ވީއޭއާރުން ޖަރުމަނު ވޯލްޑްކަޕުން ކަޓުވާލީ؟ އެއީ "ލަދުވެތި" ކަމެއް!

ވޯލްޑް ކަޕްގައި ޕެރަގުއޭއާ ދެކޮޅަށް ކުޅުނު މެޗުގެ އިތުރު ވަގުތުގެ 12 ވަނަ މިނެޓުގައި، ޖަރުމަނުގެ ޑިފެންޑަރު ޖޮނަތަން ޓާ ބޮލުން ޖަހައި ލަނޑެއް ކާމިޔާބުކޮށް 2-1 އިން ޓީމު ކުރިއަށް ޖައްސައިދިނުމުން، ޖަރުމަނަށް ހަމަޖެހުމުގެ ނޭވާއެއް ލެވުނު ކަމަށް ހީވި އެވެ. ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ އެ ނިންމުމުގެ ތެރެއަށް ވަދެފަ އެވެ.

ޕެރަގުއޭގެ ގޯލްކީޕަރު އޯލަންޑޯ ގިލްއަށް ހުރަސްއެޅުމެއް ނެތި، ޓާ ވަނީ ގޯލުގެ ފަހަތު ދަނޑި ކައިރިން މައްޗަށް އަރައި ވަރަށް ބާރުގަދަ ހެޑަރަކުން ގޯލުގެ ތެރެއަށް ބޯޅަ ފޮނުވާލާފަ އެވެ. އެހެންނަމަވެސް، އެ ލަނޑު ޖެހުމުގެ ސިކުންތުކޮޅެއް ކުރިން ހިނގައިދިޔަ ކަންތައްތަކާ ގުޅިގެން އެ ލަނޑު ގަބޫލުނުކުރަން ނިންމިއިރު، އިނގިރޭސިވިލާތުގެ ކުރީގެ ކެޕްޓަން އެލަން ޝިއަރާ ވަނީ އެއީ "ލަދުވެތި" ކަމެއްގެ ގޮތުގައި ސިފަކޮށްފަ އެވެ.

ކޯނަރު ނެގި ވަގުތު، ޖަރުމަނުގެ ވަލްޑެމާ އެންޓަން، ކީޕަރު ގިލްއަށް ހުރަސްއެޅި ކަމަށް ނިންމާފައިވެ އެވެ. ޓާ ބޮލުން ޖެހި ބޯޅަ ދިފާއުކުރަން މަސައްކަތް ކުރުމުގެ ކުރިން ކީޕަރު ވަނީ ދަނޑުމައްޗަށް ވެއްޓިފަ އެވެ.

ވީއޭއާރްގެ ލަފާގެ މަތިން ރެފްރީ ޖަލާލް ޖައިދު ދަނޑު އަރިމަތީގައި ހުރި މޮނިޓަރު ބެލުމަށްފަހު އެ ލަނޑު ގަބޫލުނުކުރަން ނިންމުމުން، ބީބީސީ ވަންގައި ވާހަކަދައްކަމުން ޝިއަރާ ބުނީ ޕެރަގުއޭގެ ކީޕަރު ރެފްރީއަށް "އޮޅުވާލީ" ކަމަށެވެ.

ޝިއަރާ އިތުރަށް ބުނީ، "އަހަރެން އެ ނިންމުމާ އެއްގޮތަކަށްވެސް އެއްބަހެއް ނޫން. ކީޕަރު އެ ވެއްޓުނީ ވަރަށް ކުޑަ ކުޑަ ބީހުމަކުން، އެއީ ވަރަށް ފީކަޅާ ނިންމުމެއް. އަހަރެން ދެކޭގޮތުގައި އެއީ ވަރަށް ގޯސް ނިންމުމެއް. މިއީ ކުޅުންތެރިންގެ ގައިގައި ޖެހިގެން ކުޅޭ ކުޅިވަރެއްކަން ދަންނަންޖެހޭނެ. ކީޕަރު އެވަނީ ރެފްރީއާއި ވީއޭއާރްއަށް އޮޅުވާލާފައި. އޭނާ ވެއްޓުނު ގޮތް ވަރަށް ލަދުވެތި،" ކަމަށެވެ.

މެޗުގެ ފުރިހަމަ ވަގުތު 1-1 އިން އެއްވަރުވެ، ޕެނަލްޓީ ޖަހައިގެން 4-3 އިން ޕެރަގުއޭ މޮޅުވުމާ ގުޅިގެން، ޖަރުމަނުގެ ހެޑް ކޯޗު ޖޫލިއަން ނާގަލްސްމަން ވަނީ ގަބޫލުނުކުރި ލަނޑާ މެދު ވަރަށް ބޮޑަށް ރުޅިގަދަވެފަ އެވެ.

ނާގަލްސްމަން ބުނީ، "އަހަރެންގެ ނަޒަރުގައި އެއީ ފައުލެއް ނޫން. އެ ލަނޑު ގަބޫލުނުކުރުމަކީ ހަގީގަތުގައި ޖޯކެއް،" ކަމަށެވެ.

