ވޯލްޑް ކަޕްގެ ނާކާމިޔާބާ އެކު، ދެކުނު ކޮރެއާގެ ކޯޗު މަގާމުން ވަކިވެއްޖެ

ދެކުނު ކޮރެއާގެ ޤައުމީ ޓީމަށް އިރުޝާދު ދެމުން އައި ހޮންގް މިޔުންގް ބޯ އެ މަގާމުން އަމިއްލަ އަށް ވަކިވެއްޖެ އެވެ.

ހޮންގް މަގާމުން ވަކިވެފައި ވަނީ، މުބާރާތުގެ ގުރޫޕު ސްޓޭޖް އިން ދެކުނު ކޮރެއާ ކެޓުމާ ގުޅިގެން އޭނާ އަށް އަމާޒު ވަމުން އައި ފާޑު ކިޔުން ތަކުގެ ތެރޭގައި އެވެ. 

މުބާރާތުގެ ގުރޫޕު ސްޓޭޖް އިން ދެކުނު ކޮރެއާ ކެޓުމާ އެކު، އެ ޤައުމުގެ ރައީސް ލީ ޖޭ މިޔުންގް ވަނީ ޓީމަށް ނާކާމިޔާބީ ކުރިމަތިވި ސަބަބު ތަހުގީގު ކުރުމަށް ގޮވާލައްވައިފަ އެވެ. އާދީއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ހޮންގް ބުނީ، މި ނާކާމިޔާބީގެ ޒިންމާ އޭނާ އުފުލާ ކަމަށާއި، ސަޕޯޓަރުންގެ ކިބައިން މައާފަށް އެދޭ ކަމަށެވެ.

ފީފާގެ ރޭންކިންގައި 32 ވަނައިގައި އޮތް ދެކުނު ކޮރެއާގެ ޓީމުގައި މަޝްހޫރު ކުޅުންތެރިޔާ ސޮން ހިއުންގް މިން ހިމެނޭއިރު، މުބާރާތުގައި އެ ޓީމަށް ލިބުނީ އެންމެ މޮޅެކެވެ. އަނެއް ދެ މެޗުން ވަނީ ބަލިވެފައި އެވެ. ގުރޫޕު އޭގެ ތިން ވަނަ ދެކުނު ކޮރެއާ އަށް ލިބުނީ، މެކްސިކޯ އާއި ދެކުނު އެފްރިކާގެ ފަހަތުންނެވެ. ތިން ވަނައިގައި ހިމެނި މުބާރާތުގެ ދެ ވަނަ ބުރަށް ދިޔުމުގެ ކުޑަ އުންމީދެއް އޮތް ނަމަވެސް، ދެކުނު ކޮރެއާ އަށް ޖެހުނީ ގުރޫޕު ސްޓޭޖުން މުބާރާާތް ނިންމާލާށެވެ. 

ހޮންގް ބުނީ ދެކުނު ކޮރެއާގެ ސަޕޯޓަރުން އުންމީދު ކުރި ނަތީޖާ އޭނާ އަށް ހޯދައި ނުދެވުނު ކަމަށެވެ. ޤައުމީ ޓީމުގެ ކޯޗުގެ މަގާމުން ވަކިވި ނަމަވެސް، ދެކުނު ކޮރެއާގެ ފުޓުބޯޅަ އިން އެއްކޮށް ދުރަށް ނުދާނެ ކަމަށް ހޮންގް ބުންޏެވެ. އަދި އަބަދު ވެސް ޤައުމީ ޓީމަށް ހިތުގެ އެންމެ ފުން މިނުން ތާއީދު ކުރާނެ ކަމަށް ވެސް ހޮންގް ވަނީ ބުނެފައި އެވެ. 

ދެކުނު ކޮރެއާގެ ކޯޗަކަށް ހޮންގް ހަމަޖެއްސިއިރު ވެސް ގިނަ ބައެއްގެ ފާޑު ކިޔުން އަމާޒުވި އެވެ. އޭނާ އަކީ 2002 ވަނަ އަހަރުގެ ވޯލްޑް ކަޕްގެ ސެމީ ފައިނަލް އަށް ދެކުނު ކޮރެއާ ގެންދިޔަ ޓީމުގެ ކެޕްޓަން އެވެ. 2014 ވަަނަ އަހަރުގެ ވޯލްޑް ކަޕްގައި އޭނާ ދެކުނު ކޮރެއާ އަށް އިރުޝާދު ދިން ނަމަވެސް، އެ ފަހަރު ވެސް ގުރޫޕް ސްޓޭޖުން ކެޓީ އެވެ. ނަމަވެސް 2024 ވަނަ އަހަރު އަލުން އޭނާ ކޯޗަކަށް ހަމަޖެއްސުމުން ވެސް، ގިނަ ބަޔަކު ނުރުހުން ފާޅު ކުރި އެވެ.