ކޮލަމްބިއާގެ ރިޔާސީ އިންތިޚާބަށް އިސްރާއީލުން ނުފޫޒު ފޯރުވާފައިވާ ކަމަށް ތުހުމަތު ކުރަނީ ކީއްވެ؟

ކޮލަމްބިއާގެ ރިޔާސީ އިންތިޚާބުގެ ދެވަނަ ބުރުގެ ވަގުތީ ނަތީޖާ ދައްކާގޮތުން، އެ ގައުމުގެ މިހާރުގެ ރައީސް ގުސްޓާވޯ ޕެޓްރޯ ތާއީދުކުރެއްވި ކެންޑިޑޭޓް ކުޑަ ތަފާތަކުން ބަލިވުމާ ގުޅިގެން، އިންތިޚާބުގައި އޮޅުވާލުންތަކެއް ހުރި ކަމަށް ވާތުފިޔައިގެ ރައީސް ޕެޓްރޯ ތުހުމަތު ކުރައްވައިފިއެވެ.

ހޯމަ ދުވަހު ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ސިލްސިލާ ޕޯސްޓްތަކެއްގައި ޕެޓްރޯ ތުހުމަތު ކުރެއްވި ގޮތުގައި، އިދިކޮޅު ފަރާތްތަކުން ވަނީ ވޯޓު ގަނެފައެވެ. އަދި އިދިކޮޅު ކަނާތުފިޔައިގެ ހަރުކަށި ކެންޑިޑޭޓް އަބެލާޑޯ ޑި ލާ އެސްޕްރިއޭލާ އިންތިޚާބު ކާމިޔާބު ކުރުމަށް އިސްރާއީލާއި އެމެރިކާއިން އެހީތެރިވެ، އިންތިޚާބަށް ނުފޫޒު ފޯރުވާފައިވާ ކަމަށްވެސް އޭނާ ވިދާޅުވިއެވެ. އިންތިޚާބުގެ ނަތީޖާ ގަބޫލުކުރަން ޕެޓްރޯ ދެކޮޅު ހައްދަވާފައިވާއިރު، ޝަރުއީ ދާއިރާއިން އެ މައްސަލަ ތަހުގީގު ކުރުމަށް އޭނާ ވަނީ ގޮވާލައްވާފައެވެ.

ގާނޫނުއަސާސީން ދެވަނަ ދައުރަކަށް ކުރިމަތިލުން މަނާކޮށްފައިވާ ޕެޓްރޯއަކީ ކޮލަމްބިއާގެ ތާރީޚުގައި އިންތިޚާބުވި ވާތުފިޔައިގެ ފުރަތަމަ ރައީސެވެ. މީގެ ސަބަބުން އޭނާއާއި އެމެރިކާއާ ދެމެދު ވަނީ ޚިޔާލުތަފާތުވުންތަކެއް އުފެދިފައެވެ.

ޕެޓްރޯގެ ސަރުކާރުން ވަނީ އިޖުތިމާއީ ޚަރަދުތައް އިތުރުކުރުމާއި، އެންމެ ކުޑަ އުޖޫރަ ބޮޑުކުރުމުގެ އިތުރުން ފަގީރު އާއިލާތަކަށް ބިން ބަހައިދިނުން ފަދަ އިސްލާހީ ބަދަލުތަކެއް ގެނެސްފައެވެ. މީގެ އިތުރުން، އިސްރާއީލުން ޣައްޒާގައި ހިންގަމުންދާ ގަތުލުއާންމާ ގުޅިގެން ޕެޓްރޯ ވަނީ އިސްރާއީލާއެކު އޮތް ގުޅުން ކަނޑާލައްވައި، އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަރުކާރާ ދުރުހެލި ސިޔާސަތެއް ގެންގުޅުއްވާފައެވެ.