އެ ލަނޑު ގަބޫލުނުކުރުމުން ނުރުހުން ފާޅުކުރުމުގެ ސަބަބުން ނާގަލްސްމަންއަށް ރީނދޫ ކާޑެއް ދައްކާފައިވާއިރު، އޭނާގެ މުސްތަގުބަލާ މެދު މިހާރު ވަނީ ސުވާލު އުފެދިފަ އެވެ.

އާސެނަލްގެ 60 އިންސައްތަ ލަނޑަކީ އެފަދަ ލަނޑުތައް - ކްލޮޕް

ވޯލްޑް ކަޕްގެ ދުވަސްވަރު ޖަރުމަނުގެ ޓީވީއަކަށް މަސައްކަތްކޮށްދެމުންދާ ލިވަޕޫލްގެ ކުރީގެ މެނޭޖަރު ޔާގަން ކްލޮޕް ވަނީ، ޓާގެ އެ ލަނޑަކީ ޕްރިމިއާ ލީގުގެ ޗެމްޕިއަން އާސެނަލްއިން މި ސީޒަނުގައި ޖެހި ގިނަ ލަނޑުތަކާ އެއްގޮތް ލަނޑެއް ކަމަށް ބުނެފަ އެވެ.

މެޖެންޓާ ޓީވީއަށް ދިން އިންޓަވިއުއެއްގައި ކްލޮޕް ބުނީ، "އެއީ ގަވާއިދާ ހިލާފު ލަނޑެއް ކަމަށްވާނަމަ، އާސެނަލްއަށް އިނގިރޭސި ޗެމްޕިއަންކަން ނުލިބޭނެ. އެމީހުންގެ 60 އިންސައްތަ ލަނޑަކީ އެގޮތަށް ޖަހާފައިވާ ލަނޑުތައް. ބޯޅަ ގޯލަށް ވަނުމުން އަހަރެމެން (ޖަރުމަނު) މެޗުން މޮޅުވީސް. އެހެންކަމުން މިއީ ހަގީގަތުގައިވެސް ވަރަށް ހިތްދަތި ނިންމުމެއް،" ކަމަށެވެ.

މެޗު އަލުން ފެށުމާއެކު، ޕްރިމިއާ ލީގުގެ ކުރީގެ އެސިސްޓަންޓް ރެފްރީ ޑަރެން ކޭން ވެސް ވަނީ އެ ނިންމުމާ މެދު އޭނާގެ ހިޔާލު ފާޅުކޮށްފަ އެވެ.

ބީބީސީ ވަންގައި ވާހަކަދައްކަމުން ކޭން ބުނީ، "އަހަރެންގެ ނަޒަރުގައި މިއީ ވަރަށް ބަލިކަށި ނިންމުމެއް. ނަމަވެސް މި މުބާރާތުގައި މިހާތަނަށް ފެނިފައިވާ ކަންކަމަށް ބަލާއިރު، އެ ލަނޑު ގަބޫލުނުކުރުމަކީ އަހަރެން ހައިރާންވާނެ ކަމެއް ނޫން. ވަރަށް ކުދިކުދި ކަންކަމާ ހުރެ ދެތިން ލަނޑެއް މިހާރުވެސް ވަނީ ބާތިލުކޮށްފައި. މިއީ މާ ބޮޑު ކަމެއް ނޫން. ކީޕަރަށް ކުޑަ ހުރަހެއް އެޅުނު ނަމަވެސް، އަހަރެން ދެކޭގޮތުގައި އެއީ ލަނޑު ބާތިލުކުރަން ފުދޭވަރުގެ ކަމެއް ނޫން. އަހަރެމެން ގަބޫލުކުރަނީ އެ ލަނޑު ބާތިލުކޮށްގެން ނުވާނެ ކަމަށް،" ކަމަށެވެ.

ބޮސްޓަންގައި ހުރެ ބީބީސީ ރޭޑިއޯ 5 ލައިވްއަށް މައުލޫމާތު ދެމުން، ސްކޮޓްލޭންޑްގެ ކުރީގެ ވިންގަރ ޕެޓް ނެވިން ވެސް ބުނީ އެއީ ލަނޑު ބާތިލުކުރަން ޖެހޭ ފަދަ ސާފު ފައުލެއް ނޫން ކަމަށެވެ.

އޭނާ ބުނީ، "އެތަނުގައި އޮތީ ހަލަބޮލިކަމެއް. ހުރަސްއެޅުމެއް ފެނުނު - އެކަމުގެ އަސަރު ކީޕަރަށް ކުރިތަ؟ ހީވަނީ އެހެން. އެކަމަކު މިއީ ކޮންމެ މީހަކަށް ތަފާތުކޮށް ފެނިދާނެ ނިންމުމެއް. އެއީ ސާފުކޮށް އެނގެން އޮތް ކަމެއް ނޫން،" ކަމަށެވެ.