އީރާންގެ ގިނަ އަމާޒު ތަކަކަށް ހަމަލާ ދީފައިވާ ކަމަށް އެމެރިކާ އިން އިއުލާާން ކޮށްފި

ހުރްމުޒް ކަނޑުއޮޅިން ދަތުރު ކުރަމުން ދިޔަ އުޅަނދަކަށް އީރާން އިން ހަމަލާދިން ކަމަށް ބުނެ، އެމެރިކާގެ ސިފައިން ހޮނިހިރު ދުވަހު އީރާންގެ ގިނަ އަމާޒު ތަކަކަށް ހަމަލާތަކެއް ދީފައިވާ ކަމަށް އިއުލާން ކޮށްފި އެވެ. 

އެމެރިކާގެ މެދުތެރޭ ސަރަހައްދުގެ ކޮމާންޑް (ސެންޓްކޮމް) އިން ބުނީ، ވިޔަފާރީގެ އުޅަނދު ތަކަށް އީރާން އިން ދެމުން ގެންދާ ހަމަލާ ތަކަށް ސީދާ ރައްދު ދިނުމުގެ ގޮތުން ސެންޓްކޮމްގެ ބާރު ތަކުން ހޮނިހިރު ދުވަހު ހަމަލާ ތަކެއް ދީފައިވާ ކަމަށެވެ.  

އެމެރިކާގެ ސިފައިން އިތުރަށް ބުނީ، އީރާން އިން ހޮނިހިރު ދުވަހުގެ ކުރީ ކޮޅު ޕެނަމާގެ ދިދަ ޖަހާފައިވާ ކިކޫ ނަމަކަށް ކިޔާ ތެޔޮ ޓޭންކަރަކަށް ހަމަލާދިން ކަމަށެވެ. މި އުޅަނދުގައި ދެ މިލިއަނަށްވުރެ ގިނަ ބެރެލް ތެޔޮ ބަރުކޮށްފައި ހުރި ކަމަށް ސެންޓްކޮމް އިން ބުނެފައިވެ އެވެ. 

އެ ކޮމާންޑުން ފަހުން އެކްސްގައި ހިއްސާކުރި ތިރީަސް ފަސް ސިކުންތުގެ ވީޑިއޯއެއްގައި ތަފާތު ސަރަހައްދު ތަކުގައި ގޮވާ މަންޒަރު ފެނިގެން ދެއެވެ. މި ވީޑިއޯ ރެކޯޑު ކޮށްފައި ވަނީ ޖައްވުގެ ތެރެއިން ކަމަށް ބެލެވެ އެވެ. 

އެކްސްގައި ކުރި ޕޯސްޓްގައި ބުނީ، އީރާން އިން ކިކޫ ޓޭންކަރަށް ޑްރޯން ހަމަލާ ދިނުމުގެ ސަބަބުން، އެމެރިކާގެ ނޭވީ އަދި އެއާފޯސްގެ ފައިޓާ ޖެޓު ތަކުން ހޮނިހިރު ދުވަހު ހުރްމުޒް ކަނޑުއޮޅި އާއި، އެ ސަރަހައްދުގެ ކައިރީގަައިވާ އީރާންގެ ދިހަ އަމާޒަކަށް ހަމަލާ ދީފައިވާ ކަމަށެވެ. 

އެމެރިކާ އިން ބުނެފައި ވަނީ މިފަހަރުގެ ހަމަލާތައް އަމާޒު ކޮށްފައި ވަނީ، ރާޑަރު ސިސްޓަމް ތަކާއި، މުއާސަލާތީ ނިޒާމު ތަކާއި، ވައިގެ ދިފާއީ ތަންތަނާއި، ޑްރޯން ރައްކާ ކުރަ ތަންތަން އަދި މައިން އަޅާ އުޅަނދު ތަކުގެ ޚާއްސަ ޤާބިލިއްޔަތު ތަކަށް ކަމަށެވެ. 

އީރާންގެ މީޑިއާ ތަކުން ރިޕޯޓު ކުރި ގޮތުގައި، އީރާންގެ ދެކުނުގެ ސިރިކް އަދި ގެޝްމް ސަރަހައްދު ތަކުގައި ގިނަ ގޮއްވުން ތަކެއް ރިޕޯޓު ކުރެވިފައިވެ އެވެ.

ހުކުރު ދުވަހު ވެސް އެމެރިކާ އިން އީރާން އަށް ހަމަލާ ތަކެއް ދިނެވެ. އެއީ އެވާ ލަވްލީ ނަމަކަށް ކިޔާ އުޅަނދަކަށް އީރާން އިން ދިން ހަމަލާ އަކަށް ރައްދު ދިނުމުގެ ގޮތުން ކަމަށް އެމެރިކާ އިން ބުނެފައިވެ އެވެ.