އެހެންނަމަވެސް، އިންތިޚާބުގެ ނަތީޖާ ގަބޫލުކުރަން އޭނާ ދެކޮޅު ހެއްދެވުމަކީ ސިޔާސީ ނުތަނަވަސްކަމާއި ހަމަނުޖެހުން އުފެދިދާނެ ކަމެއް ކަމަށް ފާޑުކިޔާ ފަރާތްތަކުން ބުނެއެވެ.

އިންތިޚާބުގެ ނަތީޖާއަކީ ކޮބައި؟

ކޮލަމްބިއާގެ ރިޔާސީ އިންތިޚާބުގެ ފުރަތަމަ ބުރު ބޭއްވީ މެއި މަހުގެ 31 ވަނަ ދުވަހުއެވެ. އެ ބުރުގައި ވާދަކުރެއްވި ދެ ކެންޑިޑޭޓުން ކަމަށްވާ ކަނާތުފިޔައިގެ 'ޑިފެންޑާސް އޮފް ދަ ހޯމްލޭންޑް' މޫވްމަންޓްގެ އަބެލާޑޯ ޑި ލާ އެސްޕްރިއޭލާ އާއި ވެރިކަންކުރާ 'ހިސްޓޮރިކް ޕެކްޓް' ގެ ސެނެޓަރު އިވާން ސެޕޭޑާ ކުރެ އެއްވެސް ބޭފުޅަކަށް ވޯޓުގެ 50 އިންސައްތަ ލިބިވަޑައިނުގަތުމުން، އާދިއްތަ ދުވަހު ވަނީ ދެވަނަ ބުރެއް ބާއްވާފައެވެ. ވޯޓު ގުނުމުގެ ކަންކަން ބަލަހައްޓާ ނޭޝަނަލް ރެޖިސްޓްރީން ހޯމަ ދުވަހު އާންމުކުރި ވަގުތީ ނަތީޖާ ދައްކާގޮތުން، އެސްޕްރިއޭލާ އިންތިޚާބު ކާމިޔާބު ކުރެއްވީ 49.66 އިންސައްތަ ވޯޓުންނެވެ. ސެޕޭޑާއަށް ލިބިވަޑައިގަތީ 48.7 އިންސައްތަ ވޯޓެވެ.

މި ދެ ކެންޑިޑޭޓުންގެ ދެމެދުގައި އޮތް ފަރަގަކީ އެންމެ 1 އިންސައްތައަށް ވުރެވެސް ކުޑަ މިންވަރެކެވެ. މިއީ ކޮލަމްބިއާގެ ތާރީޚުގައިވެސް އެންމެ ވާދަވެރި އެއް އިންތިޚާބެވެ.

ޓްރަމްޕްގެ ތާއީދު އޮތް، އުމުރުން 47 އަހަރުގެ އެސްޕްރިއޭލާ މަގާމުގެ ހުވާ ކުރައްވާނީ އޮގަސްޓް މަހުގެ 7 ވަނަ ދުވަހުއެވެ. އޭނާއަކީ ޖިނާއީ މައްސަލަތަކާ ބެހޭ ވަކީލެއްގެ އިތުރުން ބޮޑު މުއްސަނދި މަހުޖަނެކެވެ. އޭނާގެ ކެމްޕޭން ބިނާކޮށްފައިވަނީ ސަލާމަތީ ކަންކަން ވަރުގަދަކުރުމަށާއި ވާތުފިޔައިގެ ސިޔާސަތުތަކާ ދެކޮޅު ހެދުމުގެ މައްޗަށެވެ. އޭނާގެ އަތުގައި އެމެރިކާގެ ރައްޔިތުކަން ވެސް އޮވެއެވެ.

