ޓްރަމްޕް ޖިންސީ ގޯނާކުރި ކަމަށް ނިންމާފައިވާ ނިންމުން ބާތިލު ކުރުމަށް ހުށަހެޅި ހުށަހެޅުން އެމެރިކާގެ ސުޕްރީމް ކޯޓުން ބޭރުކޮށްލައިފި

އެމެރިކާގެ ރައީސް ޑޮނަލްޑް ޓްރަމްޕް ޖިންސީ ގޯނާކުރި ކަމަށް ޖޫރީން ނިންމާފައިވާ ނިންމުން ބާތިލްކުރުމަށް އޭނާގެ ފަރާތުން ހުށަހެޅި ހުށަހެޅުން އެމެރިކާގެ ސުޕްރީމް ކޯޓުން ބޭރުކޮށްލައިފި އެވެ.

މެގަޒިން ކޮލަމިސްޓެއްގެ ގޮތުގައި މަސައްކަތްކުރި އީ ޖީން ކެރޯލަށް ޖިންސީ ގޯނާކޮށް، އޭނާގެ އަބުރު ނަގާލި ކަމަށް ސާބިތުވެ، ކެރޯލަށް 5 މިލިއަން ޑޮލަރުގެ ބަދަލެއް ދިނުމަށް ޖޫރީން ކުރި ހުކުމް ބާތިލްކުރުމަށް ޑޮނަލްޑް ޓްރަމްޕް ހުށަހެޅުއްވި މައްސަލަ ބަލައިގަތުމަށް އެމެރިކާގެ ސުޕްރީމް ކޯޓުން ވަނީ އިންކާރުކޮށްފަ އެވެ.

މިދިޔަ 2023 ވަނަ އަހަރު ޖޫރީން އިއްވި ހުކުމަށް ދަށު ކޯޓަކުން ތާއީދުކޮށްފައި ވަނިކޮށް، ޓްރަމްޕްގެ ފަރާތުން ހުށަހެޅި އިސްތިއުނާފް މައްސަލަ ސުޕްރީމް ކޯޓުގެ ފަނޑިޔާރުން ބޭރުކޮށްލީ މިދިޔަ ހޯމަ ދުވަހުއެވެ.

އެލް (Elle) މެގަޒިންގެ ކުރީގެ ކޮލަމިސްޓް ކެރޯލާއި ޓްރަމްޕާ ދެމެދު ގާނޫނީ ހަނގުރާމަ ފެށުނީ، 1996 ވަނަ އަހަރު މެންހަޓަންގެ ޑިޕާޓްމަންޓް ސްޓޯރެއްގެ ޗޭންޖިން ރޫމެއްގެ ތެރޭގައި ޓްރަމްޕް އޭނާ ރޭޕްކުރި ކަމަށް ބުނެ 2019 ވަނަ އަހަރު ކެރޯލް ޝާއިއުކުރި ފޮތަކާ ގުޅިގެންނެވެ.

ޓްރަމްޕްގެ މައްޗަށް 5 މިލިއަން ޑޮލަރުގެ ޖޫރިމަނާއެއް އައި މައްސަލައަކީ، 2022 ވަނަ އަހަރު ސޯޝަލް މީޑިއާގައި ކުރެއްވި ޕޯސްޓެއްގައި ކެރޯލްގެ ތުހުމަތުތަކަކީ "އޮޅުވާލުމެއް" ކަމަށާއި އެއީ "މަކަރެއް" ކަމަށް ވިދާޅުވެ ޓްރަމްޕް ދެއްކެވި ވާހަކަތަކާ ގުޅިގެން ހުށަހެޅި މައްސަލައެކެވެ.

އެ ޕޯސްޓުގައި ޓްރަމްޕް އިތުރަށް ވިދާޅުވެފައިވަނީ "މި އަންހެންމީހާއަކީ އަހަރެން ގަޔާވާ ކަހަލަ ސިފަތަކެއް ހުރި މީހެއް ނޫން" ކަމަށެވެ.

މި މައްސަލަ ކެރޯލް ހުށަހެޅީ މެންހަޓަންގެ ފެޑަރަލް ކޯޓަށެވެ. އެ މައްސަލަ ބެލުމަށްފަހު 2023 ވަނަ އަހަރު ޖޫރީން ނިންމީ ޓްރަމްޕް ކެރޯލަށް ޖިންސީ ގޯނާކޮށް، އޭނާގެ އަބުރަށް އަރައިގަނެފައިވާ ކަމަށެވެ. އަދި ބަދަލުގެ ގޮތުގައި 5 މިލިއަން ޑޮލަރު ދިނުމަށް ޖޫރީން ހުކުމްކުރި އެވެ.

