އީރާނުގެ މިނާބްގެ އަންހެން ކުދިންގެ ސްކޫލަކަށް އެމެރިކާއިން ދިން ނުރައްކާތެރި ހަމަލާ އަމާޒުވި ސަބަބު ތަހުގީގުން ހާމަވެއްޖެ - ބްލޫމްބާގް

އީރާނުގެ އައްސޭރިފަށުގެ ރަށެއް ކަމަށްވާ މިނާބުގައި ހުންނަ އަންހެން ކުދިންގެ ސްކޫލަކަށް އެމެރިކާއިން ދިން ނުރައްކާތެރި ހަމަލާ އަމާޒުވީ، ހަމަލާދޭނެ ތަންތަން ކަނޑައެޅުމަށް ޕެންޓަގަންއިން ބޭނުންކުރާ ނިޒާމުގައި ހުރި މައްސަލަތަކެއްގެ ސަބަބުން ކަމަށް ބްލޫމްބާގް ނިއުސްއިން ރިޕޯޓްކޮށްފި އެވެ. ބްލޫމްބާގުން މިކަން ހާމަކޮށްފައިވަނީ އެ ހާދިސާގެ ތަހުގީގާ ބެހޭ މައުލޫމާތު އެނގޭ ފަރާތްތަކާ ހަވާލާދީ އެވެ.

އީރާނާ ދެކޮޅަށް އެމެރިކާ އާއި އިސްރާއީލުން ފެށި އަސްކަރީ ކެމްޕޭންގެ ފުރަތަމަ ދުވަސް ކަމަށްވާ ފެބްރުއަރީ 28 ވަނަ ދުވަހު ދިން މި ހަމަލާގައި، އުމުރުން 6 އަހަރާއި 13 އަހަރާ ދެމެދުގެ 120 އަށްވުރެ ގިނަ ދަރިވަރުންނާއި 26 މުދައްރިސުން ވަނީ މަރުވެފަ އެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ވެރިޔާ ބްރެޑް ކޫޕާގެ އަމުރަށް މި ހާދިސާ ތަހުގީގުކޮށް ނިންމާފައިވަނީ މިދިޔަ އޭޕްރީލް މަހުގެ ތެރޭގަ އެވެ. ނަމަވެސް، އެ ތަހުގީގުގެ ނަތީޖާ މިހާތަނަށް އާންމުކޮށްފައި ނުވާ ކަމަށް ބްލޫމްބާގުން ހުކުރު ދުވަހު ޝާއިއުކުރި ރިޕޯޓުގައި ބުނެފައިވެ އެވެ.

ބްލޫމްބާގްގެ މަސްދަރުތަކުން ބުނާ ގޮތުގައި، 2019 ވަނަ އަހަރު އެމެރިކާގެ އިންޓެލިޖެންސް އެނަލިސްޓަކު އީރާނުގެ ހަމަލާ ދޭނެ ތަންތަނާ ބެހޭ މައުލޫމާތު ދިރާސާކުރިއިރު، މިނާބުގައި ހުރި އެ ސައިޓަކީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބޭނުންކުރާ ކަނޑުގެ ސިފައިންގެ މަރުކަޒެއްގެ ގޮތުގައި ކުރިން ކަނޑައަޅާފައި އޮތް ނަމަވެސް، އެއީ އަސާސީ ތައުލީމުދޭ ސްކޫލެއްކަން ވަނީ ދެނެގަނެފަ އެވެ.

ނަމަވެސް، އެ އެނަލިސްޓް މި މައުލޫމާތު އަދާހަމަކުރުމަށް ބޭނުންކުރީ ޕެންޓަގަންއިން ހަމަލާތައް ރޭވުމަށް ބޭނުންކުރާ ރަސްމީ އިންޓެލިޖެންސް ޑޭޓާބޭސްއާ ގުޅިފައިނުވާ ޑިޖިޓަލް ވަސީލަތެއް ކަމަށްވާތީ، އެ މައުލޫމާތު އޭނާގެ އިސްވެރިންނަށް ފެނިފައެއް ނުވެ އެވެ. އެހެންކަމުން، އެއީ ސްކޫލެއްކަމުގެ މައުލޫމާތު އެމެރިކާގެ އަސްކަރީ ކޮމާންޑަރުންނާ ހަމައަށް ފޯރާފައެއް ނުވެ އެވެ.

