ޔޫރަޕިއަން ކޮމިޝަންގެ ގެ ރައީސާ އާއި ޒެލެންސްކީ ހިމެނޭ ސިއްރު ގްރޫޕް ޗެޓަކާ ގުޅިގެން ތަހުގީގެއް ފަށައިފި
ޔޫރަޕްގެ އިސް ލީޑަރުންތަކެއް ހިމެނޭ ސިއްރު ގްރޫޕް ޗެޓެއްގެ މެސެޖުތައް ހާމަކުރަން ޔޫރަޕިއަން ކޮމިޝަނުން އިންކާރުކުރުމާ ގުޅިގެން، އީޔޫގެ އޮމްބަޑްސްމަން އެ މައްސަލަ ތަހުގީގު ކުރަން ފަށައިފިއެވެ. "ވޮޝިންގޓަން ގްރޫޕް" ގެ ނަމުން ނަންދެވިފައިވާ މި ގްރޫޕްގައި ލީޑަރުން މަޝްވަރާކުރައްވަނީ ޔޫކްރެއިން ހަނގުރާމައާއި އެމެރިކާގެ ސިޔާސަތުތަކާ ގުޅޭގޮތުން ކަމަށް ރިޕޯޓްތައް ބުނޭ.
2026 ވަނަ އަހަރުގެ މޭ މަހުގެ 4 ވަނަ ދުވަހު ޔެރެވަންގައި ބޭއްވި ޔޫރަޕިއަން ޕޮލިޓިކަލް ކޮމިއުނިޓީ (އީ.ޕީ.ސީ) ގެ އަށްވަނަ ސަމިޓުގައި، ޔޫރަޕިއަން ކޮމިޝަނުގެ ރައީސް އުރުސުލާ ވޮން ޑަރ ލަޔަން އާއި ޔޫކްރެއިންގެ ރައީސް ޒެލެންސްކީ ބައިވެރިވެވަޑައިގަންނަވަނީ. | ގެޓީ އިމޭޖަސް
ޔޫރަޕިއަން ކޮމިޝަންގެ ރައީސާ އުރުސުލާ ވޮން ޑަ ލޭޔަން އާއި ޔޫކްރެއިންގެ ރައީސް ވްލަޑިމިއަރ ޒެލެންސްކީގެ އިތުރުން ޔޫރަޕްގެ ބައެއް އިސް ލީޑަރުން ހިމެނޭ ސިއްރު ގްރޫޕް ޗެޓަކާ ގުޅިގެން، އީޔޫގެ ވޮޗްޑޮގުން އެ މައްސަލަ ތަހުގީގު ކުރަން ފަށައިފިއެވެ. މިކަން ހާމަކޮށްފައިވަނީ ނެދަލޭންޑްސްގެ ނޫހެއް ކަމަށްވާ "ފޮލޯ ދަ މަނީ" (އެފްޓީއެމް) އިންނެވެ.
މި ތަހުގީގު ފަށާފައިވަނީ، ޖަރުމަނުގެ ޗާންސެލަރ ފްރީޑްރިކް މާރޒް އާއި، ފަރަންސޭސި ރައީސް އެމަނުއެލް މެކްރޮން އާއި، އިޓަލީގެ ބޮޑުވަޒީރު ޖޯޖިއާ މެލޯނީގެ އިތުރުން އިނގިރޭސިވިލާތުގެ ކުރީގެ ބޮޑުވަޒީރު ކިއަރ ސްޓާމަރ ހިމެނިވަޑައިގަންނަވާ ކަމަށް ބުނާ މި ސިއްރު ގްރޫޕް ޗެޓްގެ މެސެޖުތައް ހާމަކުރުމަށް ޔޫރަޕިއަން ކޮމިޝަނުން އިންކާރު ކުރުމާ ގުޅިގެން އެފްޓީއެމް އިން ހުށަހެޅި ޝަކުވާއަކާ ގުޅިގެންނެވެ. ކޮމިޝަނުން ބުނެފައިވަނީ މި މެސެޖުތައް ހާމަކޮށްފިނަމަ، ބޭރުގެ ގައުމުތަކާއެކު އީޔޫއިން ބާއްވާ ގުޅުންތަކަށް ބުރޫއަރާފާނެ ކަމަށެވެ.
މިދިޔަ ހަފުތާގައި ކޮމިޝަނަށް ފޮނުއްވި ސިޓީއަކާ ހަވާލާދީ އެ ނޫހުން ބުދަ ދުވަހު ރިޕޯޓްކޮށްފައިވާ ގޮތުގައި، ޔޫރަޕިއަން އޮމްބަޑްސްމަން ޓެރޭސާ އަންޖީނިއޯ ވަނީ މި މެސެޖުތައް ހާމަނުކުރަން ނިންމި ނިންމުމާ ގުޅިގެން ތަހުގީގެއް މިހާރު ފައްޓަވާފައެވެ.
