ވޯލްޑް ކަޕް މެޗުތަކާ ދުރުގައި ޓްރަމްޕް އުޅުއްވަނީ ކީއްވެ؟

 އެމެރިކާގެ ރައީސް ޑޮނަލްޑް ޓްރަމްޕަކީ ވޯލްޑް ކަޕްގެ ތެރެއިން ވަރަށް ގިނައިން ފެނިވަޑައިގަންނަވާނެ ބޭފުޅެއް ކަމަށް ގިނަ ބަޔަކު އުއްމީދު ކުރިއެވެ.

ނަމަވެސް، އެމެރިކާގެ ގައުމީ ޓީމުން ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެ މެޗުން މޮޅުވެ، ނޮކްއައުޓް ބުރަށް ކޮލިފައިވެފައިވީ ނަމަވެސް، ރައީސް ޓްރަމްޕް އަދި މިހާތަނަށް އެއްވެސް މެޗަކަށް ހާޒިރުވެވަޑައިގެންފައެއް ނުވެއެވެ.

މިއީ ހައިރާންވާންޖެހޭ ކަމެއް ހެއްޔެވެ؟ އެމަނިކުފާނު މެޗުތަކާ ދުރުގައި ހުންނަވަނީ ކީއްވެގެން ބާވައެވެ؟ އަދި މުބާރާތުގެ ފައިނަލް މެޗުގެ ކުރިން އެމަނިކުފާނު ފެނިވަޑައިގަންނަވާނެ ހެއްޔެވެ؟ 

"އަޅުގަނޑުގެ ލޮބުވެތި އެމެރިކާގެ ރައްޔިތުންނާއި ދުނިޔޭގެ އެކި ކަންކޮޅުތަކުގެ ރައްޔިތުން، މި ކުލަގަދަ އުފާފާޅުކުރުމަށް މެހެމާންދާރީ އަދާކުރުމުގެ ފުރުސަތު އެމެރިކާއަށް ލިބުމަކީ ލިބޭ ވަރަށް ބޮޑު ޝަރަފެއް. ވޯލްޑް ކަޕަކީ ފާއިތުވި މަދު އަހަރުތަކެއްގެ ތެރޭގައި އަޅުގަނޑުމެންގެ ގައުމުގެ ސަމާލުކަން އަތުލާފައިވާ މުބާރާތެއް. އެހެންކަމުން، ކުރިއަށް އޮތް 30 ދުވަހު އެމެރިކާގައި ބާއްވާ މި މެޗުތައް ބަލަން އެކި ބައްރުތަކުންނާއި އެކި ގައުމުތަކުން ވަޑައިގެން ތިއްބެވި ހުރިހާ ބޭފުޅުންނަށް އަޅުގަނޑު މަރުހަބާ ކިޔަން."

މިއީ 1994 ވަނަ އަހަރުގެ ޖޫން މަހުގެ 17 ވަނަ ދުވަހު، އެމެރިކާގައި ބޭއްވި ފުރަތަމަ ވޯލްޑް ކަޕްގެ ފުރަތަމަ މެޗު ބެއްލެވުމަށް ޗިކާގޯގެ ސޯލްޖާ ފީލްޑަށް ވަޑައިގެން އޭރުގެ ރައީސް ބިލް ކްލިންޓަން ދެއްވި ތަގުރީރެވެ.

އެ ދުވަސް ބޮޑަށް ހަނދާން ހުންނަނީ ކްލިންޓަންގެ ތަގުރީރަށްވުރެ ބޮޑަށް، މެޗުގެ ކުރިން ބޭއްވި ހަރަކާތްތަކުގައި ޑަޔާނާ ރޮސް އަތުން 'ޕެނަލްޓީ' ނާކާމިޔާބުވި ހާދިސާއިންނެވެ. ނަމަވެސް، މިއަދު އެމެރިކާގެ ރައީސް ގެ ހައިސިއްޔަތުން މެޗެއް ބައްލަވާލައްވަން ހާޒިރުވެވަޑައިގަތުމަކީ މާ މުހިންމު ކަމެއްގެ ގޮތުގައި ފާހަގަކުރެވެއެވެ.

