މަދޫރޯ ހައްޔަރު ކުރި ފަހުން ވެނެޒުއެލާ ރަނގަޅު މަގުގައި ކުރިއަށްދާ ކަމަށް ވަގުތީ ރައީސާ ވިދާޅުވެއްޖެ

އެމެރިކާާ އިން ވެނެޒުއެލާގެ ކުރީގެ ރައީސް ނިކޮލަސް މަދޫރޯ ހައްޔަރު ކުރި ފަހުން، އެ ޤައުމު ރަނގަޅު މަގުގައި ކުރިއަށްދާ ކަމަށް ވެނެޒުއެލާގެ ވަގުތީ ރައީސާ ޑެލްސީ ރޮޑްރިގޭޒް ވިދާޅުވެއްޖެ އެވެ. 

މަދޫރޯގެ ނައިބު ރައީސާގެ ގޮތުގައި ހުންނެވީ ޑެލްސީ ވެނެޒުއެލާގެ ވަގުތީ ރައީސާގެ މަގާމާ ހަވާލުވެ ވަޑައިގެންނެވީ، އެމެރިކާ އިން ކުރިއަށް ގެންދިޔަ އޮޕަރޭޝަނެއްގައި މަދޫރޯ ހައްޔަރު ކުރުމާ ގުޅިގެންނެވެ. އެއީ އެމެރިާކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް ކުރިއަށް ގެންދިޔަ އޮޕަރޭޝަނެކެވެ. 

ވެނެޒުއުލާގެ ވެރިކަމާ ހަވާލުވެ ވަޑައިގެންނެވުމަށް ފަހު ޑެލްސީ ވަނީ، ޕްރައިވެޓް އިންވެސްޓްމަންޓާއި ބޭރުގެ ޝައުޤުވެރިކަމަށް އެ ޤައުމު ހުޅުވާލައްވައިފަ އެވެ. އަދި އެމެރިކާގެ ރައީސް ޓްރަމްޕް ގެންދަވަނީ މިކަންކަން ވަރަށް ގާތުން ބައްލަވަމުންނެވެ. 

ވެނެޒުއެލާގެ ވެރި ރަށް ކަރަކަސްގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ޑެލްސީ ވިދާޅުވެފައި ވަނީ، އެމެރިކާ އިން ވެނެޒުއެލާގެ ލީޑަރު ހައްޔަރު ކުރުމަށް ފަހު، އެމެރިކާ އާއި ވެނެޒުއެލާއާ ދެމެދު އަލުން ޑިޕްލިމެޓިކް ގުޅުން ފެށިފައިވުމަކީ އުފާ ކުރައްވާ ކަމެއް ކަމަށެވެ. 

އެއާ އެކު ޑެލްސީ ވިދާޅުވީ 2026 ވަނަ އަހަރުގެ ޖަނަވަރީ މަހުގެ ތިން ވަނަ ދުވަހަކީ، ޤައުމީ ސިޔާދަތުގައި އަދި ބައިނަލްއަޤުވާމީ ގުޅުން ތަކަށް ބަލާއިރު ފާހަގަ ކޮށްލެވޭ ދުވަހެއް ކަަމަށެވެ. އެ ރަސްމިއްޔާތުގައި ބައިވެރިވެ ވަޑައިގެންނެވި ބައިނަލްއަޤުވާމީ މެހެމާނުންނާ މުޚާތަބު ކުރައްވައި ޑެލްސީ ވިދާޅުވީ، މިހާރު ވެނެޒުއެލާ އިން ދެކެމުން ދަނީ މީގެ ކުރިން ޚިޔާލު ކުރެވުނު ކަންކަމެއް ނޫން ކަމަށެވެ. 

ޑެލްސީ ވިދާޅުވީ ފާއިތުވި ހަ މަސް ދުވަހަށް ބަލާއިރު، މިހާރު ވެނެޒުއެލާ އޮތީ ރަނގަޅު މަގުގައިކަން އިޙުސާސް ކުރެވޭ ކަމަށެވެ. އަދި ވެނެޒުއެލާ އާއި އެމެރިކާއާ ދެމެދު ހުރި ޚިޔާލު ތަފާތުވުންތައް ޑިޕްލޮމެޓިކް މަގުން ޙައްލު ކުރެވިދާނެ ކަމަށް ވެސް ޑެލްސީ ވަނީ ވިދާޅުވެފައި އެވެ. އެެމެރިކާ އާއި ވެނެޒުއެލާ އިން މިހާރު އަންނަނީ ދެ ޤައުމުގެ ދެ މެދުގައި އޮތް ގުޅުން އިތުރަށް ވަރުގަދަ ކުރުމުގެ މަސައްކަތް ކުރަމުންނެވެ. 

ޓްރަމްޕްގެ އަމުރަށް ހައްޔަރު ކޮށްގެން ގެންދިޔަ ވެނެޒުއެލާގެ ކުރީގެ ރައީސް މަދޫރޯ ހުންނެވީ، އެމެރިކާގެ ނިއު ޔޯކުގެ ޖަލެއްގައި ބަންދު ކޮށްފައި އެވެ.