އެމެރިކާގެ މަރުކަޒީ ބޭންކުގެ ގަވަރުނަރު މަގާމުން ވަކިކުރުމަށް ރައީސް ޓްރަމްޕް ކުރެއްވި މަސައްކަތް އެމެރިކާގެ ސުޕްރީމް ކޯޓުން ހުއްޓުވައިފި

އެމެރިކާގެ މަރުކަޒީ ބޭންކު، ފެޑަރަލް ރިޒާވްގެ ގަވަރުނަރު ލީސާ ކުކް މަގާމުން ވަކިކުރުމަށް ރައީސް ޑޮނަލްޑް ޓްރަމްޕް ކުރެއްވި މަސައްކަތް އެމެރިކާގެ ސުޕްރީމް ކޯޓުން ހުއްޓުވައިފި އެވެ. ކޯޓުގެ މި ނިންމުމަކީ ފެޑަރަލް ރިޒާވްގެ މިނިވަންކަން ދެމެހެއްޓުމަށް ނިންމި ނިންމުމެއްގެ ގޮތުގައި ވަނީ ބެލެވިފަ އެވެ.

އެމެރިކާގެ އެންމެ މަތީ ކޯޓުގެ ފަނޑިޔާރުންގެ މެދުގައި ނެގުނު ވޯޓުން، 5 ފަނޑިޔާރުންގެ އަޣުލަބިއްޔަތުން ނިންމާފައިވަނީ، ގަވަރުނަރު ލީސާ ކުކް މަގާމުން ވަކިކުރުމުގައި އޭނާއަށް ލިބިދޭންޖެހޭ "ޑިއު ޕްރޮސެސް" ނުވަތަ އިޖުރާއީ ފުރުސަތުތައް ޓްރަމްޕްގެ ސަރުކާރުން ފުރިހަމައަށް ދީފައިނުވާ ކަމަށެވެ.

މި މައްސަލަ ސުޕްރީމް ކޯޓުން މިހާރު ވަނީ ދަށު ކޯޓަށް އަނބުރާ ފޮނުވާލާފަ އެވެ. އެހެންކަމުން، ލީސާ ކުކް މަގާމުން ވަކިކުރުމުގެ ކަންކަން ކުރިއަށް ގެންދަން ސަރުކާރުން ބޭނުންވާނަމަ، އޭނާގެ މައްޗަށް ކުރެވޭ މޯގޭޖް ފްރޯޑް ނުވަތަ ރަހުނުގެ މުއާމަލާތްތަކުގައި އޮޅުވާލުންތަކެއް ގެންގުޅުނު ކަމަށް ބުނާ ތުހުމަތުތައް ދަށު ކޯޓުގައި ސާބިތުކޮށްދޭން ޖެހޭނެ އެވެ. އަދި މި މަރުހަލާގައި އެ ތުހުމަތުތަކުން ދިފާއުވުމުގެ ފުރުސަތު ލީސާ ކުކްއަށް ލިބިގެންދާނެ އެވެ.

ލީސާ ކުކް ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރު ކުރައްވާފަ އެވެ. ފެޑަރަލް ރިޒާވްގެ މިނިވަންކަމަށް ވަކާލާތުކުރާ ފަރާތްތަކުން ބުނާ ގޮތުގައި، މިއީ މަރުކަޒީ ބޭންކުގެ މައްޗަށް ޓްރަމްޕްގެ ނުފޫޒު ފޯރުވުމަށްޓަކައި ދައްކާ ބަހަނާއެކެވެ.

އެމެރިކާގެ ގާނޫނު ބުނާގޮތުން، ރައީސަކަށް ފެޑަރަލް ރިޒާވްގެ ގަވަރުނަރަކު މަގާމުން ވަކިކުރެވޭނީ އެކަށީގެންވާ ވަރުގަދަ ސަބަބެއް އޮވެގެން އެކަންޏެވެ.

މި ގޮތަށް ގާނޫނުގައި ކަނޑައަޅާފައިވަނީ ސިޔާސީ ނުފޫޒުން ބޭންކު ސަލާމަތްކުރުމަށާއި، ކުރު މުއްދަތުގެ ސިޔާސީ ފައިދާއަށްވުރެ ބޮޑަށް، ދިގު މުއްދަތުގެ އިގްތިސާދީ ލަނޑުދަނޑިތަކަށް އަމާޒުކޮށް ސިޔާސަތުތައް އެކުލަވާލުމުގެ ފުރުސަތު ދިނުމަށެވެ.

މިދިޔަ ޖެނުއަރީ މަހު ކޯޓުގައި ވަކާލާތު ކުރައްވަމުން ލީސާ ކުކްގެ ވަކީލު ޕޯލް ކްލެމެންޓް ވިދާޅުވީ، ސަރުކާރުން އޭނާ މަގާމުން ވަކިކުރަން އުޅޭ ގޮތުގެ ސަބަބުން، ފެޑަރަލް ރިޒާވް ހިމާޔަތްކުރުމަށް ކޮންގްރެސްއިން ހަދާފައިވާ ގާނޫނުތަކަކީ "ޖޯކަކަށް" ވެގެންދާނެ ކަމަށެވެ.

ރައީސް ޓްރަމްޕް، ލީސާ ކުކް މަގާމުން ވަކިކުރައްވާނެކަން ސޯޝަލް މީޑިއާ މެދުވެރިކޮށް އިއުލާން ކުރެއްވީ މިދިޔަ އޯގަސްޓް މަހު އެވެ. 

ވައިޓް ހައުސްގެ ފަރާތުން ކޯޓުގައި ވަކާލާތު ކުރެއްވި ސޮލިސިޓަރ ޖެނެރަލް ޖޯން ސޯޔާ ޖެނުއަރީ މަހު ވިދާޅުވީ، ޓްރަމްޕް ކުރެއްވި ސޯޝަލް މީޑިއާ ޕޯސްޓަކީ އެކަމަށް ޖަވާބުދާރީވުމަށް ލިބުނު އެކަށީގެންވާ ނޯޓިސްއެއް ކަމަށެވެ. އަދި މަގާމުން ވަކިކުރާނެ ސަބަބެއް އޮތްތޯ ނިންމުމުގައި ކޯޓުތަކުން ރައީސްގެ ނިންމެވުމަށް އިހުތިރާމް ކުރަންޖެހޭނެ ކަމަށްވެސް އޭނާ ވިދާޅުވި އެވެ.