ނިއުޔޯކް މޭޔަރު މަމްދާނީ ކޯޓު ފަޓުލޫނުގައި ކުޑަ ކުދިންނާ އެކު ސްވިމިން ޕޫލުގައި ފަތާ ވީޑިއޯ އަށް ގިނަ ބައެއްގެ ސަމާލުކަން!

ނިއު ޔޯކް ސިޓީގެ މޭޔަރު ޒޯރަން މަމްދާނީ ރަސްމީ ކޯޓު ފަޓުލޫނުގައި ހުންނަވައި، އާންމު ސްވިމިން ޕޫލް އަކަށް އެރިވަޑައިގެން ހޫނު މޫސުމުގެ ޕޫލް ސީޒަން ރަސްމީކޮށް ހުޅުވައި ދެއްވައިފި އެވެ. 

އީސްޓް ހާލެމްގައި ހުންނަ ތޮމަސް ޖެފަސަން ޕޫލް އަށް ކުޑަ ކުދިންތަކަކާ އެކު މަމްދާނީ އެރިވަޑައިގެންނެވީ، ކޯޓާއި ޓައި ހިމެނޭ ރަސްމީ ހެދުން ކޮޅުގައި އެވެ. ކުޑަ ކުދިންނާ އެކު މަމްދާނީ ފެތުމުގައި ބައިވެރިވެ ވަޑައިގެންފައިވާއިރު، މި ޕޫލްތައް ސެޕްޓެމްބަރު މަހުގެ 13 ވަނަ ދުވަހާ ހަމައަށް ހުޅުވާފައި ހުންނާނެ އެވެ. 

ކޯޓު ފަޓުލޫނުގައި މަމްދާނީ ފަތާ މަންޒަރު ފެންނައިރު، އެ ވީޑިއޯ ތަަކަށް ގިނަ ބައެއްގެ ސަމާލުކަން ވަނީ ލިބިފައި އެވެ. ނަމަވެސް، އެއީ އާންމުކޮށް ހެދިފައިވާ އުސޫލާ ޚިލާފު ކަމެކެވެ. އެގޮތުން ޤަވާއިދުގައި ބުނެފައި ވަނީ އާންމު ޕޫލް ތަކަށް އެރެންވާނީ ބާތު ސޫޓް ލައިގެން ކަމަށެވެ. 

މިއަހަރުގެ މާޗު މަހުގެ ތެރޭގައި މަމްދާނީ ވަނީ ޕޫލް ހުޅުވުމުގެ ގޮތުން، ފެންގަނޑަށް ފުންމާލާނެ ކަމަށް އިއުލާން ކުރައްވައިފަ އެވެ. މިފަދަ އިޝާރާތެއް މަމްދާނީ ކުރައްވާފައި ވަނީ ކުރީގެ މޭޔަރު މައިކަލް ބްލޫމްބާގްއާ އެއްގޮތަށް، ޕޫލް ހުޅުވާ ދުވަހު ފެން ގަނޑަށް ފުންމާލަން ގަސްދު ކުރައްވަންތޯ ސުވާލު ކުރުމުންނެވެ. ކުރީގެ މޭޔަރު ބްލޫމްބާގް އަކީ ޕޫލް ހުޅުވި ދުވަހު އެންމެ ފަހުން ފެން ގަނޑަށް ފުންމާލެއްވި މޭޔަރެވެ. ކުރީގެ މޭޔަރު ބިލް ޑި ބްލާސިއޯ އަދި އެރިކް އެޑަމްސް މި ސަގާފަތް ކުރިއަށް ގެންދަވާފައި ނުވެ އެވެ. 

ޕޫލް ހުޅުވުމުގެ ގޮތުން މަމްދާނީ ފެން ގަނޑަށް ފުންމާލުމާ އެކު، އެތަނުގައި ތިބި ކުޑަ ކުދިންނަށް އެކަން ވެގެން ދިޔައީ ވަރަށް މަޖާ ކަމަކަށެވެ. އަދި ޕޫލްގައި އެ ވަގުތު ތިބި ކުދިން މަމްދާނީއާ އެކު ސަކަރާތް ޖަހައި، މަޖާ ކުރަމުންދާ މަންޒަރު ވެސް ފެނެ އެވެ. އެގޮތުން ބައެއް ކުދިން ބުނެފައި ވަނީ މަމްދާނީ އެކަން ކުރުމަކީ ވަރަށް މަޖާ ކަމެއް ކަމަށާއި، އެކަން އެހެން ކުރާނެ ކަމަށް ކުރިން ޤަބޫލު ނުކުރެވުނު ކަމަށެވެ. 

ބައެއް ކުދިން ވަނީ މަމްދާނީ އެ ކުދިންގެ އަތުގައި ހިފައިގެން ސަކަރާތް ޖެހުމުގައި ބައިވެރިވެފައިވާތީ، އެކަން ވެސް ފާހަގަ ކޮށްފައި އެވެ.