ސަބަބަކީ، 32 އަހަރަށްފަހު އެމެރިކާއިން އަލުން މި މުބާރާތް ބާއްވަމުންދާއިރު، މުބާރާތުގެ ދެބައިކުޅަ އެއްބައި ފާއިތުވެގެންދިޔައިރުވެސް މިހާރުގެ ރައީސް މެޗުތަކާ ދުރުގައި ހުންނެވުމެވެ.

މި މަހުގެ ކުރީކޮޅު ޓްރަމްޕް ވަނީ ފީފާއިން ވިއްކާފައިވާ ޓިކެޓްގެ އަދަދަށް ތައުރީފު ކުރައްވައި، މިއީ "މިހާތަނަށް ބޭއްވޭ އެންމެ ކާމިޔާބު ވޯލްޑް ކަޕް" ކަމަށް ސިފަކުރައްވާފައެވެ. މިއާއެކު، ގިނަ ބަޔަކު ގަބޫލުކުރީ އެމަނިކުފާނަކީ މުބާރާތުގެ ތެރެއިން ވަރަށް ބޮޑަށް ފެނިވަޑައިގަންނަވާނެ، ފޯރިގަދަ ބޭފުޅަކަށް ވާނެ ކަމަށެވެ.

އަދި މުބާރާތުގެ ތައްޔާރީތަކުގެ ތެރޭގައިވެސް، މި މުބާރާތަކީ އެމަނިކުފާނަށް ވަރަށް މުހިންމު ކަމެއްގެ ގޮތުގައި ފެނުނެވެ. މިދިޔަ އަހަރުގެ ކުރީކޮޅު ރައީސްކަމުގެ ހުވާކުރެއްވުމުގެ ކުރިން ބޭއްވި އެއްވުމެއްގައިވެސް އެމަނިކުފާނު ވަނީ މި މުބާރާތާ ގުޅޭގޮތުން ވާހަކަދައްކަވާފައެވެ.

މީގެ އިތުރުން، މިދިޔަ ޑިސެމްބަރު މަހު ވޮޝިންޓަން ޑީސީގައި ބޭއްވި ގުރުއަތުލުމުގެ ރަސްމިއްޔާތުގައިވެސް ޓްރަމްޕް ވަނީ މުހިންމު ދައުރެއް އަދާކުރައްވާފައެވެ. އެ ރަސްމިއްޔާތުގައި ފީފާގެ ރައީސް ޖިއާނީ އިންފަންޓީނޯ ވަނީ ޓްރަމްޕަށް ފީފާގެ ފުރަތަމަ 'ޕީސް ޕްރައިޒް' ނުވަތަ ސުލްހައިގެ އިނާމު އަރުވާފަ އެވެ.

ފާއިތުވި އަހަރުތަކުގައި މި ދެ ބޭފުޅުންގެ މެދުގައި ވަނީ ގާތް ގުޅުމެއް އުފެދިފައެވެ. އިންފަންޓީނޯ ވަނީ ވައިޓް ހައުސްގެ އޯވަލް އޮފީހަށާއި، ފްލޮރިޑާގައި ހުންނަ ޓްރަމްޕްގެ މާ-އަ-ލާގޯ ރެސިޑެންސަށްވެސް ޒިޔާރަތްކުރައްވާފަ އެވެ.

ޓްރަމްޕްގެ ދެވަނަ ދައުރުގައި އެމެރިކާގައި ބޭއްވި ބޮޑެތި ކުޅިވަރު ހަރަކާތްތަކުން އެމަނިކުފާނު ގަވާއިދުން ފެނިފައިވެ އެވެ. އޭގެ ތެރޭގައި ސުޕަ ބޯލް އާއި، މިދިޔަ ހޫނު މޫސުމުގައި ބޭއްވި ކްލަބް ވޯލްޑް ކަޕް ފައިނަލްގެ އިތުރުން، ރައިޑާ ކަޕް ގޮލްފް މުބާރާތް ހިމެނެއެވެ.

ނަމަވެސް، ޖޫން 12 ވަނަ ދުވަހު ލޮސް އެންޖެލިސްގައި ބޭއްވި ފެށުމުގެ ރަސްމިއްޔާތަށްފަހު، މުބާރާތް ބާއްވާ އެއް ގައުމުގެ ހައިސިއްޔަތުން އެމެރިކާ އާއި ޕެރަގުއޭ ބައްދަލުކުރި ފުރަތަމަ މެޗުން ރައީސް ފެނިގެން ނުދިޔުމަކީ ފާހަގަކޮށްލެވުނު ކަމެކެވެ. އެމަނިކުފާނުގެ ބަދަލުގައި ވޮޝިންޓަނުން އެ މެޗަށް ވަޑައިގަތީ ސެކްރެޓަރީ އޮފް ސްޓޭޓް މާކް ރޫބިއޯ އެވެ.

