އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން އީރާނުގެ ކަނޑުގެ ސިފައިން އެ ސަރަހައްދުގައި ހުރި އެމެރިކާގެ އަސްކަރީ އަމާޒުތަކަށް ހަމަލާދީފި

އީރާނުގެ އައްސޭރިފަށުގެ ސަރަހައްދުތަކަށް އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ކަނޑުގެ ސިފައިން އެ ސަރަހައްދުގައި ހުރި އެމެރިކާގެ އަސްކަރީ އަމާޒުތަކަށް ހަމަލާދީފި އެވެ.

ހުކުރު ދުވަހު ނެރުނު ބަޔާނެއްގައި އައި.އާރް.ޖީ.ސީ އިން ބުނީ، ބަދަލުހިފުމުގެ ގޮތުން ދިން މި ހަމަލާތައް އަމާޒުކޮށްފައިވަނީ އެ ސަރަހައްދުގައި ގާއިމުވެފައިވާ "އެމެރިކާގެ ޓެރަރިސްޓް އަސްކަރިއްޔާގެ މަރުކަޒުތަކަށް" ކަމަށެވެ.

އެ ބަޔާނުގައި ފާހަގަކޮށްފައިވާ ގޮތުގައި، މި ބަދަލުހިފުމުގެ ހަމަލާ ދީފައިވަނީ އެމެރިކާއިން ވެފައިވާ އިގުރާރުތަކާ ޚިލާފުވުމުގެ ސިޔާސަތުގެ ދަށުން، އީރާނުގެ އައްސޭރިފަށުގެ ސަރަހައްދުތަކަށް އެމެރިކާގެ ސިފައިން ވައިގެ މަގުން ދިން ހަމަލާތަކާ ގުޅިގެންނެވެ. އެމެރިކާއިން މި ހަމަލާތައް ދީފައިވަނީ ހުރްމުޒް ކަނޑުއޮޅިން ހުއްދަނޫން މަގަކުން އުޅަނދެއް ދަތުރުކުރުން ފަދަ އެކި ބަހަނާތައް ދެއްކުމަށްފަހު ކަމަށްވެސް އެ ބަޔާނުގައިވެއެވެ.

މީގެ ކުރިން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ވަނީ އީރާނުގެ ބައެއް އަމާޒުތަކަށް ހަމަލާދީފައިވާ ކަމަށް ރިޕޯޓްކޮށްފަ އެވެ.

ހުޅަނގު އޭޝިއާ ސަރަހައްދުގައި ހަރަކާތްތެރިވާ އެމެރިކާގެ ސިފައިން ބަލަހައްޓާ ސެންޓްކޮމް އިން ބުނި ގޮތުގައި، އެމެރިކާއިން ހަމަލާ ދިނީ ބުރާސްފަތި ދުވަހު ސިންގަޕޫރުގެ ދިދަ ޖަހާފައިވާ "އެމް.ވީ އެވަރ ލަވްލީ" ނަމަކަށް ކިޔާ މުދާ އުފުލާ އުޅަނދަކަށް ޑްރޯން ހަމަލާއެއް ދިނުމާ ގުޅިގެންނެވެ. އެމެރިކާއިން ތުހުމަތުކުރާ ގޮތުގައި މި ހަމަލާ ދީފައިވަނީ އޮމާންގެ އައްސޭރިފަށުން ހުރްމުޒް ކަނޑުއޮޅިން އެ އުޅަނދު ނުކުންނަނިކޮށެވެ.

އަސްކަރީ ނޫން އަމާޒުތަކަށް ހަމަލާދޭ ކަމަށް ކުރެވޭ ހުރިހާ ތުހުމަތުތަކެއް އީރާނުން އަބަދުވެސް ދޮގުކުރެ އެވެ. އަދި އީރާނުގެ ބޮލުގައި އިލްޒާމް އެޅުވުމަށްޓަކައި "ފޯލްސް ފްލެގް" ނުވަތަ އަމިއްލައަށް ރާވައިގެން ހިންގާ އޮޕަރޭޝަންތަކާ މެދު އީރާނުން ވަނީ އިންޒާރު ދީފަ އެވެ.

އައި.އާރް.ޖީ.ސީ ގެ ކަނޑުގެ ސިފައިން ބުނި ގޮތުގައި، އެމެރިކާއިން ދަނީ އެކި ގޮތްގޮތުން އުދުވާނީ އަމަލުތައް ހިންގައި، ދެ ފަރާތުގެ ދެމެދުގައި ފަހުން ސޮއިކުރެވުނު ފަހުމުނާމާއާ ޚިލާފުވާން މަސައްކަތް ކުރަމުންނެވެ.

އިތުރު އުދުވާނީ އަމަލުތައް ނުހިންގުމަށް އިންޒާރު ދެމުން، އައި.އާރް.ޖީ.ސީ ގެ ބަޔާނުގައި ބުނެފައިވަނީ އެމެރިކާގެ އަމަލުތަކަށް މިހާރު ވާނީ އެކަށީގެންވާ ރައްދު ދީފައި ކަމަށެވެ. އަދި ކުރިއަށް އޮތް ތަނުގައިވެސް އެއްވެސް އުސޫލަކާ ޚިލާފުވެއްޖެނަމަ އަމަލުކުރާނީ ހަމަ މިފަދައިން ކަމަށް ބުނެފައިވެ އެވެ.

"މިފަދަ އުދުވާނީ އަމަލެއް ތަކުރާރުކޮށްފިނަމަ، އަހަރެމެންގެ ރައްދު މިހާރަށްވުރެ މާ ވަރުގަދަވާނެ،" ބަޔާނުގައިވެ އެވެ.

މި ފަހުމުނާމާގައި ސޮއިކުރުމުގެ ކުރިން، އޭޕްރިލް 7 ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވަނީ ހަނގުރާމަ ހުއްޓާލުމެއް އިއުލާން ކުރައްވާފަ އެވެ. އެއީ އެމެރިކާ އާއި އިސްރާއީލުން އީރާނާ ދެކޮޅަށް ހިންގި އުދުވާނީ އަމަލުތަކަށް ފަހުގަ އެވެ.

އެ އިއުލާނަށްފަހުވެސް އެމެރިކާއިން ތަކުރާރުކޮށް ހަނގުރާމަ ހުއްޓާލުމުގެ އެއްބަސްވުމާ ޚިލާފުވަމުންދާއިރު، ކޮންމެ ފަހަރަކުވެސް އީރާނުން ދަނީ ވަރުގަދަ ރައްދު ހަމަލާތަކެއް ދެމުންނެވެ.