ޓްރަމްޕްގެ ވަކީލުން ބުނަމުންދިޔައީ މި ހުކުމް އައީ "މައްސަލައާ ނުގުޅޭ" ހެކިތަކެއްގެ މައްޗަށް ބިނާކޮށް ކަމަށެވެ. އޭގެ ތެރޭގައި މީގެ އެތައް އަހަރެއް ކުރިން ޓްރަމްޕް ޖިންސީ ގޯނާކުރި ކަމަށް ތުހުމަތުކުރި އިތުރު ދެ އަންހެނެއްގެ ހެކިބަސް ނެގުން ހިމެނޭ ކަމަށް ވަކީލުން ފާހަގަކުރި އެވެ.

މެންހަޓަންގައި ހުންނަ އެމެރިކާގެ ސާކިޓް ކޯޓް އޮފް އެޕީލްސްއިން 2024 ވަނަ އަހަރު މި ހުކުމަށް ތާއީދުކުރި އެވެ. އެ ކޯޓުން ނިންމީ ހެކިތަކުން އެނގެން އޮތް ގޮތުގައި ޓްރަމްޕްގެ ފަރާތުން ފެނިފައިވަނީ ކެރޯލްގެ ތުހުމަތުތަކާ ދިމާވާ ފަދަ "ތަކުރާރުވަމުންދާ، އާދަޔާ ހިލާފު" އަމަލުތަކެއް ކަމަށެވެ.

ޓްރަމްޕްގެ ވަކީލުން ސުޕްރީމް ކޯޓުގައި ބުނެފައިވަނީ، އެތައް އަހަރެއްވީ، ކަށަވަރުނުވާ އަދި މި މައްސަލައާ ގުޅުމެއް ނެތް ތުހުމަތުތަކެއްގެ ހެކިބަސް ޖޫރީންނަށް އިއްވުމަށް ފަނޑިޔާރު ހުއްދަ ދިނީ ގޯސްކޮށް ކަމަށާއި، އެއީ ހެކި ބަލައިގަތުމާ ބެހޭ ފެޑަރަލް ގަވާއިދުތަކާ ހިލާފު ކަމެއް ކަމަށެވެ.

ކެރޯލްގެ ވަކީލުން ވަނީ މި މައްސަލަ ބަލައިނުގަތުމަށް ސުޕްރީމް ކޯޓުގެ ފަނޑިޔާރުންގެ ކިބައިން އެދިފަ އެވެ. އެ ވަކީލުން ބުނީ އެހެން އަންހެނުންގެ ހެކިބަހަކީ މި މައްސަލައާ ގުޅުންހުރި ހެކިތަކެއް ކަމަށާއި، ފަނޑިޔާރު ލުވިސް ކެޕްލަންގެ ނިންމެވުންތަކަކީ އެމެރިކާގެ އެހެން ފަނޑިޔާރުންވެސް އަމަލުކުރާ އުސޫލުތަކާ އެއްގޮތް ނިންމެވުންތަކެއް ކަމަށެވެ.

ސުޕްރީމް ކޯޓުން މި ނިންމުން ނިންމާފައިވަނީ، ޓްރަމްޕްގެ ސިޔާސީ މަސައްކަތްޕުޅުތަކާ ގުޅުންހުރި މުހިންމު ބޮޑެތި މައްސަލަތަކެއްގައި އެ ކޯޓުން ގޮތްތަކެއް ނިންމަމުންދާ ދަނޑިވަޅެއްގަ އެވެ.

މީގެ އިތުރުން، 2019 ވަނަ އަހަރު ޓްރަމްޕް ފުރަތަމަ ފަހަރަށް ކެރޯލްގެ ތުހުމަތުތައް ދޮގުކުރި މައްސަލައިގައި ކުރި އަބުރުގެ ދައުވާގައި، އިތުރު 83.3 މިލިއަން ޑޮލަރު ކެރޯލަށް ދިނުމަށް ޖޫރީން ވަނީ ހުކުމްކޮށްފަ އެވެ. ޓްރަމްޕްގެ ފަރާތުން އެ މައްސަލަވެސް އިސްތިއުނާފް ކުރަމުންދާއިރު، އެ މައްސަލަ އަދި ސުޕްރީމް ކޯޓާ ހަމައަކަށް ނުދެ އެވެ.