މި މައްސަލައާ ގުޅޭ މައުލޫމާތު އެނގޭ ފަރާތްތަކުން ބުނި ގޮތުގައި، ހަމަލާދޭނެ ތަންތަން ދެނެގަތުމަށް ޕެންޓަގަންއިން ބޭނުންކުރާ ނިޒާމުގައި "ބޮޑެތި އަދި ދުވަސްވީ މައްސަލަތަކެއް" އެބަހުއްޓެވެ.

އެ ފަރާތްތަކުން ހާމަކުރި ގޮތުގައި، ސެޓެލައިޓް ފޮޓޯތައް ބޭނުންކޮށްގެން އެނަލިސްޓުން މައުލޫމާތު އެއްކުރުމަށް ބޭނުންކުރާ ދެ އިންޓެލިޖެންސް ޑޭޓާބޭސްއެއް، ބޮން އެޅުމުގެ އޮޕަރޭޝަންތަކުގައި ބޭނުންކުރާ ރަސްމީ ޑޭޓާބޭސްއާ ގުޅިފައެއް ނުވެ އެވެ.

މި ހާދިސާއާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވީ، މިނާބަށް ދިން ހަމަލާގެ އަސްލު ޒިންމާ އުފުލަންޖެހޭ ފަރާތެއް ދުވަހަކުވެސް ކަށަވަރު ނުވެދާނެ ކަމަށެވެ.

"އެ ވަގުތު ހުރިހާ ދިމާލަކުން މިސައިލްތައް ދަތުރުކުރަމުންދިޔަ، އަދި ހިނގައިދިޔައީ ވަރަށް ބިރުވެރި ކަމެއް. ބައެއް މީހުން ބުނަނީ އެއީ އަހަރެމެންގެ މިސައިލެކޭ، އެކަމަކު އެއީ އަހަރެމެންގެ މިސައިލެއް ކަމަށް ގަބޫލުކުރެވޭނެ އެއްވެސް ހެއްކެއް އަދި ނުފެނޭ،" ޓްރަމްޕް ވިދާޅުވި އެވެ.

މާޗް މަހުގެ ފަހުކޮޅު އދ. ގައި ބޭއްވި ބަހުސެއްގައި އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، އަންހެން ކުދިންގެ ސްކޫލަށް ދީފައިވަނީ "ރޭވުންތެރިކަމާއެކު ދިން ހަމަލާއެއް" ކަމަށެވެ. އަދި މިއީ ހަނގުރާމައިގެ ޖަރީމާ އެއްގެ އިތުރުން އިންސާނިއްޔަތާ ދެކޮޅަށް ހިންގި ޖަރީމާއެއް ކަމަށާއި، އެންމެހާ ފަރާތްތަކުން މިކަން ކުށްވެރިކޮށް، މިކަމުގެ ޒިންމާ އުފުލަންޖެހޭ ފަރާތްތައް ޖަވާބުދާރީ ކުރުވަންޖެހޭނެ ކަމަށް އޭނާ ވިދާޅުވި އެވެ.

އެންޖީއޯއެއް ކަމަށްވާ 'އެއާވޯސް' ގެ ވެރިޔާ އެމިލީ ޓްރިޕް ބްލޫމްބާގަށް މައުލޫމާތު ދެމުން ބުނީ، މި ހަނގުރާމައިގެ ތެރޭގައި އީރާނުގެ އާންމުންނަށް ގެއްލުން ލިބުނު 300 އެއްހާ ހާދިސާ އެ ޖަމިއްޔާއިން މޮނިޓަރ ކުރި ކަމަށެވެ. ނަމަވެސް، އެ ހަމަލާތަކުގެ ޒިންމާ އުފުލަންޖެހެނީ އެމެރިކާއިންތޯ ނުވަތަ އިސްރާއީލުންތޯ ކަނޑައެޅުމަކީ އުނދަގޫ ކަމެއްކަން އޭނާ ފާހަގަކުރި އެވެ.