އެމެރިކާ އަށް ދިން "ވަރުގަދަ ރައްދެއް" ގެ ގޮތުގައި ސަރަހައްދުގައި ހުރި އެމެރިކާގެ އަސްކަރީ 8 މަރުކަޒަކަށް ހަމަލާދީފައިވާ ކަމަށް އީރާނުން ބުނެފި

އީރާނުގެ ސަރަހައްދުތަކަށް އެމެރިކާއިން އަލުން ދޭން ފެށި ހަމަލާތަކަށް ދިން "ވަރުގަދަ ރައްދެއް" ގެ ގޮތުގައި، އެ ސަރަހައްދުގައި ހުރި އެމެރިކާގެ އަސްކަރީ އަށް މަރުކަޒަކަށް އަމާޒުކޮށް މިސައިލާއި ޑްރޯން ބޭނުންކޮށްގެން ބޮޑު އޮޕަރޭޝަނެއް ހިންގާފައިވާ ކަމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނެފި އެވެ.

އައި.އާރް.ޖީ.ސީ އިން ނެރުނު ބަޔާނެއްގައި ބުނެފައިވަނީ، އެ ޖަމާއަތުގެ ނޭވީ އާއި އެއަރޯސްޕޭސް ފޯސް ގުޅިގެން އާދީއްތަ ދުވަހުގެ ފަތިހު (އެ ގައުމުގެ ގަޑިން) 2:00 އާއި 3:00 އާ ދެމެދު ހިންގި މި އޮޕަރޭޝަނުގައި އެމެރިކާގެ އަސްކަރީ މުހިންމު އަށް މަރުކަޒަކަށް ހަމަލާދީފައިވާ ކަމަށެވެ. މީގެ ތެރޭގައި ކުވެއިތުގައި ހުންނަ "ޢަލީ އަލް ސާލިމް އެއަރބޭސް" އާއި ބަހްރައިންގެ ސަލްމާން ޕޯޓުގައި ހުންނަ އެމެރިކާގެ ފިފްތު ފްލީޓްގެ ހެޑްކުއާޓާޒް ހިމެނޭ ކަމަށް އެ ބަޔާނުގައިވެ އެވެ.

ބެލިސްޓިކް މިސައިލާއި ޑްރޯން ބޭނުންކޮށްގެން ދިން މި ހަމަލާތަކުގައި، އަމާޒުކުރި ހުރިހާ ތަންތަނެއް ސުންނާފަތިކޮށްލާފައިވާ ކަމަށް އީރާނުން ބުނެ އެވެ.

އެ ބަޔާނުގައިވާ ގޮތުން، މި އޮޕަރޭޝަން ހިންގާފައިވަނީ އެ ދުވަހުގެ ކުރީކޮޅު އީރާނުގެ އައްސޭރިފަށުގެ ފަސް ސަރަހައްދަކަށް ދުޝްމަނުން ދިން ހަމަލާތަކާ ގުޅިގެންނެވެ.

"ވައުދުތަކާ ޚިލާފުވުމާއި އެއްބަސްވުންތަކާ ޚިލާފުވުމަކީ އާދައަކަށް ހަދާފައިވާ އަނިޔާވެރި ދުޝްމަނުން، މިއަދުގެ ކުރީކޮޅު އިސްލާމީ ޖުމްހޫރިއްޔާގެ އައްސޭރިފަށުގެ ފަސް ސަރަހައްދަކަށް ހަމަލާދީފައިވަނީ، ހުރްމުޒް ކަނޑުއޮޅިން ގަވާއިދާ ޚިލާފަށް ދަތުރުކުރި އުޅަނދަކަށް އައި.އާރް.ޖީ.ސީ ނޭވީން ހުރަސްއެޅުމުން އެކަމަށް ރައްދު ދިނުމުގެ ބަހަނާގަ އެވެ،" ބަޔާނުގައިވެ އެވެ.

