ޓްރަމްޕްގެ ވަރުގަދަ އިންޒާރެއް: އަލުން ހަނގުރާމަ ފަށަން ޖެހިއްޖެ ނަމަ، އީރާން ދެން ނޯންނާނެ: ޓްރަމްޕް

އީރާންއާ ދެކޮޅަށް ހަނގުރާމަ ފެށުމަށް އެމެެރިކާ އަށް މަޖުބޫރު ވެއްޖެ ނަމަ، އީރާން އިތުރަށް ދެން ނޯންނާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފި އެވެ. 

ޓްރަމްޕް މިހެން ވިދާޅުވެފައި ވަނީ، ހަނގުރާމަ ހުއްޓާލުމުގެ އެއްބަސްވުމާ އީރާނު ޚިލާފުވެފައިވާ ކަމަށް ތުހުމަތު ކުރެއްވުމަށް ފަހު އެވެ. 

ޓްރަމްޕް ޓްރޫތް ސޯޝަލްމީޑިއާގައި ލިޔުއްވާފައިވާ ގޮތުގައި، އީރާން އިން ސުލްހައިގެ އެއްބަސްވުމާ އަނެއްކާ ވެސް ޚިލާފު ވުމުގެ ސަބަބުން އެމެރިކާގެ ހަނގުރާމަ މަތީ އުޅަނދު ތަކުން އީރާންގެ މިސައިލް އާއި ޑްރޯން ރައްކާކުރާ ތަންތަން އަދި ކަނޑުގެ ސަރަހައްދުގައި ހުންނަ ރާޑަރު ބިނާ ތަކަށް ހަމަލާ ދީފައިވާ ކަމަށެވެ.

ޓްރަމްޕް އިތުރަށް ވިދާޅުވީ އެމެރިކާ އަށް އިތުރަށް ބުއްދިވެރިކަމާ އެކު ކަންކަން ކުރިއަށް ނުގެންދެވޭނެ ނުކުތާ އަކަށް ދާނެ ކަމަށާއި، އެހެންވެއްޖެ ނަމަ ވަރަށް ކާމިޔާބުކަމާ އެކު ފެށި މަސައްކަތް ސިފައިންގެ ބާރުން ނިންމަން މަޖުބޫރު ވެދާނެ ކަމަށެވެ. އަދި އެހެންވެއްޖެ ނަމަ އީރާން އިތުރަށް ދެން ނޯންނާނެ ކަމުގެ އިންޒާރު ވެސް ޓްރަމްޕް ދެއްވި އެވެ. 

އީރާން އާއި އެމެރިކާއާ ދެމެދު އުފެދިފައިވާ ނުތަނަވަސްކަން މިހާރު ވަނީ އިތުރަށް ބޮޑުވެފައި އެވެ. އެމެރިކާ އިން ބުނާ ގޮތުން އީރާން އިން ސުލްހައިގެ އެއްބަސްވުމުގައި ބަޔާން ކޮށްފައިވާ ކަންކަމާ ޚިލާފު ވަމުން ގެންދާތީ އެމެރިކާ އަށް ސިފައިން މެދުވެރިކޮށް ފިޔަވަޅުތައް އަޅަން ޖެހިފައިވާ ކަމަށެވެ.

މި ހަމަލާ ތަކަކީ އީރާން އާއި އެމެރިކާއާ ދެމެދު ކުރިއަށް އޮތް ދުވަސް ތަކުގައި ހަނގުރާމައެއް ފެށިދާނެ ކަމުގެ އިންޒާރެއްގެ ގޮތުގައި ބައެއް ބައިނަލްއަގުވާމީ ތަޖުރިބާކާރުން ދެކެމުންދެ އެވެ. އީރާން އިން މި ހަމަލާ ތަކަށް ރައްދު ދިނުމުގެ ފުރުސަތު ބޮޑު ކަމަށާއި، އެހެންވެއްޖެ ނަމަ މެދު އިރުމަތީގެ ސަރަހައްދުގައި ހަނގުރާމައެއް ފެށިދާނެ ކަމަށް ބައެއް ތަޖުރިބާކާރުން ބުނެ އެވެ.

އީރާންގެ ސަރުކާރުން މި ހަމަލާތަކާ ގުޅިގެން ރަސްމީކޮށް އެއްޗެއް ބުނެފައި ނުވެ އެވެ. ނަމަވެސް އީރާން އިން ކުރިން ވަނީ އެމެރިކާގެ ހަމަލާ ތަކަށް ރައްދު ދިނުމަށް ތައްޔާރަށް އޮތް ކަމަށް ބުނެފައި އެވެ.