ދެކުނު އެފްރިކާ ބަލިކޮށް، ކެނެޑާ ގަދަ 16 އަށް

މިހާރު ކުރިއަށްދާ ފީފާ ވޯލްޑް ކަޕްގެ ގަދަ 32 ގެ ބުރުގައި ދެކުނު އެފްރިކާއާ ދެކޮޅަށް ކުޅުނު މެޗުން މޮޅުވެ، ކެނެޑާ އިން މުބާރާތުގެ ގަދަ 16 އިން ޖާގަ ހޯދައިފި އެވެ.

އާދީއްތަ ދުވަހުގެ ރޭ ދަންވަރު ކުޅުނު މެޗު ކެނެޑާ އިން ކާމިޔާބު ކުރީ 1-0 އިންނެވެ. މެޗުގައި ކެނެޑާ އިން ލަނޑު ޖެހީ ވެސް މެޗުގެ އެންމެ ފަހު ވަގުތުގައި އެވެ.

މެޗު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެން ދިޔައިރު، ދެ ޓީމުން ވެސް ދިޔައީ ލަނޑު ޖަހަން މަސައްކަތް ކުރަމުންނެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ކެނެޑާގެ ސްޓެފަން އިސްޓަކިއޯ ވަނީ ލަނޑު ޖަހައި މެޗުން އެ ޓީމު މޮޅު ކޮށްދީފައި އެވެ.

ކެނެޑާ އަކީ މިއަހަރުގެ ވޯލްޑް ކަޕް ބާއްވާ ތިން ޤައުމުގެ ތެރެއިން އެއް ޤައުމެވެ. މުބާރާތުގައި ކެނެޑާގެ ގުރޫޕު ސްޓޭޖުގެ ހުރިހާ މެޗެއް ވެސް ކުޅުނީ އަމިއްލަ ޤައުމުގައި އެވެ. ނަމަވެސް، ނޮކްއައުޓް ބުރުގެ މެޗު ކެނެޑާ އިން ކުޅެފައި ވަނީ އެމެރިކާގައި އެވެ. މިއީ ކެނެޑާ އިން ވޯލްޑް ކަޕްގެ ނޮކްއައުޓް ބުރުގައި ވާދަ ކުރާ ފުރަތަމަ ފަހަރެވެ. 

މުބާރާތުގެ ގަދަ 16 ގައި ކެނެޑާ ވާދަ ކުރަން ޖެހޭނީ ނެދަލެންޑްސް އާއި މޮރޮކޯ ކުޅޭ މެޗުން މޮޅުވާ ޓީމަކާ ދެކޮޅަށެވެ.