ހޮރްމޫޒް ކަނޑުއޮޅި ބެލެހެއްޓުމާ ގުޅޭ އިންޒާރު

އައި.އާރް.ޖީ.ސީ އިން ބުނި ގޮތުގައި، ހުރްމުޒް ކަނޑުއޮޅިން ދަތުރުކުރާ އުޅަނދުފަހަރު ބެލެހެއްޓުމަކީ، ދާދިފަހުން ޕާކިސްތާނު މެދުވެރިވެގެން އީރާނާއި އެމެރިކާއާ ދެމެދު ސޮއިކުރި ފަހުމުނާމާގެ ދަށުން އީރާނުގެ މަސްއޫލިއްޔަތެކެވެ.

އަދި "މީގެ ފަހުން ގަވާއިދާ ޚިލާފުވާ އުޅަނދުފަހަރާ މެދު ކުރިއަށްވުރެ މާ ވަރުގަދައަށް ފިޔަވަޅު އަޅާނެ" ކަމަށްވެސް އެ ބަޔާނުގައި އިތުރަށް ބުނެފައިވެ އެވެ.

މީގެ އިތުރުން، ދުޝްމަނުންގެ ފަރާތުން ކުރިމަތިވާ ކޮންމެ އުދުވާނަކަށް، އެއީ ކޮންމެ ބަހަނާއެއްގައި ދޭ ހަމަލާއެއް ކަމުގައިވީ ނަމަވެސް، އަދި އެއީ ކުރިން ދިން ހަމަލާތަށް ފަދަ ކުދި އަމާޒުތަކަކަށް ދޭ ހަމަލާއެއް ކަމުގައިވީ ނަމަވެސް، އެކަމަށް ބަދަލުހިފުމުގެ ގޮތުން ވަރުގަދަ ހަމަލާއެއް ދޭނެ ކަމުގެ އިންޒާރުވެސް އެ ބަޔާނުގައި ދީފައިވެ އެވެ.

އައި.އާރް.ޖީ.ސީ އިން އިތުރަށް ބުނެފައިވަނީ، "ހަމަލާ ބަދަލުކުރުން ހުއްޓާލުމުގެ އެއްބަސްވުމާ ޚިލާފުވުމަކީ އިސްލާމްއާބާދު ފަހުމުނާމާގެ ފުރަތަމަ މާއްދާއާ ޚިލާފުވުން ކަމަށާއި، އޭގެ ސަބަބުން އެ އެއްބަސްވުމާ ގުޅުންހުރި ހުރިހާ ކަމެއް މުޅިން މެދުކަނޑާލެވޭނެކަން ދުޝްމަނުން ދަންނަންޖެހޭނެ" ކަމަށެވެ.

މި ބަޔާން ނެރެފައިވަނީ، އީރާނުގެ އެތެރޭގެ އަމާޒުތަކަށް އާ ހަމަލާތަކެއް ދީފައިވާނެ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އިއުލާންކޮށްފައި ވަނިކޮށެވެ. ސެންޓްކޮމް އިން ބުނި ގޮތުގައި މި ހަމަލާތަކަކީ ތެޔޮ ޓޭންކަރަކަށް ހަމަލާދިނުމާ ގުޅިގެން ދިން ރައްދެކެވެ.

މިކަން ހާމަ ކުރުމަށް ފަހު ކުޑަވަގުތުކޮޅެއްގެ ތެރޭގައި، އީރާނުގެ ދައުލަތުގެ މީޑިއާ އައި.އާރް.އައި.ބީ އިން އަސްކަރީ މަސްދަރަކާ ހަވާލާދީ ރިޕޯޓްކޮށްފައިވާ ގޮތުގައި، ދެކުނު ހުރްމުޒްގާން ޕްރޮވިންސްގެ ސިރިކް ކައުންޓީގައި ގޮވުންތަކެއްގެ އަޑު ވަނީ އިވިފަ އެވެ.

އެ މަސްދަރުން ބުނި ގޮތުގައި، "އިވުނު ގޮވުންތަކަކީ ސިރިކްގެ ތަހްރޫއީ އަވަށާ ކައިރީގައި ހުރި މުވާސަލާތީ ޓަވަރަކަށް ހަމަލާތަކެއް އެރުމުގެ ސަބަބުން އިވުނު އަޑުތަކެއް" ކަމަށެވެ.

