ޣައްޒާއަށް އިސްރާއީލުން ދިން ޑްރޯން ހަމަލާއެއްގައި އާންމުންގެ ތިން މީހަކު ޝަހީދުވެއްޖެ
29 ޖޫން 2026 | ހޯމަ 14:39ޣައްޒާގެ ދީރުލް ބަލާހަށް އިސްރާއީލުން ދިން ޑްރޯން ހަމަލާއެއްގައި އާންމުންގެ ތިން މީހަކު މަރުވެފައިވާއިރު، މިއީ ޓެރަރިސްޓުންނަށް އަމާޒުކޮށް ދިން ހަމަލާއެއް ކަމަށް އިސްރާއީލް އަސްކަރިއްޔާއިން ވަނީ ބުނެފައި. ހަނގުރާމަ ހުއްޓާލުމުގެ އެއްބަސްވުމާ ޚިލާފުވަމުންދާ ކަމުގެ ތުހުމަތު ދެފަރާތުން ކުރަމުންދާއިރު، މިދިޔަ އޮކްޓޯބަރު މަހުން ފެށިގެން ޣައްޒާއިން މަރުވި މީހުންގެ އަދަދު ވަނީ 1،041 އަށް އަރާފައި
ޣައްޒާގެ ދީރުލް ބަލާހްގައި 2026 ޖޫން 27 ވަނަ ދުވަހު އިޒްރޭލުން ދިން ހަމަލާތަކާ ގުޅިގެން އެ ސަރަހައްދުން ދުން އަރަމުންދަނީ. | ގެޓީ އިމޭޖަސް
އިސްރާއީލާއި ހަމާސްއާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ގާއިމުކޮށްފައިވީ ނަމަވެސް، ފަލަސްތީނުގެ ޣައްޒާއަށް އިސްރާއީލުން ދެމުންދާ ހަމަލާތަކުގެ ތެރެއިން ހޯމަ ދުވަހު ދިން ޑްރޯން ހަމަލާއެއްގައި އާންމުންގެ ތިން މީހަކު ޝަހީދުވެ، އިތުރު ބަޔަކު ޒަޚަމްވެފައިވާ ކަމަށް ގައްޒާގެ ސިއްހީ އިދާރާތަކުން ބުނެފިއެވެ.
ހަނގުރާމަ ދާއިމީކޮށް ހުއްޓާލުމަށް ކުރެވޭ މަސައްކަތްތަކަށް ކުރިއެރުމެއް ނުލިބި މަޑުޖެހިފައިވާއިރު، އިސްރާއީލާއި ހަމާސްއިން ދަނީ އެއްބަސްވުމާ ޚިލާފުވަމުންދާ ކަމުގެ ތުހުމަތުތައް ކޮންމެ ދުވަހަކު ކަހަލަ ގޮތަކަށް އެއްބަޔަކު އަނެއްބަޔަކަށް ކުރަމުންނެވެ. މި ހަމަނުޖެހުންތަކާއެކު ޣައްޒާގެ މަސްރަހު އަދިވެސް އޮތީ ނުތަނަވަސްކަމެއްގެ ތެރޭގަ އެވެ.
އަލް-އަގްސާ ހޮސްޕިޓަލުން ނެރުނު ބަޔާނެއްގައި ބުނެފައިވަނީ، އިސްރާއީލުގެ ޑްރޯން ހަމަލާއެއް އާންމުންގެ ބަޔަކަށް އަމާޒުވުމުގެ ސަބަބުން ތިން މީހަކު މަރުވެ، އިތުރު ބަޔަކަށް އެކިވަރުގެ އަނިޔާތައް ލިބިފައިވާ ކަމަށެވެ.
ހަމާސްގެ ދަށުން ހިންގާ ޣައްޒާގެ ސިވިލް ޑިފެންސް އެޖެންސީން މައުލޫމާތު ދޭ ގޮތުގައި، މި ހަމަލާ އަމާޒުވެފައިވަނީ ޣައްޒާގެ މެދުތެރޭގައި އޮންނަ ދީރުލް ބަލާހްގެ ސަރަހައްދަކަށެވެ.
އިސްރާއީލުގެ އަސްކަރީ މަސްދަރަކުން ވަނީ މި ހަމަލާ ދިންކަން ކަށަވަރުކޮށްދީފަ އެވެ.
އޭއެފްޕީ ނިއުސް އެޖެންސީއަށް މައުލޫމާތު ދެމުން އިސްރާއީލުގެ އަސްކަރީ މަސްދަރަކުން ބުނީ، އިސްރާއީލް ޑިފެންސް ފޯސަސް (އައިޑީއެފް) އިން ހަމަލާ ދިނީ ޖިހާދީ ޓެރަރިސްޓުންނަށް އަމާޒުކޮށްގެން ކަމަށާއި، އެ ހަމަލާގައި ލިބުނު ގެއްލުންތައް އަދިވެސް ބަލަމުންދާ ކަމަށެވެ.
ޣައްޒާގެ ސިއްހީ ވުޒާރާގެ ތަފާސްހިސާބުތަކުން ދައްކާގޮތުގައި، މިދިޔަ އަހަރުގެ އޮކްޓޯބަރު މަހުގެ 10 ވަނަ ދުވަހު ހަނގުރާމަ ހުއްޓާލުމުގެ އެއްބަސްވުން އަމަލީގޮތުން ހިނގަން ފެށި ފަހުންވެސް، ޣައްޒާގައި ފަލަސްތީނުގެ މަދުވެގެން 1،041 މީހުން ވަނީ މަރުވެފަ އެވެ.
އިސްރާއީލުގެ އަސްކަރިއްޔާއިން ރިޕޯޓުކޮށްފައިވާ ގޮތުގައި، ހަމަ އެ މުއްދަތުގެ ތެރޭގައި އެ ގައުމުގެ ސިފައިންގެ ތެރެއިން މަރުވެފައިވަނީ ހަ މީހުންނެވެ.
މަސްދަރު: އޭއެފްޕީ