އަންޖީނިއޯ ވިދާޅުވި ގޮތުގައި، މި ތަހުގީގުގައި ބަލާނީ މެސެޖުތައް ދޫކުރުމަށް އިންކާރު ކުރިއިރު، އީޔޫގެ ދެފުށް ފެންނަ އުސޫލުތަކަށް ކޮމިޝަނުން އަމަލުކޮށްފައިވޭތޯއެވެ. އަދި ޖުލައި މަހުގެ މެދުތެރޭގައި ކޮމިޝަންގެ މަންދޫބުންނާ ބައްދަލުކުރުމަށް އެދިވަޑައިގެންފައިވާ ކަމަށްވެސް އެފްޓީއެމް އިން ރިޕޯޓްކޮށްފައިވެއެވެ.
"ވޮޝިންގޓަން ގްރޫޕް" ގެ ނަމުން ނަންދެވިފައިވާ މި ގްރޫޕް ޗެޓާ ބެހޭ މައުލޫމާތު އެންމެ ފުރަތަމަ ރިޕޯޓްކޮށްފައިވަނީ މިދިޔަ ޖެނުއަރީ މަހު "ޕޮލިޓިކޯ" ނޫހުންނެވެ. އެ ނޫހުން ބުނެފައިވާ ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ސިޔާސަތުތަކުގެ ތެރެއިން ގެއްލުންވެދާނެ ކަމަށް ބެލެވޭ ކަންކަމާ ގުޅޭގޮތުން މި ގްރޫޕްގައި ލީޑަރުން މަޝްވަރާ ކުރައްވައެވެ. މީޑިއާ ރިޕޯޓްތައް ބުނާގޮތުގައި މި ގްރޫޕް އެންމެ ފުރަތަމަ އުފެއްދީ ޔޫކްރެއިންގެ ހަނގުރާމައާ ގުޅިގެންނެވެ.
މި މައްސަލައަކީ އުރުސުލާ ވޮން ޑަ ލޭޔަން އާއި ޔޫރަޕިއަން ކޮމިޝަނުން ރަސްމީ ލިޔެކިޔުންތައް ބެލެހެއްޓުމުގައި އަމަލުކުރާ ގޮތާ މެދު އުފެދިފައިވާ ގިނަ މައްސަލަތަކުގެ ތެރެއިން އެންމެ ފަހުގެ މައްސަލައެވެ.
މިދިޔަ އަހަރު އީޔޫގެ ޖެނެރަލް ކޯޓުން ވަނީ، ކޮވިޑް-19 ގެ ވެކްސިން ކޮންޓްރެކްޓްތަކާ ގުޅޭގޮތުން ވޮން ޑަ ލޭޔަން އާއި ފައިޒާ ކުންފުނީގެ ސީއީއޯ އަލްބަރޓް ބޯލާ ބަދަލުކުރެއްވި މެސެޖުތައް ހޯދުމަށް ނިއުޔޯކް ޓައިމްސް އިން ހުށަހެޅި މައްސަލަ ކޮމިޝަނުން ބެލެހެއްޓީ ރަނގަޅަށް ނޫން ކަމަށް ނިންމާފައެވެ. އޭގެ ފަހުން ކޮމިޝަނުން ވަނީ ރެކޯޑްތައް ބެލެހެއްޓުމުގެ އުސޫލުތައް މުރާޖައާ ކުރާނެ ކަމަށް ވައުދުވެފައެވެ.
މީގެ އިތުރުން، ދެކުނު އެމެރިކާގެ މާކޯސޫރް ގްރޫޕާއެކު އީޔޫއިން ހަދަން އުޅޭ ވިޔަފާރީގެ އެއްބަސްވުމާ ގުޅޭގޮތުން ފަރަންސޭސި ރައީސް މެކްރޮން ފޮނުއްވި މެސެޖެއް ފޮހެލާފައިވާތީ، މި މަހުގެ ކުރީކޮޅު އަންޖީނިއޯ ވަނީ އެކަމަށް ފާޑުވިދާޅުވެފައެވެ.
މައުލޫމާތު ހޯދައި ލިބިގަތުމުގެ ހައްގުގެ ދަށުން އެ މެސެޖު ހޯދަން އެދުމުން، ކޮމިޝަނުން ބުނެފައިވަނީ އެ މެސެޖަކީ އަމިއްލައަށް ފޮހެވޭ ގޮތަށް އިންނަ (އޮޓޯ-ޑިލީޓް) މެސެޖެއް ކަމުން އެ ފޮހެވިފައިވާ ކަމަށެވެ.
އެފްޓީއެމް އިން ހުށަހެޅި ޝަކުވާއަކާ ގުޅިގެން އޮމްބަޑްސްމަން ނިންމެވީ އެ މެސެޖު ފޮހެލާފައިވަނީ ގާނޫނާ ޚިލާފަށް ކަމަށެވެ. އަދި މެސެޖުތައް ހިމެނޭހެން ރަސްމީ މުއާމަލާތްތައް ރައްކާތެރިކޮށް އާކައިވް ކުރުމުގެ ނިޒާމު ހަރުދަނާ ކުރުމަށް އަންޖީނިއޯ ވަނީ ކޮމިޝަނަށް ގޮވާލައްވާފައެވެ.
