އިޒްރޭލުން ޣައްޒާ ގެ ސްކޫލް އިމާރާތަކަށް ހަމަލާދީ ފަލަސްތީނުގެ ހަތް މީހުން ޝަހީދު ކޮށްލައިފި

އިޒްރޭލުން ހުކުރު ދުވަހު ޣައްޒާ ގެ ސްކޫލް އިމާރާތަކަށް ހަމަލާދީ ފަލަސްތީނުގެ ހަތް މީހުން ޝަހީދު ކޮށްލައިފި އެވެ.

ވަގުތީ ހިޔާވެއްސެއްގެ ގޮތުގައި ބޭނުން ކުރާ މި އިމާރާތައް ދިން ހަމަލާ ގައި އެތައް ބަޔަކު ވަނީ ޒަޚަމްވެފަ އެވެ.

ހަމަލާގެ ބާރު ގަދަ ކަމުން ބައެއް މީހުންގެ ހަށިތައް ކުދިކުދިވެފައިވާ ކަމަށް ލޯކަލް ރިޕޯޓުތައް ބުނެ އެވެ.

އޮކްޓޯބަރު 10 ގައި ޣައްޒާ ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށުމަށްފަހު، އިޒްރޭލުން މަދުވެގެން 738 ފަހަރު އެއްބަސްވުމާ ޚިލާފުވެފައިވާ ކަމަށް ޣައްޒާ ސަރުކާރުގެ މީޑިއާ އޮފީހުން ބުނެފައިވެއެވެ.

އިޒްރޭލުން 205 ފަހަރު އާންމުންނަށް ބަޑިޖަހާފައިވާ ކަމަށާއި، މީހުން ދިރިއުޅޭ ސަރަހައްދުތަކަށް 37 ފަހަރު ހަމަލާދީފައިވާ ކަމަށާއި، ޣައްޒާ އަށް 358 ފަހަރު ބޮމުގެ ހަމަލާ ދީފައިވާ ކަމަށާއި، 138 ފަހަރު މީހުންގެ ގެދޮރު ބިމާހަމަކޮށްފައި ކަމަށް އެ އޮފީހުން ބުނެފައިވެއެވެ.

ޣައްޒާ ގައި ހުންނަ ފަލަސްތީނުގެ ސިއްހަތާ ބެހޭ ވުޒާރާ އިން ބުނީ އޮކްޓޯބަރު 11، ގައި ހަނގުރާމަ ހުއްޓާލުމުގެ އެއްބަސްވުމަށް އަމަލު ކުރަން ފެށި ދުވަހުން ފެށިގެން އިޒްރޭލުގެ ހަމަލާތަކުގައި މަދުވެގެން 394 ފަލަސްތީނު މީހުން މަރުވެފައިވާ ކަމަށެވެ. އިތުރު 1،075 މީހުން ވަނީ ޒަހަމްވެފައެވެ.

ހަމާސްގެ ލީޑަރު ޣާޒީ ހަމާސް އަންގާރަ ދުވަހު ބުނީ އިޒްރޭލުން 813 އަށްވުރެ ގިނަ ފަހަރު އެއްބަސްވުމާ ޚިލާފުވެފައިވާ ކަމަށެވެ.

އެއްބަސްވުމަށް އަމަލުކުރަން ފެށުމަށްފަހު، ގާތްގަނޑަކަށް 400 މީހުން މަރުވެފައިވާ ކަމަށާއި، މަރުވި މީހުންގެ 95% އަށްވުރެ ގިނައީ އާންމުން ކަމަށް އޭނާ ވަނީ ފާހަގަކޮށްފައެވެ.

އޮކްޓޯބަރު 7، 2023 އިން ފެށިގެން ޣައްޒާ ގައި އިޒްރޭލުން ދިން ނަސްލު ނައްތާލުމުގެ ހަމަލާތަކުގައި 20،150 އަށްވުރެ ގިނަ ކުޑަކުދިން ހިމެނޭ ގޮތުން 70،600 އަށްވުރެ ގިނަ ފަލަސްތީނު ރައްޔިތުން މަރުވެފައިވެއެވެ.

ހުކުރު ދުވަހު ޣައްޒާ ސިޓީގައި ހުންނަ ސްކޫލަކަށް އިޒްރޭލުން ދިން އަނިޔާވެރި ހަމަލާ ހަމާސްއިން ވަނީ ކުށްވެރިކޮށްފައެވެ.

ހޮނިހިރު ދުވަހު ނެރުނު ބަޔާނެއްގައި، ހަމާސް އިން ބުނީ މިއީ ހަނގުރާމައިގެ ޖަރީމާ އެއް ކަމަށާއި އިޒްރޭލުގެ މި ކުށްތައް ހުއްޓުވުމަށް "ބައިނަލްއަގުވާމީ މުޖްތަމައު ހިމޭން ވެފައިވާ ކަމަށާއި އަދި ފެއިލްވެފައިވާކަން ވަނީ ފާހަގަކޮށްފައެވެ.