ހަމާސްގެ އިސް މަސްއޫލުވެރިޔަކު އުސާމާ ހަމްދާން ވިދާޅުވީ އެ ޖަމާއަތުން ބޭރުގެ ބާރަކަށް ހަތިޔާރު ދޫނުކުރާނެ ކަމަށާއި، އިޒްރޭލުން ހަނގުރާމަ ހުއްޓާލުމުގެ އެއްބަސްވުމަށް ޚިލާފުވަމުންދާ ކަމަށެވެ. އޭނާ ވިދާޅުވީ ޣައްޒާ ހިސޯރުކޮށް ބަންދުކޮށްފައި އޮތުން ދެމިގެންދިއުމަކީ އަލުން ޙަމަލާދިނުމުގެ ނިޔަތް އޮތް ކަމުގެ ދަލީލެއް ކަމަށާއި، އެމެރިކާއާއި އިޒްރޭލުން މި ސަރަހައްދުގައި ބާރުވެރިކަން ގާއިމް ކުރަން މަސައްކަތް ކުރަމުން ގެންދާ ކަމަށެވެ.
ފަލަސްތީނުގެ ރެސިސްޓެންސް މޫވްމަންޓް ހަމާސްގެ ސީނިއަރ އޮފިޝަލް އުސާމާ ހަމްދާން
ބޭރުގެ ބާރެއްގެ އަތްމައްޗަށް ހަމާސް އިން ހަތިޔާރު ދޫކޮށް ނުލާނެ ކަމަށް އެ ޖަމާއަތުގެ އިސް މަސްއޫލުވެރިޔަކު ވިދާޅުވެއްޖެ އެވެ.
އޭނާ އިތުރަށް ވިދާޅުވީ ބޭރުގެ ނުފޫޒުތައް ފަލަސްތީނުގެ މައްޗަށް ގަދަ ކުރަން އުޅުމުގެ ބަދަލު ގައި މުހިންމީ އިޒްރޭލާއެކު ހެދިފައިވާ ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ ކުރިއަށް ދާނެ ކަމުގެ ޔަގީންކަން ދިނުން ކަމުގަ އެވެ.
ޔަމަންގެ އަލް-މަސީރާ ޓީވީ އަށް އަންގާރަ ދުވަހު ދެއްވި ބަސްދީގަތުމެއްގައި، އުސާމާ ހަމްދާން ވަނީ ހަމާސް އިން ބޭރުގެ ބާރަކަށް އެ ޖަމާއަތުގެ ހަތިޔާރުތައް ދޫ ނުކުރާނެ ކަމަށް ވިދާޅުވެ، އަދި ބޭރުގެ ސިފައިން އެ ޖަމާއަތުގެ ހަތިޔާރު އަތުލުމަށް އައުމަކީ އެ ޖަމާއަތުން ބަލައިގަންނާނެ ކަމެއް ނޫން ކަމުގައެވެ. އޭނާ ވިދާޅުވީ، "ހަތިޔާރު ބެހެއްޓުމުގެ ޚިޔާލަކީ ހަމާސް އިން ޤަބޫލު ނުކުރާނެ ޚިޔާލެއް،" ކަމަށެވެ.
ހަމްދާން ވަނީ އިޒްރޭލާއެކު ހަދާފައިވާ ހަނގުރާމަ ހުއްޓާލުމުގެ އެއްބަސްވުމަށް އިޒްރޭލުން ޚިލާފުވަމުންދާކަން ފާހަގަ ކޮށް، އެ އެއްބަސްވުމުގެ ދެން އޮތް މަރުހަލާގެ ކަންކަން އިތުރަށް ސާފު ޔަގީންކަން ބޭނުންވާކަން ހާމަކޮށްފައެވެ.
"ޒަޔަނިސްޓު ދުޝްމަނުން އެއްބަސްވުންތަކަށް ތަބާނުވޭ، އަދި އެމީހުން ހަދާ ބައިނަލްއަޤްވާމީ އެއްބަސްވުންތަކަށް ވެސް ފާޅުގައި ޚިލާފުވަމުން ދަނީ،" އޭނާ ވިދާޅުވިއެވެ.