އެސްޕްރިއޭލާގެ ކާމިޔާބީއަކީ ފަހަކަށް އައިސް ލެޓިން އެމެރިކާގެ ގައުމުތަކުގައި ޓްރަމްޕަށް ތާއީދުކުރާ، ކަނާތުފިޔައިގެ ހަރުކަށި ލީޑަރުން އިންތިޚާބުވަމުންދާ ސިލްސިލާއަށް އިތުރުވި ބޮޅެކެވެ. އާޖެންޓީނާގެ ހާވިއޭ މިލެއި، ހޮންޑިއުރަސްގެ ނަސްރީ "ޓިޓޯ" އަސްފޫރާ، އެލް ސެލްވަޑޯގެ ނަޔިބު ބުކޭލޭ އަދި ކޮސްޓަރީކާގެ ލައުރާ ފެނާންޑޭޒް ޑެލްގާޑޯއަކީވެސް ޓްރަމްޕްގެ ސަރުކާރާ ގާތް ގުޅުމެއް ބާއްވާ ބޭފުޅުންނެވެ.

އިންތިޚާބުގައި އޮޅުވާލުންތަކެއް ހުރި ކަމަށް ޕެޓްރޯ ތުހުމަތު ކުރައްވަނީ ކީއްވެ؟

ޕެޓްރޯ 'އެކްސް' ގައި ކުރެއްވި ޕޯސްޓްތަކެއްގައި ތުހުމަތު ކުރެއްވި ގޮތުގައި، އިސްރާއީލާއި ބޮޑުވަޒީރު ބެންޖަމިން ނަތަންޔާހޫގެ އެހީތެރިކަމާއެކު އިންތިޚާބުގައި ވަނީ ބޮޑެތި އޮޅުވާލުންތަކެއް ހިންގާފައެވެ.

ޕެޓްރޯ ވިދާޅުވީ، ކޮންމެ ވޯޓުލާ މަރުކަޒެއްގައި އޮފިޝަލުން އަތުން ލިޔެގެން ތައްޔާރުކުރާ ރަސްމީ ނަތީޖާ ޝީޓް ނުވަތަ 'ފޯމް E-14' އަށް ބަދަލުތަކެއް ގެނެސްފައިވާ ކަމުގެ ހެކި އެބަހުރި ކަމަށެވެ.

މި ފޯމަކީ ވޯޓު ގުނުމުގެ ކަންކަން އޮޅުވާލިޔަނުދިނުމަށްޓަކައި އަތުން ލިޔެގެން ތައްޔާރުކުރާ ރެކޯޑެކެވެ. އަދި އާންމުންނަށް ބެލޭނެހެން މީގެ ޑިޖިޓަލް ސްކޭން ކޮޕީތައް ނޭޝަނަލް ރެޖިސްޓްރީގެ ޕޯޓަލްއަށް އަޕްލޯޑް ކުރަންޖެހެއެވެ. މީގައި މައްސަލައެއް އުޅޭނަމަ، ވޯޓު އަލުން ގުނުމަށް އެދުމުގެ ފުރުސަތު ސިޔާސީ ޕާޓީތަކަށް އޮވެއެވެ.

ޕެޓްރޯ ތުހުމަތު ކުރެއްވި ގޮތުގައި، ބޭރުގެ ފަރާތްތަކުން ނޭޝަނަލް ރެޖިސްޓްރީގެ ވެބްސައިޓަށް ވަދެ، ބައެއް E-14 ފޯމުތަކުގައި ހުރި ވޯޓުގެ އަދަދުތައް ވަނީ ބަދަލުކޮށްފައެވެ.

"ނޭޝަނަލް ރެޖިސްޓްރީގެ ބައެއް ސާވަރުތަކުގެ އައިޕީ އެޑްރެސްތަކަށް ބަދަލު ގެނެސްފައިވާ ކަމުގެ ހެކި މިއަދު އަޅުގަނޑުމެންނަށް ވަނީ ލިބިފައި،" އޭނާ ޕޯސްޓް ކުރެއްވިއެވެ.