ބެލެވޭ ގޮތުގައި ޓްރަމްޕް އިސްކަންދެއްވީ އޭގެ ދެ ދުވަސް ފަހުން ވައިޓް ހައުސްގެ ގޯތިތެރޭގައި ބޭއްވި އަލްޓިމޭޓް ފައިޓިންގ ޗެމްޕިއަންޝިޕް (ޔޫއެފްސީ) ހަރަކާތަކަށެވެ. އެއީ އެމަނިކުފާނުގެ 80 ވަނަ އުފަންދުވަހާއި އެމެރިކާއަށް 250 އަހަރު ފުރުން ފާހަގަކުރުމަށް ބޭއްވި ހަރަކާތެކެވެ.

މިއީ ހައިރާންވާންޖެހޭ ކަމެއް ހެއްޔެވެ؟

އާންމުކޮށް ވޯލްޑް ކަޕް ބާއްވާ ގައުމުތަކުގެ އިސްވެރިން އެ ގައުމެއްގެ ފުރަތަމަ މެޗަށް ހާޒިރުވެވަޑައިގަންނަވަ އެވެ. މީގެ ހަތަރު އަހަރު ކުރިން ގަތަރުގެ އަމީރު ޝެއިޚް ތަމީމް ބިން ހަމަދު އަލްޘާނީ އެ ގައުމުގެ ފުރަތަމަ މެޗަށް ވަޑައިގަތެވެ. އަދި 2018 ވަނަ އަހަރު މޮސްކޯގައި ބޭއްވި ރަޝިއާގެ ފުރަތަމަ މެޗު ލަޑީމިއަރ ޕޫޓިން ބެއްލެވި އެވެ.

ކުރީގެ ރައީސް ބަރަކް އޮބާމާގެ މީޑިއާ ޑައިރެކްޓަރުގެ މަގާމު އަދާކުރެއްވި ސިޔާސީ މާހިރު ފެޑެރިކޯ ޑި ޖީސަސް ވިދާޅުވާ ގޮތުގައި، މިއީ ޓްރަމްޕްގެ މިޒާޖާ ބަލާއިރު އާދަޔާ ހިލާފު ކަމެއް ނޫނެވެ.

"ޔޫއެފްސީއަކީ ޓްރަމްޕް ވަރަށް ބޮޑަށް ކުރިއަރުވާފައިވާ، އަދި އެމަނިކުފާނާ ހާއްސަ ގުޅުމެއް އޮންނަ ކުޅިވަރެއް،" އޭނާ ބީބީސީ ސްޕޯޓްސްއަށް ކިޔައިދިނެވެ.

"އަދި އެމަނިކުފާނު އެހެން ކުޅިވަރު ހަރަކާތްތަކަށް ވަޑައިގަންނަވާ ވަގުތުތަކަށް ބަލާލަމާ ހިނގާށެވެ. މިދިޔަ އަހަރު ނިއު އޯލިއަންސްގައި ބޭއްވި ސުޕަ ބޯލްއަށް ވަޑައިގަތީ ފައިނަލް މެޗަށެވެ. އާދައިގެ މެޗުތަކަކަށް ނޫނެވެ. ވޯލްޑް ކަޕް ފައިނަލަކީ އެންމެ ގިނަ ބަޔަކު ބަލާނެ މައިގަނޑު ހަރަކާތެވެ. މިފަހަރުވެސް ކަންތައް ވާނީ އެހެން ކަމަށް ބެލެވެ އެވެ."

ހަގީގަތުގައިވެސް، އެމެރިކާއިން އޮސްޓްރޭލިއާ (ސިއެޓްލްގައި) އަދި ތުރުކީ (ލޮސް އެންޖެލިސްގައި) އާ ދެކޮޅަށް ކުޅުނު މެޗަށްވެސް ޓްރަމްޕް ވަޑައިގެންފައެއް ނުވެއެވެ.