ޣައްޒާ އަށް އިޒްރޭލުން ދެމުންދާ ހަމަލާތައް ހުއްޓާލުމަށް އެއްބަސްވުމަށް ފަހު ވެސް ޣައްޒާ ގެ ހިސޯރު ދެމިގެން ދިއުމަކީ ހަނގުރާމަ އަލުން ފެށުމުގެ ސިގްނަލެއް ކަމަށް އޭނާ އިންޒާރު ދެއްވިއެވެ.
"ޣައްޒާ ބަންދުކޮށްފައި އޮތް އޮތުން ދެމިގެން ދިއުމަކީ އިޒްރޭލުގެ ފަރާތުން ޣައްޒާއަށް އަލުން ޙަމަލާދިނުމުގެ ނިޔަތް އޮތް ކަމުގެ ދަލީލެކެވެ،" ހަމްދާން ވިދާޅުވިއެވެ.
ޣައްޒާ ހިސޯރު ކޮށްގެން އެކަން ހަތިޔާރެއްގެ ގޮތުގައި ބޭނުންކުރުމުން ފަލަސްޠީނުގެ ހިތްވަރު ބަލިކަށިނުވާނެ ކަމަށް އޭނާ ވިދާޅުވިއެވެ.
ސަރަހައްދުގައި އިޒްރޭލާއި އެމެރިކާގެ ސިޔާސަތުތައް ކުށްވެރިކޮށް، ހަމްދާން ވަނީ އެ ސިޔާސަތުތަކަކީ ހުޅަނގު އޭޝިޔާގައި އަސްކަރީ ބާރުވެރިކަން ގާއިމް ކުރުމަށް ހިންގާ ބޮޑު ރޭވުމެއްގެ ބައެއް ކަމަށް ސިފަކޮށްފައެވެ.
"އެމެރިކާ އިން ބޭނުންވަނީ ސަރަހައްދުގައި އެމީހުންގެ ބާރުވެރިކަން ގާއިމްކުރަން، ޒަޔަނިސްޓު ދައުލަތަކީ މި ބާރުވެރިކަމުގެ ބިންގާ ކަމުގައި އޮވެގެން،" އޭނާ ވިދާޅުވިއެވެ. އަދި ހަމާސް ގެ ހަތިޔާރު އަތުލެވެމުން އިޒްރޭލަށް މުޅި ސަރަހައްދުގައި އެއްވެސް ހުރަހެއްނެތި ބާރު ހިންގުމުގެ ފުރުސަތު ލިބޭނެކަމަށް އޭނާ އިތުރަށް ވިދާޅުވިއެވެ.
ފަލަސްޠީނުގެ ރައްޔިތުންނާ ދެކޮޅަށް ދެމުންދާ ޙަމަލާތައް ހުއްޓާނުލާ ކުރިއަށްދިޔަ ކަމުގައިވިޔަސް، ހަމްދާން ވަނީ ފަލަސްޠީނުގެ ރައްޔިތުންގެ ކެތްތެރިކަމާއި ސާބިތު ކަމަށް އިތުބާރު ކުރައްވާ، "އަދި މި ހަނގުރާމައިގެ ނަތީޖާ އަކަށް ވާނީ އިޒްރޭލު ނެތިގެން ދިއުން ކަމަށް ޔަޤީން ކުރާ،" ކަމަށް އޭނާ ވިދާޅުވެފަ އެވެ.
ހަމާސް އާއި އިޒްރޭލާ ދެމެދު އެމެރިކާގެ ބައިވެރިވުމާއެކު ހަނގުރާމަ ހުއްޓާލުމުގެ އެއްބަސްވުމެއް ވަނީ 2025 ވަނަ އަހަރުގެ އޮކްޓޯބަރު 10 ގައި ވެވިފައެވެ. ފުރަތަމަ މަރުހަލާގެ ދަށުން، އިޒްރޭލުން ޣައްޒާއަށް ވަދެވޭ ހުރިހާ މަގުތަކެއް ހުޅުވާލައި، ކާބޯތަކެއްޗާއި އެހީތެރިކަން ފޯރުކޮށްދިނުމަށް އެއްބަސްވެފައިވާއިރު، ހަމާސްގެ ބާރުގެ ދަށުގައި ތިބި ހުރިހާ ރަހީނުން ދޫކޮށްލުމުގެ ބަދަލުގައި ހަނގުރާމަ ހުއްޓާލުމަށް ވަނީ އެއްބަސްވެފަ އެވެ.
