ތެޔޮ ހުސްވުމުގެ ސަބަބުން ޣައްޒާގެ މުހިންމު ހޮސްޕިޓަލްތައް ހުއްޓުމަކަށް

ޣައްޒާގެ މެދު ތެރޭގައި ހުންނަ މުހިންމު ހޮސްޕިޓަލަކުން ތެޔޮ ހުސްވުމުގެ ސަބަބުން، ގިނަ ޚިދުމަތްތައް ވަގުތީ ގޮތުން ހުއްޓާލަން މަޖުބޫރުވެފައިވާ ކަމަށް ހާމަ ކޮށްފި އެވެ. 

ދެ އަހަރަށް ވުރެ ދިގު މުއްދަތަކަށް ދެމިގެންދާ ހަނގުރާމައިގެ ސަބަބުން، މުޅި ޣައްޒާ ވަނީ އެއްކޮށް ފުނޑު ފުނޑުވެފަ އެވެ. އަދި ޣައްޒާގެ އިންސާނީ ޙާލަތު ވެސް ވަނީ އިންތިހާ އަށް ދަށްވެފަ އެވެ. 

ޣައްޒާގެ މެދު ތެރޭގެ ނުސައިރަތުގައި ހުންނަ އަލް އަވްދާ ހޮސްޕިޓަލް އިން ހުކުރު ދުވަހު ބުނެފައި ވަނީ، އެ ހޮސްޕިޓަލްގައި ގާތް ގަނޑަކަށް 60 މީހުންނަށް އެޑްމިޓް ކޮށްގެން ފަރުވާ ދެމުން އަންނަ ކަމަށެވެ. އަދި ކޮންމެ ދުވަހަކު ވެސް، ގާތް ގަނޑަކަށް 1000 މީހުން ފަރުވާ ހޯދުމަށް އަންނަ ކަމަށް ވަނީ ފާހަގަ ކޮށްފަ އެވެ. ޣައްޒާ ހަނގުރާމައިގެ ސަބަބުން މި ހޮސްޕިޓަލަށް ވަނީ ބޮޑެތި ގެއްލުން ތަކެއް ލިބިފަ އެވެ. 

އެ ހޮސްޕިޓަލް އިން ބުނެފައި ވަނީ، މިވަގުތު ހިންގަމުން އަންނަނީ އެންމެ މުހިންމު އަދި އެންމެ އިސްކަމެއް ދޭން ޖެހޭ ޑިޕާޓްމަންޓުތައް އެކަނި ކަމަށެވެ. އެއީ އިމަޖެންސީ ޔުނިޓާއި، މެޓާނިޓީ ވޯޑު އަދި ޕީޑިއެޓްރިކްސް ޑިޕާޓްމަންޓް އެވެ. 

އެތައް ގޮންޖެހުންތަކާ އެކު ހޮސްޕިޓަލް ހިންގަމުން އަންނައިރު، އެ ހޮސްޕިޓަލުގެ އޮފިޝަލަކު ބުނެފައި ވަނީ އެ ޚިދުމަތްތައް ދިނުމަށްޓަކައި ކުޑަ ޖަނެރޭޓަރެއް ކުއްޔަށް ހިފަން މަޖުބޫރުވެފައިވާ ކަމަށެވެ. އާންމު ޙާލަތުގައި އެ ހޮސްޕިޓަލަށް ކޮންމެ ދުވަހަކު ވެސް، 1000 އާއި 2000 އާ ދެމެދުގެ ލީޓަރުގެ ޑީސަލް ބޭނުންވާއިރު، މިހާރު ހުރީ 800 ލީޓަރު ކަމަށް ވެސް ބުނެފައިވެ އެވެ. 

އެ ހޮސްޕިޓަލުގެ އޮފިޝަލު ބުނެފައި ވަނީ މިވަގުތު ކުރިމަތި ވެފައި ވަނީ ވަގުތީ ހުއްޓުމެއް ކަމަށާއި، އެއީ ތެޔޮ ލިބުމާ ގުޅިފައިވާ ކަމެއް ކަމަށެވެ. އެކަން ފާހަގަކޮށް އޭނާ ވަނީ އެ ހޮސްޕިޓަލް ހިންގުމަށް ބޭނުންވާ ތެޔޮ ލިބޭނެ އިންތިޒާމެއް ހަމަޖައްސައި ދިނުމަށް އެދިފަ އެވެ. ތެޔޮ ހުސްވުން ދިގު ލައިގެން ގޮސްފި ނަމަ، އަސާސީ ޚިދުމަތްތައް ފޯރުކޮށްދިނުމުގައި ހޮސްޕިޓަލަށް ސީދާ ގޮތުން ނުރައްކާތައް ކުރިމަތިވާނެ ކަމަށް ބުނެފައިވެ އެވެ. 

