އިސްރާއީލުން ގެންދަނީ ދެކުނު ލުބުނާނު ދާއިމީކޮށް ހިފުމަށް ރާވަމުން: ތެހެރާން ޕްރޮފެސަރ

އިސްރާއީލުން ލުބުނާނުގެ ދެކުނުގެ ސަރަހައްދުތައް ދާއިމީކޮށް ހިފުމަށް ރާވަމުންދާ ކަމަށް ތެހެރާން ޔުނިވަރސިޓީގެ ޕްރޮފެސަރެއް ކަމަށްވާ ސައްޔިދު މުޙައްމަދު މަރަންދީ ވިދާޅުވެއްޖެ އެވެ.

ރަޝިޔާ ޓީވީ (އާރުޓީ) އަށް ދެއްވި ބަސްދީގަތުމެއްގައި މަރަންދީ ވިދާޅުވީ، ލުބުނާނުގެ ދެކުނުގައި އިސްރާއީލުގެ އަސްކަރިއްޔާއިން ހަރަކާތްތެރިވަމުން ދިއުމަކީ އެ ގައުމުގެ ބިންތައް ފުޅާކުރުމަށް ގެންގުޅޭ ސިޔާސަތު ހާމަވާ ކަމެއް ކަމަށާއި، މީގެ އިތުރުން މިއީ އީރާނާއެކު ވެފައިވާ ވަގުތީ ސުލްހައިގެ އެއްބަސްވުމުގެ ދަށުން އެމެރިކާއިން އަދާކުރަންޖެހޭ ޒިންމާތައް އަދާކުރުމުގައި ފޭލްވެފައިވާ ކަމުގެ ހެއްކެއް ކަމަށެވެ.

މި މަހުގެ ކުރީކޮޅު އީރާނާއި އެމެރިކާއިން ވަނީ ވަގުތީ އެއްބަސްވުމަކަށް އައިސްފަ އެވެ. މި އެއްބަސްވުމުގެ ދަށުން އީރާނުން ބާރުއަޅާފައިވަނީ އިސްރާއީލުގެ ސިފައިން ލުބުނާނުގެ ދެކުނުން ފޭބުމަށެވެ. އަދި މިދިޔަ ހަފުތާގައި އިސްރާއީލާއި ލުބުނާނުގެ ސަރުކާރާ ދެމެދު، އެމެރިކާ މެދުވެރިވެގެން އެއްބަސްވުމެއްގައި ސޮއިކޮށްފައިވެ އެވެ. މި އެއްބަސްވުމަކީ ހިޒްބުﷲގެ ހަތިޔާރު އަތުލުމާ ހަމައަށް، އިސްރާއީލުގެ ސިފައިން މަޑުމަޑުން ލުބުނާނުން ފޭބުމަށް އެކުލަވާލި އެއްބަސްވުމެކެވެ.

ނަމަވެސް، ފާއިތުވި ދުވަސްތަކުގައި ވޮޝިންޓަނާއި ތެހެރާނުން ވަނީ މި އެއްބަސްވުމާ މެދު ތަފާތު މާނަކުރުންތަކެއް ގެންގުޅެފަ އެވެ. އަދި މިދިޔަ ހުކުރު ދުވަހު ދެފަރާތުން ހަމަލާތައް ބަދަލުކޮށްފައިވާއިރު، އެއް ގައުމުން އަނެއް ގައުމަށް ވަނީ އެއްބަސްވުމާ ޚިލާފުވެފައިވާ ކަމުގެ ތުހުމަތުކޮށްފަ އެވެ. ހިޒްބުﷲ ޖަމާއަތުން ވަނީ އިސްރާއީލާއި ލުބުނާނާ ދެމެދު ވެފައިވާ އެއްބަސްވުން ގަބޫލުކުރުމަށް އިންކާރުކޮށްފަ އެވެ. އެ ޖަމާއަތުން ބުނާ ގޮތުގައި މި އެއްބަސްވުމުގެ ސަބަބުން އިސްރާއީލަށް ލުބުނާނުގެ ތެރޭގައި ބޭނުންހާ ގޮތަކަށް އަމަލުކުރުމުގެ މިނިވަންކަން ލިބިގެންދެ އެވެ. އަދި ހަތިޔާރު ބެހެއްޓުމަށްވެސް އެ ޖަމާއަތުން ވަނީ ދެކޮޅު ހަދާފަ އެވެ.

މި ހާލަތާ ގުޅޭގޮތުން ވާހަކަދައްކަވަމުން މަރަންދީ ވިދާޅުވީ، އިސްރާއީލުގެ ސަރުކާރުން ލުބުނާނާއި ސޫރިޔާގެ ބިންތައް ހިފައި، އެ ގައުމުގެ ސަރަހައްދު ފުޅާކުރަން ބޭނުންވާކަން އެންމެންނަށްވެސް އެނގޭ ކަމަށެވެ. އަދި މިއީ "ގްރޭޓަރ އިސްރާއީލް" ގާއިމު ކުރުމުގެ މަޝްރޫއުގެ ބައެއް ކަމަށް އޭނާ ފާހަގަކުރެއްވި އެވެ. މަރަންދީ މިހެން ވިދާޅުވީ ލުބުނާނުގައި އިސްރާއީލުގެ އަސްކަރިއްޔާ ދެމިތިބުމާއި، އިސްރާއީލުން ހިފާފައިވާ ގޯލާން ހައިޓްސް ކައިރީގައިވާ ސޫރިޔާގެ ދެކުނުގެ ސަރަހައްދުތަކަށް އިސްރާއީލުން ބާރު ފޯރުވަމުންދާ ދިއުމަށް އިޝާރާތްކުރައްވަ އެވެ.

މީގެ އިތުރުން، އިސްރާއިލުން ލުބުނާނުގެ ބިންތައް ހިފާފައި އޮތް އޮތުމާ ގުޅޭގޮތުން އެމެރިކާއިން އަދާކުރަންޖެހޭ މަސްއޫލިއްޔަތުތަކުން އެ ގައުމުން ރެކެމުންދާ ކަމަށްވެސް މަރަންދީ ވިދާޅުވި އެވެ.

މަރަންދީ އިތުރަށް ވިދާޅުވީ، އެމެރިކާއިން އިސްރާއީލުގެ ސިފައިން އެ ސަރަހައްދުން ބޭރުކުރުމަށް މަސައްކަތް ނުކުރާ ކަމަށާއި، އަދި ހިފާފައިވާ ބިންތަކުން ފޭބުމަށް އިސްރާއީލަށް އެއްވެސް ފިއްތުމެއް ކުރިމަތިނުކުރާ ކަމަށެވެ. އަދި މި ވަގުތީ އެއްބަސްވުން ތަންފީޒުކުރުމުގައި އެމެރިކާއަކީ އިޚްލާޞްތެރި ގައުމެއް ކަމަށް އީރާނުން ފެށުނީއްސުރެ ގަބޫލުނުކުރާ ކަމަށްވެސް އޭނާ ވިދާޅުވި އެވެ.