"މީގެ މާނައަކީ ސޮފްޓްވެއާއަށް ނުފޫޒު ފޯރުވައި، ވޯޓުލާ މަރުކަޒުތަކުގެ ނަތީޖާތައް ބަދަލުކޮށްފައިވާ ކަމެވެ. ދުނިޔޭގައި މިފަދަ ކަމެއް ކުރުމުގެ ގާބިލުކަން ހުރި ހަމައެކަނި ފަރާތަކީ އިސްރާއީލު ދައުލަތް،" އިސްރާއީލުން މިކަމުގައި ބައިވެރިވި ކަމުގެ އެއްވެސް ހެއްކެއް ދެއްކެވުމެއް ނެތި ޕެޓްރޯ އިތުރަށް ވިދާޅުވިއެވެ.

ޕެޓްރޯ ވިދާޅުވީ، އިންތިޚާބުގެ ކުރިން ވޯޓުލާ ސޮފްޓްވެއާގެ "ޓެކްނިކަލް އޮޑިޓެއް" ހެދުމަށް އޭނާގެ ޕާޓީން އެދުނު ކަމަށާއި، ޑިޖިޓަލްކޮށް ފޮނުވާ ލިޔެކިޔުންތަކަށް ބަދަލު ނުގެނެވޭނެހެން އޭގެ ޑިޖިޓަލް ފުޓްޕްރިންޓްތައް ނެގުމަށް ކަމާބެހޭ ފަރާތްތަކުގައި އެދުނު ކަމަށެވެ. ނަމަވެސް އެ އެދުންތަކަށް އެ ފަރާތްތަކުން އިޖާބަދީފައި ނުވާ ކަމަށް އޭނާ ވިދާޅުވިއެވެ.

މީގެ އިތުރުން، E-14 ފޯމުތަކަށް "ރޭވުންތެރިކަމާއެކު" ބަދަލު ގެންނަ މަންޒަރު ފެންނަ ވީޑިއޯތަކެއްވެސް ޕެޓްރޯ ވަނީ ހިއްސާކުރައްވާފައެވެ. އަދި މި އޮޅުވާލުންތައް ހިންގާފައިވަނީ "ބައުޓިސްޓާ ބްރަދާސްގެ އޮފީސްތަކުން" ކަމަށްވެސް އޭނާ ތުހުމަތު ކުރެއްވިއެވެ.

ބައުޓިސްޓާ ބްރަދާސްއަކީ ކޮބައިތޯ؟

ޕެޓްރޯ އެ އިޝާރާތް ކުރެއްވީ ކޮލަމްބިއާގެ އިންތިޚާބީ އޮނިގަނޑު ބަލަހައްޓާ، ނުފޫޒުގަދަ އަމިއްލަ ކުންފުންޏެއް ކަމަށްވާ 'ތޯމަސް ގްރެގް އެންޑް ސަންސް' އަށެވެ. މި ކުންފުންޏަކީ ސެކިއުރިޓީ ޕްރިންޓިންގެ މަސައްކަތް ކުރާ ކުންފުންޏެކެވެ. އަދި ދާދި ފަހަކާ ޖެހެންދެން ކޮލަމްބިއާގެ ޕާސްޕޯޓް ޕްރިންޓް ކުރަމުން އައީވެސް މި ކުންފުނިންނެވެ.

މި ކުންފުނި ހިންގަނީ ފެނާންޑޯ އަދި ކެމީލޯ ބައުޓިސްޓާ ޕަލާސިއޯ ކިޔާ ދެބެއިންނެވެ. މި ދެބެއިންނަކީ 1980 ގެ އަހަރުތަކުގައި އެމެރިކާގައި ބޭންކް ފްރޯޑް ނުވަތަ ބޭންކަށް އޮޅުވާލުމުގެ ކުށް ސާބިތުވެފައިވާ ދެ މީހުންނެވެ.

