އިސްލާޙު ބޭނުން ވަނީ އިސްރާއީލް ގެ ސަރުކާރަށް ކަމަށާއި، ފަލަސްޠީނު ސަރުކާރަށް ނޫން ކަމަށް ސައުދީ އަރަބިއްޔާ ގެ އިސް ޑިޕްލޮމަޓެއް ކަމަށްވާ މަނާލް ރަދްވާން ވިދާޅުވެއްޖެ އެވެ.

ސައުދީ ގެ ފޮރިން މިނިސްޓްރީގެ އިސް އޮފިޝަލެއްގެ ގޮތުގައި ހުންނެވި މަނާލް ވިދާޅުވީ، ފަލަސްޠީނު އޮތޯރިޓީ އިން އިސްލާޙީ މަސައްކަތްތަކަށް ވަރަށް ބޮޑަށް މަސައްކަތް ކުރަމުން އަންނަ ކަމަށެވެ. ނަމަވެސް، އިސްރާއީލް ސަރުކާރުގެ އޮފިޝަލުން ސުލްޙަ އަށް ދިޔުމުގެ ހުރިހާ މަގަކަށް ހުރަސް އަޅަމުން އަންނަ ކަމަށް އޭނާ ފާހަގަ ކުރެއްވި އެވެ.

ހޮނިހިރު ދުވަހު ކުރިއަށް ދިޔަ ޤަތަރު ގެ ދޯހާ ފޯރަމް ގައި ބޭއްވި ޕެނަލް ޑިސްކަޝަނެއް ގައި ވާހަކަ ދައްކަވަމުން އޭނާ ވިދާޅުވެފައި ވަނީ، ފާއިތުވި 30 އަހަރު ވަންދެން އިސްލާޙު ގެނެސްފައިވާ ކަމަށެވެ. އަދި ފަލަސްޠީނު އޮތޯރިޓީގެ ރައީސް މަޙުމޫދު އައްބާސް، އިސްލާޙީ ޕްލޭނަކަށް ވައުދުވެ ވަޑައިގެންފައިވާ ކަމަށް ވެސް އޭނާ ވިދާޅުވި އެވެ. އޭނާ ވިދާޅުވީ އެކަމަށް ވައުދުވެ ވަޑައިގެންފައި ވަނީ، އެއީ ފަލަސްޠީނުގެ ރައްޔިތުންނަށް ފައިދާ ހުރި ކަމެއް ކަމަށް ދެކެވަޑައިގަންނަވާތީ ކަމަށެވެ.

އިތުރަށް ވާހަކަ ދައްކަވަމުން އޭނާ ވިދާޅުވީ ސައުދީ އަރަބިއްޔާ އިން އެކަމުގައި ވަރަށް ގާތުން މަސައްކަތް ކުރަމުން އަންނަ ކަމަށެވެ. އެގޮތުން ގާތް ގަނޑަކަށް ކޮންމެ ދުވަހަކު ވެސް، ފަލަސްޠީނުގެ އޮތޯރިޓީ އާއެކު އިސްލާޙީ ޕްލޭނަށް އެހީތެރިވުމަށް މަސައްކަތް ކުރަމުން އަންނަ ކަމަށް ވިދާޅުވި އެވެ.

ނަމަވެސް އޭނާ ވިދާޅުވީ ސައުދީ އަރަބިއްޔާ އިން ވެސް ބޭނުން ވަނީ ދެމެހެއްޓެނިވި ސުލްޙަ އާއި، ސަލާމަތް ކަމަށެވެ. އަދި ހަނގުރާމަ އެއްކޮށް ނިންމަން ބޭނުންވާ ކަމަށާއި، އެމެރިކާގެ ރައީސް ޑޮނަލްޑް ޓްރަމްޕްގެ ސުލްޙައިގެ ޕްލޭން ތަންފީޒު ކުރުމަށާއި، ސަލާާމަތީ މަޖިލީހު ގެ ޤަރާރު ތަންފީޒު ކުރުމަށް އެދޭ ކަމަށް ފާހަގަ ކުރައްވައި އޭނާ ވިދާޅުވީ، އިސްލާޙު ގެންނަންވީ އިސްރާއީލް ގެ ސަރުކާރަށް ކަމަށެވެ.

