އެމެރިކާއާއި އީރާނުން ހަމަލާތައް ހުއްޓާލުމަށް އެއްބަސްވެ، މި ހަފްތާގައި ދޯހާ ގައި މަޝްވަރާތައް ބާއްވަން ނިންމައިފި

އެމެރިކާއާއި އީރާނާ ދެމެދު އެއްގައުމުން އަނެއް ގައުމަށް ދެމުންދާ ހަމަލާތައް ހުއްޓާލުމަށް އެއްބަސްވެފައިވާ ކަމަށް އެމެރިކާ ސަރުކާރުގެ އިސް އޮފިޝަލަކާ ހަވާލާދީ "އެކްސިއޯސް" ނޫހުން އާދިއްތަ ދުވަހު ރިޕޯޓުކޮށްފި އެވެ.

ތެލުގެ ވިޔަފާރީގައި މުހިންމު ސަރަހައްދެއް ކަމަށްވާ ހުރްމުޒް ކަނޑުއޮޅިއާ ގުޅޭގޮތުން ދެގައުމުގެ ދެމެދުގައި އުފެދިފައިވާ މައްސަލަތަކަށް ހައްލެއް ހޯދުމަށްޓަކައި، ގަތަރުގެ ވެރިރަށް ދޯހާގައި އަންގާރަ ދުވަހު ބައްދަލުވުމެއް ބޭއްވުމަށް ދެ ފަރާތުން އުންމީދުކުރާ ކަމަށްވެސް އެކްސިއޯސްއިން ބުނެފައިވެ އެވެ.

އެމެރިކާގެ އޮފިޝަލަކު "އަލް އަރަބިއްޔާ" އަށް މައުލޫމާތު ދެއްވަމުން ވިދާޅުވީ، އެމެރިކާއާއި އީރާނާ ދެމެދު ކުރިއަށްދާ ފަންނީ ވާހަކަތައް ތާވަލާ އެއްގޮތަށް ކުރިއަށްދާ ކަމަށެވެ. އަދި މި މަޝްވަރާތައް ކެންސަލްކޮށްފައި ނުވާ ކަމަށާއި، ކުރިއަށް އޮތް ދުވަސްތަކުގައި އެ ބައްދަލުވުންތައް ބާއްވާނެ ކަމަށްވެސް އޭނާ ވިދާޅުވި އެވެ.

މިއާ ހިލާފަށް، އީރާނުގެ ރޫހާނީ ލީޑަރުގެ އޮފީހުގެ އޮފިޝަލެއް ކަމަށްވާ މަހްދީ ފަޒާއީލީ އެގައުމުގެ ދައުލަތުގެ ޓީވީއަށް މައުލޫމާތު ދެއްވަމުން ވިދާޅުވީ، އާދިއްތަ ދުވަހަށް ތާވަލުކުރި ފަންނީ މަޝްވަރާތަކުގައި އީރާނުން ބައިވެރިވެފައި ނުވާ ކަމަށެވެ. އޭނާ ވިދާޅުވި ގޮތުގައި މި ނިންމުން ނިންމީ ދާދިފަހުން އީރާނަށް ދިން ހަމަލާތަކާ ގުޅިގެންނާއި، އެމެރިކާއާއެކު ވެފައިވާ ފަހުމުނާމާގެ (އެމް.އޯ.ޔޫ) ޝަރުތުތައް ފުރިހަމަވެފައި ނުވާތީ އެވެ.

މިކަމާ ގުޅޭގޮތުން އިތުރަށް ވާހަކަދައްކަވަމުން ފަޒާއީލީ ވިދާޅުވީ، މަޝްވަރާތަކުގައި ބައިވެރިނުވި އެއް ސަބަބަކީ އީރާނުގެ ހިފަހައްޓާފައިވާ ފައިސާ ދޫކޮށްލުމުން އެ ފައިސާއަށް އެގައުމަށް އެކްސެސް ލިބޭތޯ ބެލުން ކަމަށެވެ. އަދި އެ ފައިސާ ބޭނުންކުރުމުގެ ފުރުސަތު ނެތް ނަމަ، އެއީ އެއްބަސްވުމުގެ ޝަރުތުތައް ފުރިހަމަނުވުން ކަމަށްވެސް އޭނާ ފާހަގަކުރެއްވި އެވެ.