އީރާނާއި އެމެރިކާއާ ދެމެދު ސޮއިކުރި ފަހުމުނާމާގެ ދަށުން، ގަތަރުގައި ހިފަހައްޓާފައިވާ އީރާނުގެ 6 ބިލިއަން ޑޮލަރު އަނބުރާ ލިބޭނެ: އީރާނުގެ ރައީސް

އީރާނާއި އެމެރިކާއާ ދެމެދު ސޮއިކުރި ފަހުމުނާމާގެ (އެމްއޯޔޫ) ދަށުން، ގަތަރުގައި ހިފަހައްޓާފައިވާ އީރާނުގެ 6 ބިލިއަން ޑޮލަރު މިނިވަންވެ، އަނބުރާ ލިބޭނެ ކަމަށް އެ ގައުމުގެ ރައީސް މަސްއޫދު ޕެޒެޝްކިއަން ވިދާޅުވެއްޖެ އެވެ.

ހޯމަ ދުވަހު ރައީސް ޕެޒެޝްކިއަން ވިދާޅުވީ، ރޭވިފައިވާ ގޮތުގެ މަތިން ގަތަރުގައި ހުރި އީރާނުގެ ޖުމްލަ 12 ބިލިއަން ޑޮލަރުގެ ތެރެއިން 6 ބިލިއަން ޑޮލަރު މިނިވަންކޮށް، ގައުމަށް އަނބުރާ ގެނެވޭނެ ކަމަށެވެ.

އަދި ބާކީ ހުރި ފައިސާ އަނބުރާ ހޯދުމަށްޓަކައި ކުރަންޖެހޭ "މުހިންމު ފޮލޯ-އަޕްތައް" ކުރިއަށްދާ ކަމަށް ވެސް އެމަނިކުފާނު އިތުރަށް ވިދާޅުވި އެވެ.

އީރާނާއި އެމެރިކާއާ ދެމެދު ވެވުނު މި ފަހުމުނާމާއަކީ "އީރާނުގެ ރައްޔިތުންނަށް ލިބުނު ބޮޑު ކާމިޔާބީއެއް" ކަމަށް ސިފަކުރައްވަމުން، މި އެއްބަސްވުމުގެ ދަށުން ތެލާއި ޕެޓްރޯކެމިކަލް އުފެއްދުންތަކާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލާފައިވާ ކަމަށް ވެސް ޕެޒެޝްކިއަން ވިދާޅުވި އެވެ.

މީގެ އިތުރުން އީރާނުގެ ރައީސް ފާހަގަކުރެއްވި ގޮތުގައި، ޒަޔަނިސްޓް ރެޖީމުން (އިސްރާއީލް) އަދި ރަސްކަމުގެ ނިޒާމަށް ތާއީދުކުރާ ބައެއް ފަރާތްތަކުން މި އެއްބަސްވުމާ ދެކޮޅު ހެދި ނަމަވެސް، އެމެރިކާއިން ވަނީ އެ އެއްބަސްވުން ގަބޫލުކުރުމަށް އިސްރާއީލަށް މަޖުބޫރުކޮށްފަ އެވެ.

ޖުލައި މަހުގެ 18 ވަނަ ދުވަހު ޕާކިސްތާނުން މެދުވެރިއެއްގެ ދައުރު އަދާކޮށްގެން އީރާނާއި އެމެރިކާއާ ދެމެދު ސޮއިކުރި 14 ނުކުތާގެ މި ފަހުމުނާމާގައި، ލުބުނާން ހިމެނޭހެން ހުރިހާ މައިދާނެއްގައި ކުރިއަށްދާ ހަނގުރާމަތައް ދާއިމީކޮށް ހުއްޓާލުމަށާއި، 30 ދުވަހުގެ ތެރޭގައި އީރާނަށް އަޅާފައިވާ ކަނޑުގެ ބްލޮކޭޑް ނުވަތަ ބަންދު އުވާލުމަށާއި، ހުރްމުޒް ކަނޑުއޮޅިން ވިޔަފާރި އުޅަނދުފަހަރު ދަތުރުފަތުރުކުރުން އަލުން އިއާދަކުރުމަށް ވަނީ ގޮވާލާފަ އެވެ.

މި ފަހުމުނާމާގެ ދަށުން، ފުރިހަމަ ދާއިމީ އެއްބަސްވުމަކަށް އައުމަށްޓަކައި ދެ ގައުމުގެ ދެމެދުގައި 60 ދުވަހުގެ މަޝްވަރާގެ މުއްދަތެއް މިހާރު ވަނީ ފެށިފަ އެވެ.

އެމެރިކާގެ ރައީސް ޑޮނަލްޑް ޓްރަމްޕާއި އެ ގައުމުގެ އިސް އޮފިޝަލުން ވިދާޅުވާ ގޮތުގައި، ޕާކިސްތާނު މެދުވެރިވެގެން ވެވުނު މި އެއްބަސްވުމުގެ ދަށުން ފުރަތަމަ ދޫކުރާ ފައިސާ ބޭނުންކުރާނީ އެމެރިކާގެ ދަނޑުވެރިންގެ އަތުން ގޮދަން އަދި ސޯޔާބީން ގަތުމަށެވެ.

އީރާނަށް ސީދާ އެއްވެސް ނަގުދު ފައިސާއެއް ނުލިބޭނެ ކަމަށް ވިދާޅުވެ، ޓްރަމްޕް ވިދާޅުވަމުން ގެންދަވަނީ އެ ފައިސާ ދާނީ އެމެރިކާގެ ދަނޑުވެރިންނަށް ކަމަށާއި، އެއީ އީރާނަށް ކުރިމަތިވެފައިވާ "ބަނޑުހައިހޫނުކަމުގެ މައްސަލަ" ހައްލުކުރުމަށް ކުރާ ކަމެއް ކަމަށެވެ.

ނަމަވެސް، އީރާނުގެ އިސް މަޝްވަރާވެރިޔާ މުހައްމަދު ބާގިރު ގާލިބާފް ވަނީ ބުރާސްފަތި ދުވަހު އެމެރިކާގެ މި ވާހަކަތައް ދޮގުކުރައްވާފަ އެވެ. ސޯޝަލް މީޑިއާ ޕްލެޓްފޯމް 'އެކްސް' ގައި އޭނާ ލިޔުއްވާފައިވަނީ، މިނިވަންކުރާ އީރާނުގެ ފައިސާއިން އެމެރިކާގެ ދަނޑުވެރިކަމުގެ އުފެއްދުންތައް ގަންނާނެ ކަމަށް ބުނެ އެމެރިކާއިން ހަދަނީ ދޮގު ކަމަށެވެ.