މީގެ އިތުރުން، ގިޝްމް އައިލެންޑުންވެސް ގޮވުންތަކެއްގެ އަޑު އިވުނު ކަމަށް އެ ސަރަހައްދުގެ ރައްޔިތުން ރިޕޯޓްކޮށްފައިވީ ނަމަވެސް، އެއީ ސީދާ ކޮން ތަންތަނެއްގައި އަދި ކޮން ސަބަބަކާ ހުރެ ހިނގި ކަމެއްކަން އަދި ކަށަވަރުވެފައި ނުވާ ކަމަށް ރިޕޯޓްތައް ބުނެ އެވެ.

މި ކުރިމަތިލުންތައް އަލުން ފެށިފައިވަނީ، ހުރްމުޒް ކަނޑުއޮޅިން ހުއްދަ ނެތް މަގަކުން ދަތުރުކުރި އުޅަނދަކަށް، އެކަން ނުކުރުމަށް އިންޒާރު ދިނުމަށްފަހު، ހުކުރު ދުވަހު އައި.އާރް.ޖީ.ސީ ނޭވީން އިންޒާރުގެ ބަޑި ޖެހި ހާދިސާއަށް ފަހުގައެވެ.

އޭގެ ފަހުން ސެންޓްކޮމް އިން ވަނީ އީރާނުގެ އަސްކަރީ އަމާޒުތަކަށް ހަމަލާދީފައިވާ ކަމަށް ރިޕޯޓްކޮށްފަ އެވެ.

އައި.އާރް.ޖީ.ސީ އިން ފަހުން ވަނީ އެ ސަރަހައްދުގައި ހުރި އެމެރިކާގެ އަސްކަރީ އަމާޒުތަކަށް ބަދަލުހިފުމުގެ ހަމަލާތަކެއް ދީފައިވާކަން އިއުލާންކޮށްފަ އެވެ. "އަދި އެމެރިކާއަށް މިހާރު ވަނީ ދޭންޖެހޭ ރައްދު ދެވިފައި،" ކަމަށް އެ ވަގުތު ބުނެފައިވެއެވެ. އަދި އިތުރަށް ބުނެފައިވަނީ "ކުރިއަށް އޮތް ތަނުގައިވެސް އުސޫލުތަކާ ޚިލާފުވާ ކޮންމެ ފަހަރަކު މިފަދައިން އަމަލުކުރެވޭނެ" ކަމަށާއި، "މިފަދަ އުދުވާނެއް ތަކުރާރުކޮށްފިނަމަ، އަހަރެމެންގެ ރައްދު މިއަށްވުރެ ބޮޑުވާނެ" ކަމަށެވެ.

އެމެރިކާ އާއި އިސްރާއީލުން އީރާނާ ދެކޮޅަށް އެއްވެސް އުދުވާނެއް ނެތި ދޭން ފެށި އަސްކަރީ ހަމަލާތަކުގެ ތެރެއިން، އޭޕްރިލް 7 ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕް އިއުލާންކުރެއްވި ހަމަލާ ބަދަލުކުރުން ހުއްޓާލުމުގެ އެއްބަސްވުމާ އެމެރިކާގެ ސިފައިން ވަނީ ތަކުރާރުކޮށް ޚިލާފުވެފަ އެވެ.

އެއްވެސް އަސާސެއް ނެތި ދިން މި އުދުވާނަށް ރައްދު ދިނުމުގެ ގޮތުން އީރާނުން ވަނީ މަދުވެގެން 100 ހަމަލާ ދީފަ އެވެ. އަދި އޭގެ ފަހުންވެސް ހަމަލާ ބަދަލުކުރުން ހުއްޓާލުމުގެ އެއްބަސްވުމާ ޚިލާފަށް ދޭ ކޮންމެ ހަމަލާއަކަށް އީރާނުން ދަނީ ރައްދު ދެމުންނެވެ.