އެ ފޯރަމްގައި މަނާލް ވަނީ އިސްރާއީލް ސަރުކާރު ގެ ސިޔާސަތު ތަކަށް ވަރަށް ބޮޑަށް ފާޑު ވިދާޅުވެފަ އެވެ. އެގޮތުން މިހާރު އޮތީ، ދެ ދައުލަތުގެ ޙައްލާ ދެކޮޅު ހަދާ އިސްރާއީލް ގެ ސަރުކާރެއް ކަމަށް އޭނާ ވިދާޅުވި އެވެ. އަދި ހަމަ އެހެންމެ، މިހާރު އޮތް އިސްރާއީލް ގެ ސަރުކާރަކީ ފަލަސްޠީނާއި، އަރަބިން އަދި މުސްލިމުންނާ ދެކޮޅަށް ދެމެހެއްޓެނިވި ގޮތެއްްގައި ހަމަލާދޭ ސަރުކާރެއް ކަމަށް ވެސް އޭނާ ވިދާޅުވި އެވެ.

އެކަންކަން ފާހަގަ ކުރައްވައި އޭނާ ވިދާޅުވީ، ސުލްޙަ އަށް ބޭނުންވާ ބައިވެރިއެއް މިހާރު ފެންނަން ނެތް ކަމަށެވެ. އަދި ދާއިމީ ހުއްޓުމަކަށާއި، ދެމެހެއްޓެނިވި ޙައްލަކަށް ބައިވެރިވާނެ، އަދި އެ ގޮތް ބޭނުންވާ ބައިވެރިއެއް ވެސް ނުފެންނަ ކަމަށް ވިދާޅުވި އެވެ. އެހެންކަމުން، ސައުދީ އަރަބިއްޔާ އިން އުންމީދު ކުރަމުން އަންނަނީ ހަގީގީ އަދި މުހިންމު އިސްލާޙެއްގެ ފެށުމަށް ކަމަށް އޭނާ ވިދާޅުވެފައިވެ އެވެ.

މަނާލް ވިދާޅުވީ ސައުދީ އަރަބިއްޔާ ގެ ވިސްނުން ދިގު މުއްދަތަކަށް ވަރަށް ސާފުކޮށް އޮތް ކަމަށެވެ. އެގޮތުން ފަލަސްޠީނުގެ ދައުލަތެއް ޤާއިމު ނުވާ ޙާލަތެއްގައި، އިސްރާއީލް އާއެކު ގުޅުން ޤާއިމުކޮށް، އެ ގުޅުން އާންމު ޙާލަތަކަށް ނުގެނެވޭނެ ކަމަށް ވެސް އޭނާ ވިދާޅުވި އެވެ. އެއީ ސައުދީ އަރަބިއްޔާ އިން އަބަދު ވެސް ބުނަމުން އަންނަ ވާހަކައެއް ކަމަށް އޭނާ ފާހަގަ ކުރެއްވި އެވެ.

ހަމަ އެހެންމެ، އޭނާ ވިދާޅުވެފައި ވަނީ ފަލަސްޠީނުގެ ރައްޔިތުންގެ ސަލާމަތާާއި ސިޔާސީ އުންމީދުތައް ފުއްދައި ނުދީފި ނަމަ، އިސްރާއީލް އަދި ސަރަހައްދުގެ ބާކީ ޤައުމު ތަކަށް ވެސް، އަދި މުޅި ދުނިޔެ އަށް ވެސް ސަލާމަތެއް ނުލިބޭނެ ކަމަށެވެ.

ސައުދީގެ ފޮރިން މިނިސްޓްރީގެ އިސް އޮފިޝަލެއްގެ ގޮތުގައި ހުންނެވި މަނާލް މިހެން ވިދާޅުވެފައިވާއިރު، ސައުދީގެ ވަލީ އަޙުދު މުޙައްމަދު ބިން ސަލްމާން ވެސް ވަނީ އެ ވާހަކަތައް މީގެ ކުރިން ދައްކަވާފައި ކަމަށް ރިޕޯޓުތައް ބުނެ އެވެ. އެގޮތުން އެންމެ ފަހުން އެމެރިކާގެ ރައީސް ޓްރަމްޕް އާއެކު އޮތް ބައްދަލުވުމުގައި ސައުދީގެ ވަލީ އަޙުދު އެ ވާހަކަތައް ދައްކަވާފައިވާ ކަމަށް ބުނެފައިވެ އެވެ.