ދުވަހަކުވެސް އީރާނުގެ ދިފާއީ ގާބިލިއްޔަތާ ގުޅޭ މަޝްވަރާއެއް ނުކުރާނަން، މިސައިލްތައް ނެތް ނަމަ އީރާނުވެސް ވާނީ ދެވަނަ ޣައްޒާ އަށް: އީރާނުގެ ރައީސް

އީރާނުގެ ބެލިސްޓިކް މިސައިލް ޕްރޮގްރާމަކީ އެއްވެސް މަޝްވަރާއެއް ކުރެވޭނެ ކަމެއް ނޫން ކަމަށް ބަޔާންކުރައްވައި، އެ ގައުމުގައި މިސައިލް ނެތް ނަމަ އީރާނުގެ ހާލަތުވެސް އޮންނާނީ "ޣައްޒާ ފަދައިން" ކަމަށް އެ ގައުމުގެ ރައީސް މަސްއޫދު ޕެޒެޝްކިއަން އަންގާރަ ދުވަހު ވިދާޅުވެއްޖެއެވެ.

މެދުއިރުމަތީގެ ހަނގުރާމަ ދާއިމީކޮށް ހުއްޓާލުމަށްޓަކައި ތެހެރާނާއި ވޮޝިންޓަނާ ދެމެދު މެދުވެރިއެއްގެ ދައުރު އަދާކުރާ ޕާކިސްތާނަށް ކުރެއްވި ޒިޔާރަތެއްގައި ޕެޒެޝްކިއަން ވިދާޅުވީ، އީރާނު ދިފާއުވުމަށް މިސައިލްތައް ނެތް ނަމަ، ކުޑަކުއްޖަކަށް ނުވަތަ މުސްކުޅިއަކަށް ބެލުމެއް ނެތި، އިޒްރޭލާއި އެމެރިކާއިން ޣައްޒާ ސުންނާފަތިކޮށްލި ފަދައިން އީރާނުވެސް ސުންނާފަތިކޮށްލާނެ ކަމަށެވެ.

އޭނާ އިތުރަށް ވިދާޅުވީ، އެއްވެސް ހާލަތެއްގައި އަދި އެއްވެސް ފަރާތަކާއެކު އީރާނުގެ ދިފާއީ ގާބިލިއްޔަތާ ގުޅޭގޮތުން ދުވަހަކުވެސް މަޝްވަރާ ނުކުރާނެ ކަމަށެވެ.

މި ދަނޑިވަޅުގައި ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ، އެމެރިކާއާއި އީރާނުގެ އިތުރުން މެދުވެރިންގެ މެދުގައި ސޮއިކުރެވުނު އިބްތިދާއީ އެއްބަސްވުމުގައި ބެލިސްޓިކް މިސައިލްތަކާ ބެހޭ އެއްވެސް ވާހަކައެއް ހިމަނާފައި ނުވާކަން ކަށަވަރުކޮށްދެއްވާފައެވެ.

އެމެރިކާއާއި އިޒްރޭލުން ގުޅިގެން އީރާނަށް ދިން ހަމަލާތަކާ ގުޅިގެން ފެށުނު ހަނގުރާމައިގެ ތެރޭގައި، ތެހެރާނުން ވަނީ އަވަށްޓެރި ގަލްފުގެ ގައުމުތަކަށާއި އިޒްރޭލަށް އެތައް ސަތޭކަ މިސައިލަކާއި އެތައް ހާސް ޑްރޯން ހަމަލާއެއް ފޮނުވާލާފައެވެ.

އީރާނުގެ މިސައިލް ޕްރޮގްރާމަކީ 1980 ގެ އަހަރުތަކުގައި އިރާގާއެކު ކުރި ހަނގުރާމައިގައި އެ ގައުމުގެ ވައިގެ ދިފާއީ ނިޒާމު ބަލިކަށިވުމުން، އެކަން ފޫބެއްދުމަށް ފެށި މަސައްކަތެކެވެ. އޭގެ ފަހުން އެ މިސައިލްތަކުގެ ރޭންޖާއި އަމާޒަށް ވާސިލުވުމުގެ ގާބިލިއްޔަތު ވަނީ ވަރަށް ބޮޑަށް އިތުރުކޮށްފައެވެ.

އީރާނާ 1,500 ކިލޯމީޓަރު (930 މޭލު) ދުރުގައި އޮންނަ އިޒްރޭލުން އަބަދުވެސް ދެކެމުން އައީ އީރާނުގެ މިސައިލް ޕްރޮގްރާމަކީ އެ ގައުމުގެ ދެމިއޮތުމަށް އޮތް ނުރައްކަލެއްގެ ގޮތުގައެވެ.

މި ހަނގުރާމަ ފެށުމުގެ ކުރިން، އެމެރިކާއިން މަސައްކަތް ކުރަމުން ދިޔައީ އީރާނުގެ ނިއުކްލިއާ މަޝްވަރާތަކުގެ ތެރޭގައި ބެލިސްޓިކް މިސައިލް ޕްރޮގްރާމާއި، ހަތިޔާރު އެޅި ޖަމާއަތްތަކަށް އީރާނުން ދޭ އެހީތެރިކަމުގެ މައްސަލަ ހިމެނުމަށެވެ.

ނަމަވެސް، ފާއިތުވި ދުވަސްތަކުގައި އެމެރިކާގެ ރައީސް ޑޮނަލްޑް ޓްރަމްޕް ވަނީ މިސައިލް މައްސަލައިގައި ގެންގުޅުއްވާ ހަރުކަށި ސިޔާސަތަށް ކޮންމެވެސް ވަރެއްގެ ލުޔެއް ދެއްވާފައެވެ.

މިދިޔަ ހަފުތާގައި ފަރަންސޭސިވިލާތުގައި ބޭއްވި ޖީ7 ސަމިޓުގައި ވާހަކަދައްކަވަމުން ޓްރަމްޕް ވިދާޅުވީ، އެހެން ގައުމުތަކުގައި މިފަދަ ހަތިޔާރު ހުންނައިރު، އީރާނުގައި އެފަދަ އެއްޗެއް ނެތުމަކީ އެ ގައުމަށް އޮތް ބޭއިންސާފެއް ކަމަށް ގަބޫލުކުރައްވާ ކަމަށެވެ.