އެމީހުންގެ ބައްޕަ ގްރެގޯރިއޯ އުފެއްދި މި ކުންފުންޏަކީ ވޭތުވެދިޔަ 10 އަހަރަށް ވުރެ ގިނަ ދުވަހު، އިންތިޚާބުގެ ކަންކަން ބެލެހެއްޓުމާއި، ވަގުތީ ނަތީޖާ ގުނުމާއި، ވޯޓު ގުނާ ސޮފްޓްވެއާ މެނޭޖްކުރުމަށް ނޭޝަނަލް ރެޖިސްޓްރީން ހަވާލުކޮށްފައިވާ ކުންފުންޏެވެ.

މިދިޔަ އޭޕްރީލް މަހު ޕެޓްރޯ ވަނީ ބައުޓިސްޓާ ދެބެއިން އެސްޕްރިއޭލާއާއެކު ސިއްރު އެއްބަސްވުމެއް ހަދާފައިވާ ކަމަށް ތުހުމަތު ކުރައްވާފައެވެ. އެއީ އެސްޕްރިއޭލާއަށް ރިޔާސީ އިންތިޚާބު ކާމިޔާބުކޮށްދިނުމުގެ ބަދަލުގައި، އަލުން ޕާސްޕޯޓް ޕްރިންޓް ކުރުމުގެ ކޮންޓްރެކްޓް އެ ކުންފުންޏަށް ހޯދައިދިނުމަށެވެ.

އެ ދުވަސްވަރު އެސްޕްރިއޭލާ ވަނީ އެ ތުހުމަތުތައް ދޮގުކުރައްވާފައެވެ. އަދި އޭނާގެ ވަކީލުން ވަނީ ޕެޓްރޯއާ ދެކޮޅަށް ދައުވާ ކުރާނެ ކަމުގެ އިންޒާރުވެސް ދީފައެވެ.

ކަމާބެހޭ ފަރާތްތަކުން ބުނަނީ ކީކޭ؟

އެޓާނީ ޖެނެރަލް ގްރެގޯރިއޯ އެލްޖަކް ވަނީ މި ތުހުމަތުތައް ގަބޫލު ނުކުރައްވާފައެވެ. ވޯޓުގެ 99 އިންސައްތައަށް ވުރެ ގިނަ ވޯޓު ގުނާ ނިމުނުއިރު، އިންތިޚާބުގައި އޮޅުވާލުމެއް ހިންގާފައިވާ ކަމުގެ އެއްވެސް ހެއްކެއް ފެންނަން ނެތް ކަމަށް އޭނާ ނޫސްވެރިންނަށް ވިދާޅުވިއެވެ.

އަނެއްކޮޅުން، އެސްޕްރިއޭލާ މިހާތަނަށް ޕެޓްރޯގެ ތުހުމަތުތަކަށް ސީދާ ޖަވާބެއް ދެއްވާފައެއް ނުވެއެވެ.

އެސްޕްރިއޭލާއާއި އިސްރާއީލާ ގުޅުމެއް އޮވޭތަ؟

އާއެކެވެ، އެސްޕްރިއޭލާއަކީ އަބަދުވެސް އިސްރާއީލަށް ތާއީދުކުރާކަން ހާމަކުރައްވާ ބޭފުޅެކެވެ. އޭނާ ވަނީ ކޮލަމްބިއާގައި އުޅޭ ޔަހޫދީންގެ މެދުގައި ކެމްޕޭން ކުރައްވައި، އިސްރާއީލަށް ތާއީދުކުރާނެ ކަމުގެ ވައުދުތައް ވެވަޑައިގެންފައެވެ. އަދި އޭނާގެ ސަރުކާރަކީ "ޔަހޫދީ-މަސީހީ އުސޫލުތައް ދިފާއުކުރާނެ" ސަރުކާރެއް ކަމަށްވެސް ވިދާޅުވެފައިވެއެވެ.

