ޣައްޒާ ގެ ސުލްހައިގެ އެއްބަސްވުމުގެ ފުރަތަމަ ފިޔަވަހި ކާމިޔާބު ކަމަށް އެމެރިކާ އިން ބުނި ނަމަވެސް އިޒްރޭލުން ހިންގާ ޖަރީމާތަކަށް ހުއްޓުމެއް ނެތް

ޣައްޒާ ގެ ހަނގުރާމަ ހުއްޓާލުމުގެ އެއްބަސްވުމުގައިވާ "ދެވަނަ ފިޔަވަހި" ތަންފީޒުކުރުމާ ބެހޭގޮތުން އެމެރިކާގެ އިސްނެގުމުގެ ދަށުން ބޭއްވި ޑިޕްލޮމެޓިކް ބައްދަލުވުމެއްގައި ފުރަތަމަ ފިޔަވަހި ކާމިޔާބު ކަމަށް އެމެރިކާ އިން ސިފަކޮށްފި އެވެ.

ފުރަތަމަ މަރުހަލާ ކާމިޔާބު ކަމަށް ބުނި  ނަމަވެސް، އިޒްރޭލް ސަރުކާރުން ޣައްޒާ ގައި ހިންގަމުން ގެންދާ ނަސްލު ނައްތާލުމުގެ ޖަރީމާތައް ހުއްޓުމެއް ނެތި ދަނީ ކުރިއަށެވެ. 

ހޮނިހިރު ދުވަހު، އެމެރިކާ އިން އެ ސަރަހައްދަށް ކަނޑައަޅާފައި ހުންނަ އެންވޯއި ސްޓީވް ވިޓްކޮފް އެކްސްގައި، އިއުލާންކުރެއްވި ގޮތުގައި އެމެރިކާ، މިސްރު، ޤަތަރު އަދި ތުރުކީ ތަމްސީލު ކުރި މަންދޫބުންނާ އެކު މިއާމީ ގައި ބައްދަލުކޮށް އޮކްޓޯބަރު މަހުގެ ކުރީކޮޅު އިޒްރޭލް އާއި ހަމާސް އާ ދެމެދު ހަދާފައިވާ ހަނގުރާމަ ހުއްޓުމުގެ އެއްބަސްވުމުގެ ފުރަތަމަ ފިޔަވަހި ތަންފީޒުކުރުން ވަނީ މުރާޖައާ ކޮށްފަ އެވެ.

ވިޓްކޮފް ވިދާޅުވީ މި ބައްދަލުވުމުގައި "ދެވަނަ ފިޔަވަހި" ތަންފީޒުކުރުމަށް ތައްޔާރުވުމަށް ފޯކަސްކޮށްފައިވާ ކަމަށާއި، ފުރަތަމަ ފިޔަވަހީ ގައި ހިމެނިފައި ވަނީ އޭނާ ވިދާޅުވާ ގޮތުން އިންސާނީ އެހީތެރިކަން ފޯރުކޮށްދިނުމާއި، ޣައްޒާ ގައި ތިބި އިޒްރޭލުގެ ރަހީނުން އަނބުރާ ގެނައުމާއި، އިޒްރޭލުގެ ބައެއް ސިފައިން އަނބުރާ ގެންދިއުމާއި، އަދި ހަނގުރާމައިގެ އަމަލުތައް ކުޑަކުރުން ކަމަށެވެ.

"ފުރަތަމަ ފިޔަވަހިން ކުރިއެރުން ލިބިފައިވެއެވެ،" ވިކްޓޮފް ވިދާޅުވިއެވެ. އެހެން ނަމަވެސް އިޒްރޭލު ސަރުކާރުން ކޮންމެ ދުވަހަކު ކަހަލަ ގޮތަކަށް ޣައްޒާ ގައި ކުރިއަށް ގެންދާ މީހުން މެރުމުގެ ޖަރީމާ ތަކަށް އެއްޗެއް ވިދާޅުވެފަ އެއް ނުވެ އެވެ. 

ޑޮނަލްޑް ޓްރަމްޕް ހުށަހެޅެއްވި 20 ޕޮއިންޓް ޕްރޮޕޯސަލްގެ ބައެއްގެ ގޮތުގައި ސޮއިކުރި އެއްބަސްވުމާ ޚިލާފުވެ ފަލަސްތީނުގެ އެތައް ސަތޭކަ މީހުން މަރާލާފައިވާއިރު، އެމެރިކާގެ ރައީސް ވިދާޅުވާ ގޮތުން މި ޕްރޮޕޯސަލްގެ މަޤްސަދަކީ އިޒްރޭލް ސަރުކާރުން އެ ސަރަހައްދުގައި ހިންގާ ނަސްލު ނައްތާލުމުގެ ހަނގުރާމަ ނިންމުމެވެ.

