މެސީ ބޭނުންވީ އެހެން ކުޅުންތެރިންނަށް ވަގުތު ދޭން، އޭނާގެ ކުޅުމާ މެދު މިހުރީ ހައިރާންވެ ބުނާނެ އެއްޗެއް ނޭނގިފައި: ސްކަލޯނީ

ފީފާ ވޯލްޑް ކަޕްގެ ގުރޫޕު ސްޓޭޖުގެ ފަހު މެޗުގައި ޖޯޑަންއާ ދެކޮޅަށް ކުޅުނު މެޗުގެ ފުރަތަމަ 11 ގައި އާޖެންޓީނާގެ ކެޕްޓަން ލިއޮނަލް މެސީ ނުހިމެނީ، އެހެން ކުޅުންތެރިންނަށް ވަގުތު ދޭން މެސީ ބޭނުންވާތީ ކަމަށް އެ ޓީމުގެ ކޯޗު ލިއޮނަލް ސްކަލޯނީ ބުނެފި އެވެ. 

މެޗުގައި މެސީ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގައި އެވެ. އެއަށް ފަހު އާޖެންޓީނާ އަށް ލިބުނު ހިލޭ ޖެހުމެއް ކާމިޔާބުކޮށް، މެސީ ލަނޑު ޖެހި އެވެ. މިއީ މިފަހަރުގެ މުބާރާތުގައި މެސީ ޖެހި ހަ ވަނަ ލަނޑެވެ. އެ ލަނޑާ އެކު މެސީ ވެގެން ގޮސްފައި ވަނީ، ވޯލްޑް ކަޕްގެ ހަތް މެޗުގައި ޖެހި ޖެހިގެން ލަނޑު ޖެހި ފުރަތަމަ ކުޅުންތެރިޔާ އަށެވެ. 

މެސީގެ ކުޅުމާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، މެސީގެ ފެންވަރާ ބެހޭ ގޮތުން ސުވާލު ކުރިޔަސް އޭނާ އަށް ބުނާނެ އެއްޗެއް ނޭނގޭ ކަމަށެވެ. އަދިވެސް މެސީ ގެންދަނީ އޭނާ ހައިރާން ކުރުވަމުން ކަމަށް ވެސް ސްކަލޯނީ ބުންޏެވެ. އެއާ އެކު ސްކަލޯނީ ބުނީ، މެޗުގައި ބަދަލު ކުޅުންތެރިޔެއްގެ ގޮތުގައި ކުޅެން ބޭނުންވީ މެސީ އަމިއްލަ އަށް ކަމަށެވެ. 

އެގޮތުން މެސީ ބޭނުންވީ އާޖެންޓީނާގެ އެހެން ކުޅުންތެރިންނަށް ކުޅުމުގެ ވަގުތު ދިނުމަށް ކަމަށާއި، މެސީ ބޭނުން ވަނީ ކުރިއަށް އޮތް މެޗަށް ފުރިހަމަ އަށް ތައްޔާރުވާން ކަމަށް ވެސް ސްކަލޯނީ ބުންޏެވެ. ސްކަލޯނީ ބުނީ މެސީ ހުރީ މެޗުގެ 90 މިނެޓު ކުޅެވޭ ޙާލަތުގައި ކަމަށާއި، ނަމަވެސް ފުރަތަމަ 11 ގައި ކުޅެން އަރަން މެސީ ބޭނުން ނުވީ ކަމަށެވެ. އެއާ އެކު ސްކަލޯނީ ބުނީ، މެސީ އަށް ނަންބަރު ތަކާއި، ރެކޯޑު ތަކަކީ އެހާ މުހިންމު އެއްޗެއް ނޫން ކަމަށެވެ. 

މީގެ އިތުރުން ސްކަލޯނީ ބުނީ މެޗުގައި އާޖެންޓީނާގެ ކުޅުންތެރިން ދެއްކި ކުޅުމާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. އަދި މުބާރާތުގެ ކޮންމެ ވަގުތެއްގައި ވެސް އެ ކުޅުންތެރިންނަށް އިތުބާރު ކުރެވޭނެކަން، އެ ކުޅުންތެރިން ސާބިތު ކޮށްދީފައިވާ ކަމަށް ސްކަލޯނީ ބުންޏެވެ. އޭނާ ބުނީ އާޖެންޓީނާގެ ޓީމު އޮތީ ވަރަށް ބޮޑު އިތުބާރެއްގައި ކަމަށާއި، ކުރިއަށް އޮތް ބުރަށް ޓީމު ނިކުންނާނީ އެ އިތުބާރާާ އެކު ކަމަށެވެ.