އިސްރާއީލާއެކު އޮތް ގުޅުން ކަނޑާލުމަށް 2024 ވަނަ އަހަރު ޕެޓްރޯ ނިންމެވި ނިންމެވުން ބަދަލުކުރައްވާނެ ކަމަށާއި، ކޮލަމްބިއާގެ އެމްބަސީ ގުދުސްއަށް ބަދަލުކުރައްވާނެ ކަމަށްވެސް އޭނާ ވަނީ ވައުދުވެވަޑައިގެންފައެވެ.

އިސްރާއީލުގެ ބޮޑުވަޒީރު ނަތަންޔާހޫ ވަނީ ހޯމަ ދުވަހު އެސްޕްރިއޭލާއަށް މަރުހަބާ ވިދާޅުވެފައެވެ. ނަތަންޔާހޫ ވިދާޅުވީ، އިސްރާއީލާއި ކޮލަމްބިއާގެ ގުޅުން ބަދަހިކުރުމަށް އެސްޕްރިއޭލާއާއެކު މަސައްކަތް ކުރަން ބޭނުންވާ ކަމަށެވެ.

އެމެރިކާގެ ބަހަކީ ކޮބާ؟

ޕެޓްރޯ ކުރެއްވި ޕޯސްޓްތަކުގައި، ވަކި ކެންޑިޑޭޓަކަށް ފާޅުގައި ތާއީދުކުރައްވައި، ވޯޓުލާ މީހުންގެ ނިންމުމަށް ނުފޫޒު ފޯރުވި ކަމަށް ބުނެ ޓްރަމްޕަށްވެސް ވަނީ ތުހުމަތު ކުރައްވާފައެވެ.

އިންތިޚާބުގެ ދެވަނަ ބުރުގެ ހަފުތާތަކެއް ކުރިން ޓްރަމްޕް ވަނީ އޭނާގެ 'ޓްރުތް ސޯޝަލް' ޕްލެޓްފޯމުގައި އެސްޕްރިއޭލާއަށް ތާއީދުކުރައްވާކަން ހާމަކުރައްވާފައެވެ.

އެސްޕްރިއޭލާގެ ވަގުތީ ކާމިޔާބީއާ ގުޅިގެން ޓްރަމްޕާއި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ އޭނާއަށް މަރުހަބާ ވިދާޅުވެފައެވެ. އަދި އެސްޕްރިއޭލާގެ ކާމިޔާބީގެ ކްރެޑިޓް ޓްރަމްޕް ވަނީ ނަންގަވާފައެވެ.

"އޭނާ އޮތީ 10 ވަނައިގައި. އަޅުގަނޑު އޭނާއަށް ތާއީދުކުރުމުން އޭނާ އިންތިޚާބު ކާމިޔާބުކުރީ. ރޭ އޭނާ އަޅުގަނޑަށް ގުޅައި، ތާއީދުކުރީތީ ޝުކުރު އަދާކުރި،" ހޯމަ ދުވަހު ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވިއެވެ.

ރޫބިއޯ 'އެކްސް' ގައި ލިޔުއްވާފައިވަނީ، ސަރަހައްދީ ސަލާމަތީ ކަންކަމުގައި އެއްބާރުލުން ދިނުމަށާއި، އެމެރިކާއަށް ކުރާ ޣައިރު ގާނޫނީ ހިޖުރަ ހުއްޓުވުމަށާއި، އިގްތިސާދީ ގުޅުން ބަދަހިކުރުމަށް އެސްޕްރިއޭލާގެ ސަރުކާރާއެކު މަސައްކަތް ކުރަން ޓްރަމްޕްގެ ސަރުކާރުން ބޭނުންވާ ކަމަށެވެ.

އިންތިޚާބުގައި އޮޅުވާލުންތަކެއް ހުރި ކަމަށް ކުރެވޭ ތުހުމަތުތަކާ ގުޅޭގޮތުން ބަޔާނެއް ދެއްވުމަށް ޕެޓްރޯ ވަނީ ޓްރަމްޕަށް ދައުވަތު ދެއްވާފައެވެ.