ޑި ޖީސަސް ދެކޭގޮތުގައި ރައީސް އޮބާމާ ނަމަ މިކަމުގައި އަމަލުކުރައްވާނީ މުޅިން ތަފާތު ގޮތަކަށެވެ. އޮބާމާ ނަމަ ފެށުމުގެ ރަސްމިއްޔާތަށް ވަޑައިގެން، ހިތްހެޔޮ މެހެމާންދާރީއެއް ދައްކަވައި، ޑިޕްލޮމެޓިކް އުސޫލުން ކަންކަން ކުރެއްވީސް ކަމަށް އޭނާ ބުންޏެވެ. ނަމަވެސް ޓްރަމްޕަކީ މުޅިން ތަފާތު މިޒާޖެއްގެ ބޭފުޅެއްކަން އޭނާ ފާހަގަކުރި އެވެ.

އަދި މި މަހުގެ ކުރީކޮޅު ނިއު ޔޯކްގައި ބޭއްވި އެންބީއޭ ފައިނަލްސްއަށް ވަޑައިގަތުމުން އާންމުންގެ ފަރާތުން ކުރިމަތިވި ނުރުހުމުގެ އަޑުތަކުގެ ސަބަބުން، ރައީސް ޓްރަމްޕް މިފަދަ ހަރަކާތްތަކަށް ވަޑައިގަތުމަށް "ޖެހިލުންވެވަޑައިގަންނަވަނީ" ކަމަށްވެސް އޭނާ ގަބޫލުކުރެ އެވެ. ހާއްސަކޮށް ވޯލްޑް ކަޕް މެޗުތަކުގައި އެހެން ގައުމުތަކުގެ ގިނަ އަދަދެއްގެ ބަޔަކު ތިބޭނެތީ އެވެ.

ޓްރަމްޕް ސަރުކާރުގެ ބައެއް ހާރިޖީ އަދި ހިޖުރަކުރުމާ ގުޅޭ ސިޔާސަތުތަކުގެ ސަބަބުން އުފެދިފައިވާ ހިޔާލުތަފާތުވުންތަކާ ހުރެ، ހާއްސަކޮށް ޑިމޮކްރެޓުންގެ ބާރުގަދަ ސިއެޓްލް އާއި ލޮސް އެންޖެލިސް ފަދަ ސިޓީތަކުން އެމަނިކުފާނަށް ލިބިދާނެ މަރުހަބާއަކާ މެދު ވައިޓް ހައުސްގެ މުވައްޒަފުން ކަންބޮޑުވުން ފާޅުކޮށްފައި އޮވެދާނެ އެވެ.

ފައިނަލްގެ ކުރިން ޓްރަމްޕް ފެނިވަޑައިގަނެފާނެ ހެއްޔެވެ؟

އިންފަންޓީނޯ ކަށަވަރުކޮށްދެއްވާފައިވާ ގޮތުގައި، ޖުލައި 19 ވަނަ ދުވަހު ނިއު ޖާޒީގައި ބާއްވާ ފައިނަލް މެޗަށް ޓްރަމްޕް ވަޑައިގެން، މުބާރާތުގެ ތަށި ހަވާލުކޮށްދެއްވުމަކީ އޮތް އަމާޒެކެވެ. އަދި އެކަމަށް އެދިވަޑައިގެންފައިވާ ކަމަށް ރައީސް ޓްރަމްޕްވެސް ވަނީ ކަށަވަރުކޮށްދެއްވާފަ އެވެ.

ނަމަވެސް، ވައިޓް ހައުސްގެ ވޯލްޑް ކަޕް ޓާސްކް ފޯހުގެ އިސްވެރިޔާ އެންޑްރޫ ގިއުލިއާނީ އިޝާރާތް ކުރެއްވި ގޮތުގައި، ފައިނަލް މެޗުގެ ކުރިންވެސް އެމަނިކުފާނު ފެނިވަޑައިގަތުމަކީ އެކަށީގެންވާ ކަމެކެވެ.

"އަޅުގަނޑުގެ ބޮސް، އަދި 47 ވަނަ ރައީސާ ބެހޭގޮތުން އެއްޗެއް ބުނާނަމަ - އަޅުގަނޑު އެމަނިކުފާނު ދަންނަތާ މިހާރު ގާތްގަނޑަކަށް 30 އަހަރު ވެއްޖެ - އެމަނިކުފާނަކީ ކަންކަން ސިއްރުކޮށްފައި ބޭއްވުމަށް ލޯބިކުރައްވާ ބޭފުޅެއް،" ގިއުލިއާނީ ވިދާޅުވިއެވެ.

