މީހަކަށް ގެއްލުމެއް ނުވާކަމަށް ބުނެ ދޮގު ހަދަމުންދާ ކަމަށެވެ.

ޝަރީއަތުގައި ހެކިބަސް ދިން ވޭ ޗެން ނަމަކަށް ކިޔާ މީހަކު ފަނޑިޔާރު ޓޮރޭޒް ގާތު ބުނީ، ގުއޯ ހިންގި މި އޮޅުވާލުމުގެ ސަބަބުން އޭނާގެ ދިރިއުޅުމާއި އޭނާގެ އާއިލާ މުޅިން ހަލާކުވެފައިވާ ކަމަށެވެ.

ޕްރޮސެކިއުޓަރުން ވަނީ ގުއޯގެ މައްޗަށް މަދުވެގެން 30 އަހަރުގެ ޖަލު ހުކުމެއް އިއްވުމަށް އެދިފައެވެ. އެ ފަރާތްތަކުން ބުނި ގޮތުގައި 2018 އިން 2023 އަށް އޭނާ ހިންގި "ބޮޑު" އޮޅުވާލުމުގެ ސަބަބުން އެތައް ސަތޭކަ ބައެއްގެ ދިރިއުޅުން ހަލާކުވެ، މާލީ ގޮތުންނާއި، ނަފްސާނީ ގޮތުން އެތައް އާއިލާއެއް ވަނީ ބިކަވެފަ އެވެ.

ކޯޓަށް ހުށަހެޅި ލިޔެކިޔުންތަކުގައި ގުއޯގެ ވަކީލުން ބުނެފައިވަނީ، އޭނާއަކީ ޗައިނާގެ ކޮމިއުނިސްޓް ޕާޓީން އޭނާގެ ފުރާނައަށް ނުރައްކާވާ ފަދަ ބޮޑު ރޭވުމެއްގެ ޝިކާރައަކަށް ވެފައިވާ މީހެއް ކަމަށެވެ.

ވަކީލުން ކޯޓުގައި ބުނި ގޮތުގައި، ގުއޯގެ މައްޗަށް ދިގު މުއްދަތުގެ ޖަލު ހުކުމެއް އިއްވުމަކީ ޗައިނާއިން އޭނާގެ އަބުރު ކަތިލުމަށް ހިންގާ ކެމްޕޭނަށް ލިބޭ ބާރަކަށް ވާނެ ކަމަށާއި، މީގެ ސަބަބުން ޗައިނާގެ ސަރުކާރާ ދެކޮޅަށް އަޑުއުފުލާ މީހުން ނައްތާލުމަށް ކުރާ މަސައްކަތަށް އިތުރު ހިތްވަރެއް ލިބޭނެ ކަމަށެވެ.

ރިއަލް އެސްޓޭޓްގެ ވިޔަފާރިން ބޮޑު މުއްސަނދިކަމެއް ހޯދި ގުއޯ، ޗައިނާއިން ފިލައިގެން އެމެރިކާއަށް ބަދަލުވީ 2015 ވަނަ އަހަރު އެވެ.

ނިއު ޔޯކްގައި ދިރިއުޅެމުންދިޔަ ގުއޯ އަމިއްލައަށް ސިފަކުރަމުން ދިޔައީ ޗައިނާ ސަރުކާރަށް ވަރަށް ބޮޑަށް ފާޑުކިޔާ، ޑިމޮކްރަސީގެ ދިފާއުގައި މަސައްކަތްކުރާ މީހެއްގެ ގޮތުގަ އެވެ.