ހަމަލާ ހުއްޓާލުމުގެ އެއްބަސްވުމާ ޚިލާފަށް ޣައްޒާ ސިޓީގެ އިރުމަތީ ސަރަހައްދާއި ރަފަހް އަދި ދީރު އަލް-ބަލާހް ސިޓީއަށް ހަމަލާތައް ދީފައިވާއިރު، ޚާން ޔޫނިސް އާއި ޣައްޒާ ސިޓީގެ އަވަށްތަކަށް ބަޑިޖަހައި އިމާރާތްތަކެއް ތަޅާލާފައިވޭ.
ޣައްޒާގެ ޖަބާލިއާގެ ހުޅަނގުން ނަގާފައިވާ މި ފޮޓޯއިން ފެންނަނީ ޑިސެމްބަރު 24، 2025 ގައި އިޒްރޭލުގެ އަސްކަރިއްޔާ އިން ބައިތު ލާހިޔާ އަށް ދިން ހަމަލާ އެއްގެ ސަބަބުން ދުން އަރަނިކޮށްނެވެ.
ހަމަލާ ހުއްޓާލުމުގެ އެއްބަސްވުމާއި ޚިލާފުވެ އިޒްރޭލުން ޣައްޒާގެ އެކި ހިސާބުތަކަށް ވައިގެ ހަމަލާތަކާއި ބަޑީގެ ހަމަލާތަކެއް ދީފި އެވެ.
ފަލަސްތީނުގެ މީޑިއާ ތަކުން އެ ސަރަހައްދުގެ މަސްދަރުތަކުން ލިބުނު މައުލޫމާތުތަކާ ހަވާލާދީ ބުނެފައި ވަނީ، ބުރާސްފަތި ދުވަހުގެ ހެނދުނު އިޒްރޭލުގެ ބަޑީގެ ޔުނިޓްތަކުން ޣައްޒާ ސިޓީގެ އިރުމަތީ ގެ ސަރަހައްދަކަށް ބަޑީގެ ހަމަލާތައް ދީފައިވާ ކަމަށެވެ.
މި ހަމަލާތަކުގައި އާންމު ރައްޔިތުންނަށް ލިބުނު ގެއްލުންތަކާއި، ހަމަލާތަކުގެ ސަބަބުން ލިބުނު ގެއްލުންތަކުގެ މިންވަރު އަދި ދެނެގަނެވިފައި ނުވެއެވެ.
މީގެ އިތުރުން އިޒްރޭލުގެ ހަނގުރާމަމަތީ ބޯޓުތަކުން ރަފަހް ގެ އިރުމަތީ ހިސާބުތަކަށް ބޮޑެތި ހަމަލާތައް ވެސް ދީފައިވެއެވެ. ރަފަހް އަކީ ޣައްޒާގެ ދެކުނުގައި މިސްރުގެ ބޯޑަރާ ކައިރީގައި އޮންނަ ސަރަހައްދެކެވެ.
ޣައްޒާގެ މެދުތެރޭގައި އޮންނަ ދީރު އަލް-ބަލާހް ސިޓީގެ އިރުމަތީ ސަރަހައްދަށް އިޒްރޭލުން ވައިގެ ހަމަލާއެއް ދީފައިވާ ކަމަށް އެ ސަރަހައްދުގެ އާންމުން ވެސް ރިޕޯޓްކޮށްފައިވެއެވެ.
އިމަޖެންސީ ޚިދުމަތްތަކުން ބުނާ ގޮތުގައި، މި ހަމަލާގައި އެއްވެސް މީހަކަށް އަނިޔާ އެއް ލިބިފައެއް ނުވެއެވެ.
އޭގެ އިތުރުން އިޒްރޭލު ސިފައިން ވަނީ ޚާން ޔޫނިސް އަދި ޣައްޒާ ސިޓީގެ އަވަށްތަކަށް ބަޑިޖަހާފައި ކަމަށާއި، ޚާން ޔޫނިސް ގައި ފަލަސްތީނު ރައްޔިތުންގެ އިމާރާތްތަކެއް ތަޅާލާފައިވާ ކަމަށް ވެސް މީޑިއާ ރިޕޯޓުތައް ބުނެ އެވެ.