"އެމަނިކުފާނު ބޭނުންފުޅުވަނީ މީހުން އިންތިޒާރުގައި ބައިތިއްބަން. އެހެންވީމާ، އަޅުގަނޑު ބުނާނީ ބަލަން ތިއްބަވާށޭ، ކޮންމެވެސް ކަހަލަ ސަޕްރައިޒްތަކެއް ފެންނާނެކަން ޔަގީނޭ."

ޓްރަމްޕްގެ މަސައްކަތްޕުޅަށް ބަލާއިރު، އެމަނިކުފާނުގެ ތާވަލު އޮތީ ވަރަށް ބާރުބޮޑުކޮށެވެ. އެމެރިކާގެ ފުރަތަމަ މެޗު އޮތް ދުވަސްވަރު، ޖޫން 15 އިން 17 އަށް ފްރާންސްގައި ބޭއްވި ޖީ7 ސަމިޓަށް ވަޑައިގަތުމަށް އެމަނިކުފާނު ދިޔައީ ތައްޔާރުވަމުންނެވެ. އަދި އީރާނާއެކު ސުލްހައިގެ އެއްބަސްވުމެއް ގާއިމުކުރުމުގެ މަޝްވަރާތަކުގައިވެސް އުޅުއްވި އެވެ. އެ އެއްބަސްވުން އިއުލާންކުރީ ޖޫން 18 ގަ އެވެ.

އަނެއްކޮޅުން، ކެނެޑާގެ ބޮޑުވަޒީރު މާކް ކާނީ ވެންކޫވަރގައި ބޭއްވި އެ ގައުމުގެ މެޗަށް ވަޑައިގެންނެވި ނަމަވެސް، މެކްސިކޯގެ ރައީސް ކްލައުޑިއާ ޝެއިންބައުމް ވަނީ ޓިކެޓްގެ އަގު ބޮޑުވުމުގެ ސަބަބުން އެއްވެސް މެޗަކަށް ވަޑައިނުގަންނަވާނެ ކަމަށް ވިދާޅުވެފަ އެވެ.

ޓްރަމްޕާ ގާތް ބޭފުޅުން ބުނާ ގޮތުގައި، އެމަނިކުފާނު އަދި މެޗަކަށް ވަޑައިނުގަތުމަކީ މުބާރާތުގައި ބައިވެރިވެވަޑައިނުގަންނަވާ ކަމުގެ ހެއްކެއް ނޫނެވެ. އެމެރިކާގެ ފުރަތަމަ މެޗުގެ ކުރީ ދުވަހުވެސް އެމަނިކުފާނު ވަނީ ޓީމަށް ފޯނުން ގުޅުއްވައި ހިތްވަރު ދެއްވާފަ އެވެ.

ވޯލްޑް ކަޕްގެ ތެރޭގައި އެމެރިކާ ސަރުކާރުގެ ފަރާތުން ލިބެމުންދާ އެއްބާރުލުމަށް ފީފާއިން ޝުކުރުވެރިވާ ކަމަށް ބުނެ އެވެ. ސެކްރެޓަރީ އޮފް ހޯމްލޭންޑް ސެކިއުރިޓީ މާކްވޭން މުލިން އާއި، ހެލްތު ސެކްރެޓަރީ ރޮބަޓް އެފް ކެނެޑީ އަދި ޓްރާންސްޕޯޓް ސެކްރެޓަރީ ޝޯން ޑަފީ ވަނީ މެޗުތަކަށް ހާޒިރުވެވަޑައިގެންފަ އެވެ.

ނަމަވެސް، މިފަދަ ބޮޑެތި ހަރަކާތްތަކުން ލިބޭ ސަމާލުކަމާއި ފުރުސަތުތަކުގެ ބޭނުން ހިފުމަށް ރައީސް ޓްރަމްޕް އަބަދުވެސް ޝައުގުވެރިކަން ބަހައްޓަވާތީ، ފައިނަލްގެ ކުރިންވެސް އެމަނިކުފާނު ފެނިވަޑައިގަތުމަކީ ހައިރާންވާންޖެހޭނެ ކަމެއް ނޫނެވެ.