ހިލޭ ޖެހުމެއްގައި މެސީ ޖެހި ލަނޑާ އެކު މޮޅުވެ، އާޖެންޓީނާގެ ރެކޯޑު ކުރިއަށް

ފީފާ ވޯލްޑް ކަޕްގެ ގުރޫޕު ޖޭގައި ޖޯޑަންއާ ދެކޮޅަށް ކުޅުނު މެޗުން މޮޅުވެ، އާޖެންޓީނާ އިން ފުރިހަމަ ރެކޯޑާ އެކު ގުރޫޕުގެ އެއް ވަނަ ހޯދައިފި އެވެ.

އާދީއްތަ ދުވަހުގެ ހެނދުނު ކުޅުނު މެޗު އާޖެންޓީނާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާާފުގައި އާޖެންޓީނާ އިން ދެ ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގައި އެވެ.

މެޗުގެ 19 ވަނަ މިނެޓުގައި އާޖެންޓީނާ އަށް ލީޑު ނަގައިދިނީ ޖިއޮވާނީ ލޮ ސެލްސޯ އެވެ. އޭގެ ފަހުން މެޗުގެ 31 ވަނަ މިނެޓުގައި އާޖެންޓީނާ އަށް ލިބުނު ޕެނަލްޓީ ކާމިޔާބުކޮށް ލީޑު ފުޅާ ކޮށްދިނީ ލައުޓާރޯ މާޓިނޭޒް އެވެ.

މެޗުގެ ދެ ވަނަ ހާފު ފަށައިގެން 10 ވަނަ މިނެޓުގައި ޖޯޑަން އިން ލަނޑު ޖެހި އެވެ. އެ ލަނޑު އެ ޓީމަށް ޖަހައިދިނީ މޫސާ ތަމޭރީ އެވެ. މެޗުގެ 60 ވަނަ މިނެޓުގައި އާޖެންޓީނާގެ ލިއޮނަލް މެސީ ވަނީ ކުޅެން ނިކުމެފައި އެވެ.

މެޗުގައި އާޖެންޓީނާގެ ތިން ވަނަ ލަނޑު 80 ވަނަ މިނެޓުގައި ޖެހީ މެސީ އެވެ. އެއީ އާޖެންޓީނާ އަށް ލިބުނު ހިލޭ ޖެހުމެއްގައި މެސީ ޖެހި ލަނޑެކެވެ. މިއީ މިފަހަރުގެ ވޯލްޑް ކަޕްގައި މެސީ ޖެހި ހަ ވަނަ ލަނޑެވެ. 

މި ގުރޫޕުގައި އޮސްޓްރިއާ އާއި އަލްޖީރިއާ ކުޅުނު މެޗު ނިމުނީ 3-3 އިން އެއްވަރު ވެގެންނެވެ. އެއާ އެކު ދެ ވަނައިގައި އޮވެ އޮސްޓްރިއާ ދެ ވަނަ ބުރަށް ދިޔައިރު، ތިން ވަނަ އަަށް ދިޔަ އަލްޖީރިއާ އަށް ވެސް ވަނީ ދެ ވަނަ ބުރުން ޖާގަ ލިބިފައި އެވެ. 

މޮޅާ އެކު އާޖެންޓީނާ އިން ގުރޫޕުގެ އެއް ވަނަ ހޯދީ ތިން މެޗުން ވެސް މޮޅުވެ ނުވަ ޕޮއިންޓާ އެކު އެވެ. މުބާރާތުގެ ދެ ވަނަ ބުރުގައި އާޖެންޓީނާ ނިކުންނާނީ ކޭޕް ވާޑްއާ ދެކޮޅަށެވެ. މި ގުރޫޕުގެ ދެ ވަނައިގައި ހަ ޕޮއިންޓާ އެކު ދެ ވަނަ ބުރުން ޖާގަ ހޯދީ އަލްޖީރިއާ އެވެ.