ވިޓްކޮފް ވިދާޅުވީ "ދެވަނަ ފިޔަވައްސާ" ބެހޭ މަޝްވަރާތަކުގައި ބައިވެރިން ފާހަގަކުރީ "އާންމުންނަށް ރައްކާތެރިކަން ދިނުމަށާއި އާންމު ނިޒާމު ބެލެހެއްޓުމަށް ގުޅިފައިވާ  އޮތޯރިޓީއެއްގެ ދަށުން ޣައްޒާ ގައި ވެރިކަން ކުރާ "ބޮޑީއެއް" އުފެއްދުން ކަމަށެވެ.

އޭނާ ވިދާޅުވީ މި ބައްދަލުވުމުގައި "ވިޔަފާރި އަށް މަގު ފަހި ކުރުމާއި، އިންފްރާސްޓްރަކްޗަރ ތަރައްޤީކުރުމާއި، އަދި ހަކަތަ އާއި ފެނުގެ ވަސީލަތްތައް ފޯރުކޮށްދިނުމާ ބެހޭ ވާހަކަތައް،" ދެކެވުނު ކަމަށެވެ.

މި ފްރޭމްވޯކްގެ ތެރޭގައި، ޕާޓީތަކުން ތާއީދުކުރީ އާންމުންގެ ކަންކަން ބެލެހެއްޓުމަށާއި، ސެކިއުރިޓީ، އަދި ޣައްޒާ އަލުން އިމާރާތްކުރުމުގެ މަސައްކަތްތައް ބަލަހައްޓާ "ވަގުތީ ސަރުކާރެއް" ގެ ދައުރު އަދާކުރާ "ބޯޑް އޮފް ޕީސް" އަވަހަށް ގާއިމުކުރުމަށް ކަމަށް އެންވޯއީ ވިދާޅުވި އެވެ.

އޭނާ ވިދާޅުވީ މި ބައްދަލުވުމުގައި ޓްރަމްޕް ހުށަހަޅުއްވާފައިވާ "ކޮމްޕްރިހެންސިވް ޕީސް ޕްލޭން ފޯ ގާޒާ"  ތަންފީޒުކުރުމަށް ދެން އޮތް ފިޔަވަހިތައް ރިވިއުކޮށްފައިވާ ކަމަށާއި، 20 ޕޮއިންޓް ހިމެނޭ އެ ޕްލޭންގެ ހުރިހާ ބައެއްގައި ވެސް ކޮމިޓްމަންޓް އަލުން ކަށަވަރުކޮށްފައިވާ ކަމަށާއި، އަންނަ ހަފްތާތަކުގައި އިތުރު މަޝްވަރާތައް ރާވާފައިވާ ކަމަށެވެ.

އދ.ގެ ސެކިއުރިޓީ ކައުންސިލުން ވަނީ އެ ޕްލޭން އެންޑޯޒް ކުރުމުގެ ގޮތުން ރެޒޮލިއުޝަން 2803 ފާސްކޮށްފައެވެ. މި ގަރާރު ފާސްވީ 13 ގައުމަކުން ތާއީދު ކޮށްގެންނެވެ. ރަޝިއާ އަދި ޗައިނާ ވަކި ކޮޅަކަށް ވޯޓު ދީފަ އެއް ނުވެ އެވެ.

މި ޕްލޭން އަށް ފަލަސްތީނާއި ހައްޤުތަކަށް ވަކާލާތުކުރާ ފަރާތްތަކުން ފުޅާ ދާއިރާއެއްގައި ފާޑުކިޔާފައިވާއިރު، އެމީހުން ދެކޭގޮތުގައި މިއީ އިޒްރޭލު ކޮޅަށް ބުރަވެފައިވާ، އަދި ޣައްޒާ ގައި ހިންގި ޖަރީމާތަކަށް ދޭ އިނާމެކެވެ.

ހަނގުރާމައިގެ ތެރޭގައި، ހަނގުރާމަ ހުއްޓާލުމަށް ގޮވާލާ ސެކިއުރިޓީ ކައުންސިލް އަށް ހުށަހެޅި ހަ ގަރާރެއް އެމެރިކާ އިން ވީޓޯ ކޮށްފައިވާ އިރު، އެމެރިކާ އިން ވަނީ އިޒްރޭލާ ދެކޮޅަށް އަޅާ ކޮންމެ ފިޔަވަޅަކަށް ފާޅު ގައި ހުރަސް އެޅުމުގެ ރެކޯޑެއް ދަމަހައްޓާފަ އެވެ.