ވޯލްޑް ކަޕްގައި ބޭނުންކުރާ ބޯޅައަށް އައިސްފައިވާ ބަދަލުތައް

ދުނިޔޭގެ އެންމެ ބޮޑު ކުޅިވަރު އީދު ކަމަށްވާ ފީފާ ވޯލްޑް ކަޕްގެ ތާރީޚަށް ބަލާއިރު، މުބާރާތުގައި ބޭނުންކުރާ ބޯޅައަށް ވަނީ ބޮޑެތި ބަދަލުތަކެއް އައިސްފައެވެ. 1930 ވަނަ އަހަރު ބޭއްވި ފުރަތަމަ ވޯލްޑް ކަޕުން ފެށިގެން މިއަދާ ހަމައަށް އައިއިރު، ބޯޅަ ފަރުމާކުރުމުގައާއި ބޭނުންކުރާ ޓެކްނޮލޮޖީއަށް ވަނީ އިންގިލާބީ ކުރިއެރުންތަކެއް ގެނެވިފަ އެވެ.

ކުރީގެ އަހަރުތަކުގައި ފުޓްބޯޅަ މުބާރާތްތަކުގައި ބޭނުންކޮށްފައި ވަނީ އަތުން ފަހާފައިވާ ލެދަރު ބޯޅަތަކެއް | ރޮއިޓާސް

އެންމެ ފުރަތަމަ ބޭއްވި ވޯލްޑް ކަޕް މުބާރާތްތަކުގައި ބޭނުންކޮށްފައިވަނީ ލެދަރު ބޭނުންކޮށްގެން އަތުން ފަހާފައިވާ ބޯޅަތަކެކެވެ. މި ބޯޅަތަކަކީ ބަރު އަދި ވާރޭވެހި ތެމުމުން އިތުރަށް ބަރުވާ ބޯޅަތަކަކަށް ވުމުން، އޭރުގެ ކުޅުންތެރިންނަށް ބޯޅަ ކުޅުމުގައި ބޮޑެތި ގޮންޖެހުންތަކަކާ ކުރިމަތިލާން ޖެހުނެވެ. އަދި ބޯޅައިގެ ބޭރުގައި ހުންނަ ފަހައިފައިވާ ރޫތަކުގެ ސަބަބުން ކުޅުންތެރިންނަށް އަނިޔާވުމުގެ ފުރުސަތު ވެސް އޮވެ އެވެ.

އިޓަލީވިލާތުގައި 1934 ވަނަ އަހަރު ބޭއްވި ވޯލްޑް ކަޕްގައި ބޭނުންކޮށްފައިވަނީ އެ ގައުމުގައި އުފެއްދި "ފެޑަރޭލް 102" މޮޑެލްގެ ބޯޅައެވެ. ފްރާންސުން 1938 ވަނަ އަހަރު ބޭއްވި ވޯލްޑް ކަޕްގައި ބޭނުންކުރި "އެލަން" ބޯޅައަކީ ޕެރިހުގައި އުފެއްދި ބޯޅައެއް | ރޮއިޓާސް

ވޯލްޑް ކަޕްގެ ބޯޅައިގެ ތާރީޚަށް އައި އެންމެ ބޮޑު ބަދަލަކީ 1970 ވަނަ އަހަރު މެކްސިކޯގައި ބޭއްވި މުބާރާތުގައި "ޓެލްސްޓާ" ބޯޅަ ތައާރަފުކުރުމެވެ. މިއީ މަޝްހޫރު ކުންފުނި އެޑިޑާސް އިން ވޯލްޑް ކަޕަށް ފަރުމާކުރި ފުރަތަމަ ބޯޅައެވެ. ކަޅާއި ހުދު ކުލައިގެ މި ބޯޅަ ފަރުމާކުރީ އޭރު އަލަށް ތައާރަފުވި ކަޅާއި ހުދު ޓީވީތަކުން ބޯޅަ ރަނގަޅަށް ފެންނާނެ ގޮތަށް ބަލައިގެންނެވެ.

ކުޅިވަރުގެ ދުނިޔޭގައި އެންމެ ބޮޑަށް ފާހަގަކޮށްލެވޭ އެއް ފަރުމާ ކަމަށްވާ "ޓެލްސްޓާ" ބޯޅަ ތައާރަފުކޮށް، އެޑިޑާސް ކުންފުނިން ރަސްމީ ސަޕްލަޔަރަކަށް ވީ 1970 ވަނަ އަހަރުގަ | ރޮއިޓާސް

އޭގެ ފަހުން އައި އަހަރުތަކުގައި ބޯޅަ ފަރުމާކުރުމުގައި ސިންތެޓިކް މެޓީރިއަލް ބޭނުންކުރަން ފެށުމާއެކު، ބޯޅައިގެ ބަރުދަން ލުއިވެ، ފެން ހަރު ނުލާ ގޮތްވި އެވެ. މީގެ ސަބަބުން ކުޅުންތެރިންނަށް ބޯޅަ ކޮންޓްރޯލް ކުރުމަށާއި ބާރު ހަމަލާތައް ފޮނުވާލުމަށް ފަސޭހަވެގެން ދިޔަ އެވެ. ޚާއްސަކޮށް 2002 ވަނަ އަހަރުގެ "ފީވަނޯވާ" އާއި 2010 ވަނަ އަހަރުގެ "ޖަބުލާނީ" ބޯޅައަކީ އޭގެ ޑިޒައިނާއި ވައިގެ ތެރޭގައި ދަތުރުކުރާ ގޮތުގެ ސަބަބުން ގިނަ ބައެއްގެ ސަމާލުކަން ލިބުނު ބޯޅަތަކެކެވެ.

ފުޓްބޯޅައިގައި ޓެކްނޮލޮޖީގެ އައު އީޖާދުތައް ތައާރަފުވުން ވަނީ އިތުރަށް ހަލުވިވެފަ | ރޮއިޓާސް

ޒަމާނީ ޓެކްނޮލޮޖީއާއެކު މިހާރު ބޭނުންކުރާ ބޯޅަތަކުގައި ސެންސަރުތައް ވެސް ވަނީ ހަރުކޮށްފަ އެވެ. މި ސެންސަރުތަކުގެ އެހީގައި ބޯޅަ ދަތުރުކުރާ ދުވެއްޔާއި، އެނބުރޭ މިންވަރުގެ އިތުރުން، އޮފްސައިޑް ބެލުމަށާއި ގޯލް ލައިން ޓެކްނޮލޮޖީއަށް ބޭނުންވާ މައުލޫމާތު ވަގުތުން ވަގުތަށް ރެފްރީންނަށް ލިބިގެންދެއެވެ. މިއީ ފުޓްބޯޅައިގެ ފޯރި އިތުރުކޮށް، އިންސާފުވެރި ނިންމުންތައް ނިންމުމަށް ލިބުނު ބޮޑު ކުރިއެރުމެކެވެ.

މިހާރު ކުރިއަށްދާ ވޯލްޑް ކަޕްގައި ބޭނުންކުރާ "ޓްރިއޮންޑާ" ބޯޅަ ފަރުމާކޮށްފައިވަނީ، މުބާރާތް ބާއްވާ ގައުމުތައް ކަމަށްވާ ކެނެޑާ، މެކްސިކޯ އަދި އެމެރިކާއަށް ނިސްބަތްވާ ގޮތަށް ރަތް، ފެހި އަދި ނޫ ކުލަ ހިމަނައިގެން | ރޮއިޓާސް