"ރައީސް ޑޮނަލްޑް ޓްރަމްޕް ވާހަކަދެއްކެވުމަށް އަޅުގަނޑު ރަސްމީކޮށް ދައުވަތު އަރުވަން،" ޕެޓްރޯ ލިޔުއްވާފައިވެއެވެ. އޭނާ އިތުރަށް ވިދާޅުވީ، ކޮލަމްބިއާގެ ރައްޔިތުންގެ މިނިވަންކަމަށް ތާއީދުކުރުމުގެ ބަދަލުގައި ވަކި ކެންޑިޑޭޓަކަށް ތާއީދުކުރެއްވުމުގެ ޒިންމާ ޓްރަމްޕް އުފުއްލަވަން ޖެހޭނެ ކަމަށެވެ.

އެމެރިކާއާއި ކޮލަމްބިއާގެ ގުޅުން އޮތީ ކިހިނެއްތޯ؟

ދެ ގައުމުގެ ދެމެދުގައި ވިޔަފާރީގެ ބަދަހި ގުޅުމެއް އޮތް ނަމަވެސް، މަސްތުވާތަކެއްޗާ ދެކޮޅަށް ގެންގުޅޭ ސިޔާސަތުތަކާއި އިސްރާއީލާ އޮންނަ ގުޅުން ފަދަ ކަންކަމުގައި ދެ ގައުމުގެ ދެމެދުގައި ވަނީ ނުތަނަވަސްކަން އުފެދިފައެވެ.

ޚާއްސަކޮށް ޓްރަމްޕާއި ޕެޓްރޯގެ ސަރުކާރުގެ ދުވަސްވަރު މި ގުޅުން ވަނީ ވަރަށް ބޮޑަށް ހީނަރުވެފައެވެ.

މިދިޔަ އަހަރުގެ ޖެނުއަރީ މަހު، އެމެރިކާއިން ޑީޕޯޓްކޮށްލާ ކޮލަމްބިއާގެ ރައްޔިތުން ގޮވައިގެން އަންނަ ބޯޓުތައް ކޮލަމްބިއާއަށް ޖެއްސުން ޕެޓްރޯ ވަނީ މަނާކުރައްވާފައެވެ. އަދި އެމެރިކާއިން ކޮލަމްބިއާގެ ރައްޔިތުންނާ މެދު ކުށްވެރިން ފަދައިން އަމަލުކޮށްގެން ނުވާނެ ކަމަށް އޭނާ ވިދާޅުވިއެވެ.

މިދިޔަ އޮކްޓޯބަރު މަހު އެމެރިކާއިން ވަނީ ޕެޓްރޯއާއި، އޭނާގެ އާއިލާއާއި، ސަރުކާރުގެ އިސް އޮފިޝަލުންނާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އެއީ މަސްތުވާތަކެތީގެ ވިޔަފާރީގައި ބައިވެރިވާ ކަމަށް ބުނެ ކުރި ސާބިތުނުވާ ތުހުމަތުތަކެއްގެ މައްޗަށް ބިނާކޮށެވެ.

މީގެ އިތުރުން، މި އަހަރުގެ ޖެނުއަރީ މަހު އެމެރިކާގެ ސިފައިން ވަނީ ވެނެޒުއޭލާގެ ވާތުފިޔަހީގެ ރައީސް ނިކޮލަސް މަދޫރޯ އޭނާގެ ގޭގައި ހުންނަވަނިކޮށް ވަގަށް ނަގާފައެވެ. އެއީ މަދޫރޯއަކީ "ނާކޯޓެރަރިޒަމް" ނުވަތަ މަސްތުވާތަކެތީގެ ޓެރަރިޒަމް ހިންގާ ބޭފުޅެއް ކަމަށް ޓްރަމްޕްގެ ސަރުކާރުން ތުހުމަތު ކުރުމަށްފަހުގައެވެ.