ވެނެޒުއޭލާގެ ވެރިރަށަށް ފުލުފުލުގައި އައި ބާރުގަދަ ދެ ބިންހެލުމާ ގުޅިގެން މުޅި ގައުމުގައި ކުއްލި ނުރައްކަލުގެ ހާލަތު އިއުލާނުކޮށްފި
ރިކްޓަރ މިންގަނޑުން 7.2 އާއި 7.5 ގެ ބާރުމިނުގައި އައި މި ބިންހެލުންތަކުގައި މިހާތަނަށް 32 މީހުން މަރުވެ 700 އެއްހާ މީހުން ޒަޚަމްވެފައިވާކަމަށް އެ ގައުމުގެ ސަރުކާރުން ހާމަކުރޭ. އިމާރާތްތަކުގެ ދަށުވެފައިވާ މީހުން ސަލާމަތްކުރުމުގެ މަސައްކަތް ކުރިއަށްދާއިރު، ބައިނަލްއަގުވާމީ މުޖުތަމައުން ދަނީ އެ ގައުމަށް އެހީތެރިކަން ފޯރުކޮށްދެމުން.
2026 ޖޫން 24 ވަނަ ދުވަހު ކަރަކަސްއަށް އައި ބާރުގަދަ ބިންހެލުމާ ގުޅިގެން ވެއްޓިފައިވާ އިމާރާތެއްގެ ދަށުގައި ތާށިވެފައިވާ މީހުން ހޯދުމުގެ މަސައްކަތް ރެސްކިއު ޓީމުތަކުން ކުރަމުންދަނީ. | ގެޓީ އިމޭޖަސް
ވެނެޒުއޭލާގެ ވެރިރަށް ކަރަކަސްއަށް ރޭގެ ވަގުތެއްގައި ބާރުގަދަ ދެ ބިންހެލުން އައިސް، ގިނަ އިމާރާތްތަކެއް ބިމާހަމަވެ، ކުއްލި ނުރައްކަލުގެ ހާލަތު އިއުލާނު ކޮށްފި އެވެ.
އެއް މިނެޓުގެ ތެރޭގައި ކަރަކަސްއަށް ބާރުގަދަ ދެ ބިންހެލުމެއް އައިސްފައިވާއިރު، ފުރަތަމަ ބިންހެލުން ރެކޯޑު ކުރެވިފައިވަނީ 7.2 މެގްނިޓިއުޑްގައެވެ. އަދި ދެވަނަ ބިންހެލުން ރެކޯޑު ކުރެވިފައިވަނީ 7.5 މެގްނިޓިއުޑްގައެވެ.
ވެއްޓިފައިވާ އިމާރާތްތަކުގެ ދަށުން މީހުން ސަލާމަތްކުރުމުގެ މަސައްކަތް ރެސްކިއު ޓީމުތަކުން ކުރަމުންދާއިރު، އިމާރާތްތަކުގެ ދަށުން މީހުން އެހީއަށް އެދި ގޮވާ އަޑު އިވޭ ކަމަށް ބީބީސީ އިން ވަނީ ރިޕޯޓުކޮށްފައެވެ.
ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް ވަނީ މުޅި ގައުމުގައި ކުއްލި ނުރައްކަލުގެ ހާލަތު އިއުލާނުކުރައްވައި، މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވާފައެވެ.
ލެޓިން އެމެރިކާގެ ގައުމުތަކުގެ ވެރިންނާއި އެމެރިކާގެ ރައީސް ޑޮނަލްޑް ޓްރަމްޕް ވަނީ ވެނެޒުއޭލާއަށް އެހީތެރިކަން ފޯރުކޮށްދެއްވާނެ ކަމަށް ވިދާޅުވެ، އެ ގައުމާ އެކު ސާބިތުވެ ތިއްބެވިކަން ހާމަކުރައްވާފައެވެ.
ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް މައުލޫމާތު ދެއްވި ގޮތުގައި، މި ބިންހެލުމުގައި މިހާތަނަށް މަދުވެގެން 32 މީހުން މަރުވެފައިވާއިރު، ގާތްގަނޑަކަށް 700 މީހުންނަށް އެކިވަރުގެ އަނިޔާތައް ވަނީ ލިބިފައެވެ.
