މުސްލިމު ކުޅުންތެރިންނަށް އިޙުތިރާމް ކުރުމުގެ ގޮތުން، ޓްރޮފީ އިން ބަނގުރާ އިޝްތިހާރު އުނި ކޮށްފި

މިހާރު ކުރިއަށްދާ ފީފާ ވޯލްޑް ކަޕްގެ މެޗު ތަކުގެ އެންމެ މޮޅު ކުޅުންތެރިޔާ އަށް ދެމުން އަންނަ އެވޯޑުގައި ހިމެނޭ ބަނގުރާ ކުންފުނީގެ އިޝްތިހާރު އުނި ކުރަން ފީފާ އިން ނިންމައިފި އެވެ. 

މި ބަދަލަކީ މުސްލިމު ކުޅުންތެރިންނާއި، އުމުރުން ހަގު ކުޅުންތެރިންގެ އިތުރުން ބަނގުރާ އިޝްތިހާރު ކުރަން ބޭނުން ނުވާ ކުޅުންތެރިންނަށް އިހުތިރާމް ކުރުމުގެ ގޮތުން ގެނައި ބަދަލެކެވެ.

މި މުބާރާތުގެ "ސުޕީރިއާ ޕްލޭޔާ އޮފް ދަ މެޗް" އެވޯޑުގެ ރަސްމީ ސްޕޮންސަރަކީ ބަނގުރާ އުފައްދާ ކުންފުންޏެއް ކަމަށްވާ "މިޝެލޮބް އަލްޓްރާ" އެވެ. ނަމަވެސް އައު އުސޫލުގެ ދަށުން، ބަނގުރާ ބްރޭންޑާ ގުޅެން ބޭނުން ނުވާ ކުޅުންތެރިންނަށް ދޭ ޓްރޮފީ އާއި، ފޮޓޯ ނަގާއިރު ފަހަތުން ފެންނަން ހުންނަ ބެކްޑްރޮޕްގައި ހުންނާނީ ހަމައެކަނި އެވޯޑުގެ ނަމާއި ފީފާގެ ލޯގޯ އެކަންޏެވެ.

މި ސިޔާސަތަށް ގިނަ ބައެއްގެ ސަމާލުކަން ލިބުނީ، ސްކޮޓްލޭންޑާ ދެކޮޅަށް ކުޅުނު މެޗުގައި މޮޅު ކުޅުމެއް ދައްކައި، މުބާރާތުގެ އެންމެ އަވަސް ލަނޑު ޖެހި މޮރޮކޯގެ މިޑްފީލްޑަރު އިސްމާއިލް ސައިބާރީ އަށް ލޯގޯ ނެތް ޓްރޮފީއެއް ދިނުމާ ގުޅިގެންނެވެ. ބްރެޒިލްގެ "އޯ ގްލޯބޯ" އިން ރިޕޯޓު ކޮށްފައިވާ ގޮތުގައި، މިހާތަނަށް މިޞްރުގެ އިމާމް އަޝޫރު، ޖޯޑަންގެ އަލީ އޮލްވާން، އީރާންގެ ރާމިން ރެޒާއިއާން، ޤަތަރުގެ ގޯލު ކީޕަރު މަހްމޫދު އަބޫނަދާ، އައިވަރީ ކޯސްޓުގެ ޔާން ދިއޮމާންޑޭ، ކެނެޑާގެ އިސްމާއިލް ކޯނޭ އަދި ސްވިޒަލޭންޑްގެ ޔޯއާން މަންޔަމްބީ އަށް ވެސް ވަނީ ސްޕޮންސަރުގެ ލޯގޯ ނެތް ޓްރޮފީ ދީފައި އެވެ.

"ސްޕޯޓް ބައިބަލް" އިން ރިޕޯޓު ކޮށްފައިވާ ގޮތުގައި، ބަނގުރާ އިޝްތިހާރު ނެތް ޓްރޮފީއެއް ބޭނުންވާ ކޮންމެ ކުޅުންތެރިއަކަށް ވެސް އެ ފުރުސަތު ފީފާ އިން ވަނީ ހުޅުވާލާފައި އެވެ. މިއީ ދީނީ ގޮތުން ބަނގުރާ ބޭނުން ކުރުން މަނާ މުސްލިމު ކުޅުންތެރިންނާއި، ޤާނޫނީ ގޮތުން ބަނގުރާ ބުއިން މަނާ އުމުރުގެ ކުޅުންތެރިންގެ ހައްގު ތަކަށް ރިއާޔަތްކޮށް ނިންމާފައިވާ ނިންމުމެކެވެ.

ފީފާ އިން މީގެ ކުރިން 2025 ވަނަ އަހަރުގެ ކުލަބް ވޯލްޑް ކަޕްގައި ވެސް މި އުސޫލަށް އަމަލު ކޮށްފައިވެ އެވެ. އެ މުބާރާތުގައި މޮރޮކޯގެ ޑިފެންޑަރު އަޝްރަފް ހަކީމީ ދީނީ ސަބަބުތަކަށްޓަކައި ލޯގޯ ނެތް އެވޯޑެއް ގަބޫލުކުރި އިރު، ބްރެޒިލްގެ ތަރި އެސްޓެވާއޯ އަކީ އޭރު އުމުރު ހަމަނުވާ ކުޅުންތެރިއަކަށް ވުމުން އޭނާ އަށް ވެސް ދިނީ ސްޕޮންސަރުގެ ލޯގޯ ނެތް ޓްރޮފީ އެކެވެ.

ބައިނަލްއަގުވާމީ ފުޓްބޯޅަ މުބާރާތް ތަކުގައި ބަނގުރާ ސްޕޮންސަރުންގެ މައްސަލަ މީގެ ކުރިން ވެސް ވަނީ ފެންމަތިވެފައި އެވެ. އެގޮތުން 2018 ވަނަ އަހަރުގެ ވޯލްޑް ކަޕްގައި މިސްރުގެ ގޯލު ކީޕަރު މުހައްމަދު އެލް ޝެނާވީ ވަނީ ބަނގުރާ ކުންފުންޏަކުން ސްޕޮންސަރު ކޮށްފައިވާތީ މެޗުގެ މޮޅު ކުޅުންތެރިޔާގެ އެވޯޑާ ހަވާލުވާން އިންކާރު ކޮށްފައި އެވެ.

މިޝެލޮބް އަލްޓްރާ އަކީ އަދިވެސް މި އެވޯޑުގެ ރަސްމީ ސްޕޮންސަރު ކަމުގައި ވިޔަސް، ފީފާގެ މި އައު ސިޔާސަތުގެ ސަބަބުން ކުޅުންތެރިންގެ އަމިއްލަ ގަބޫލު ކުރުންތަކާއި، ދީނީ އަގުތަކަށް އުނިކަމެއް ނާންނާނެ ގޮތަށް ކާމިޔާބީ ފާހަގަ ކުރުމުގެ ފުރުސަތު މިވަނީ ފަހިވެފައި އެވެ.