ނުސައިރަތު ސަރަހައްދުގައި ހިމާޔަތް ހޯދާފައިވާ އުމުރުން 30 އަހަރުގެ ޚިތާމް އަޔާދާ ބުނީ، ކިޑްނީގެ މައްސަލަ އޭނާ ގެ ހުންނަ ކަމަށާއި، ރިއްސާތާ ދުވަސް ކޮޅެއް ވެފައިވާތީ އެ ހޮސްޕިޓަލަށް ދިޔަ ކަމަށެވެ. އެކަމަކު، ޚިދުމަތް ހޯދުމުގައި އެތައް އުނދަގޫ ތަކެއް ދިމާވި ކަމަށާއި، އެކްސްރޭ ނެގުމަށް ކަރަންޓު ނެތް ކަމަށް ފާހަގަ ކުރި އެވެ. އޭނާ ބުނީ، ފަރުވާ ހޯދޭނެ އެއްވެސް ގޮތެއް ނެތް ކަމަށެވެ. 

އެއާ އެކު ރިހުން ކުޑަ ކުރުމަށް އޭނާ އަށް ބޭހެއް ދީފައިވާ ކަމަށާއި، ބޭސް ބޭނުން ކޮށްގެން ރިހުން ކުޑަ ނުވާ ނަމަ، އެހެން ހޮސްޕިޓަލަކަށް ދިޔުމަށް އެދިފައިވާ ކަމަށް އޭނާ ބުންޏެވެ. އިތުރަށް އޭނާ ބުނެފައި ވަނީ، އެ މީހުންގެ ދިރިއުޅުމަށް ބޭނުންވާ އެއްވެސް އެއްޗެއް ނެތް ކަމަށާއި، އެންމެ ކުޑަ މިނުން އަސާސީ ޚިދުމަތް ލިބޭނެ މިންވަރު ވެސް ނެތް ކަމަށެވެ. 

މިއަހަރުގެ އޮކްޓޫބަރު މަހުގެ 10 ވަނަ ދުވަހު ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައި ވީ ނަަމަވެސް، ޣައްޒާގެ އިންސާނީ ޙާލަތު ވަނީ އިންތިހާ އަށް ދަށްވެފަ އެވެ. އެއްބަސްވުމުގެ ދަށުން، ޣައްޒާ އަށް ކޮންމެ ދުވަހަކު 600 އެހީގެ ލޮރީ ވަންނަން ވާނެ ކަމަށް ބުނެފައި ވީ ނަމަވެސް، މިހާރު ޣައްޒާ އަށް ދުވާލަކު ވަންނަމުން އަންނަނީ 100 އާއި 300 އާ މެދުގެ އެހީގެ ލޮރީ ކަމަށް ބުނެފައިވެ އެވެ. 

ހަނގުރާމައިގެ ސަބަބުން އެންމެ ބޮޑު ގެއްލުމެއް ލިބުނު އެއް ދާއިރާ އަކީ ޣައްޒާގެ ޞިއްޙީ ދާއިރާ އެވެ. ހަނގުރާމައިގެ ތެރޭގައި އިސްރާއީލްގެ ސިފައިން ވަނީ ޣައްޒާގެ ހޮސްޕިޓަލުތަކާއި، ޞިއްޙީ ޚިދުމަތް ދޭ ތަންތަނަށް ވެސް ހަމަލާ ދީފަ އެވެ. އެއީ ހަމާސް ޖަމާއަތުން އެ ތަންތަނުގައި ކޮމާންޑު ސެންޓަރުތައް ހިންގާ ކަމަށް ތުހުމަތު ކޮށްފަ އެވެ. ނަމަވެސް ހަމާސް އިން ވަނީ އެކަން ދޮގު ކޮށްފަ އެވެ.