އީރާނާ ދެކޮޅަށް އެމެރިކާއިން ހިންގާ އަސްކަރީ ހަރަކާތްތަކުގައި އިޓަލީން ބޮޑު އެއްބާރުލުމެއް ދޭކަމަށް ނޭޓޯގެ ސެކްރެޓަރީ ޖެނެރަލް ވިދާޅުވި ވާހަކަތައް އެ ގައުމުގެ ޑިފެންސް މިނިސްޓްރީން ދޮގުކޮށްފި

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގައި އިޓަލީން ބައިވެރިވާ މިންވަރަށް ތައުރީފުކުރައްވައި، ނޭޓޯގެ ސެކްރެޓަރީ ޖެނެރަލް މާކް ރޫޓާ ދެއްކެވި ވާހަކަތައް އިޓަލީގެ ޑިފެންސް މިނިސްޓްރީން ދޮގުކޮށްފިއެވެ.

ފޮކްސް ނިއުސްއަށް ދެއްވި އިންޓަވިއުއެއްގައި ނޭޓޯގެ ވެރިޔާ ވިދާޅުވީ، އީރާނުގެ ސަރުކާރު ވައްޓާލުމަށް އެމެރިކާއާއި އިސްރާއީލުން ކުރަމުންދާ މަސައްކަތްތަކަށް ވިލާތުގެ ގައުމުތަކުން "ބޮޑު" އެއްބާރުލުމެއް ދެމުންދާ ކަމަށެވެ.

ރުޓާ ވިދާޅުވި ގޮތުގައި "އޮޕަރޭޝަން އެޕިކް ފިއުރީ" އަށް އެއްބާރުލުން ދިނުމުގެ ގޮތުން ވިލާތުގެ އަސްކަރީ މަރުކަޒުތަކުން އެމެރިކާއިން ކުރި 4،000 އާއި 5،000 އާ ދެމެދުގެ އަސްކަރީ ދަތުރުތަކުގެ ތެރެއިން 500 ދަތުރަކީ ހަމައެކަނި އިޓަލީގެ ހިއްސާއެވެ.

މިކަމާ ގުޅިގެން އިޓަލީގެ އަސްކަރިއްޔާއިން ބުދަ ދުވަހު ބުނީ، އެ ގައުމުގެ ދައުރަކީ ހަމައެކަނި "ޓެކްނިކަލް އަދި ލޮޖިސްޓިކަލް، ނޮން-ކައިނެޓިކް" (ސީދާ ހަމަލާދިނުމުގައި ބައިވެރިނުވާ) ހަރަކާތްތަކެއް ކަމަށެވެ. އަދި އެއީ އިޓަލީގެ ގާނޫނުއަސާސީއާއި، އެ ގައުމުގެ އަސްކަރީ މަރުކަޒުތައް އެމެރިކާއަށް ބޭނުންކުރެވޭނެ ގޮތާ މެދު ޕާލަމަންޓުން ފާސްކޮށްފައިވާ ޝަރުތުތަކާ އެއްގޮތަށް ކުރިއަށްދާ ކަންކަން ކަމަށްވެސް ބުނެފައިވެއެވެ.

އިޓަލީގެ ޑިފެންސް މިނިސްޓްރީގެ ބަޔާނުގައި ބުނެފައިވަނީ، "އޮޕަރޭޝަން އެޕިކް ފިއުރީ" އާ އެއްވެސް ގުޅުމެއް ނެތް ނޭޓޯގެ ސެކްރެޓަރީ ޖެނެރަލް، ހުއްދަދެވިފައިވާ އުދުހުންތަކުގެ ބާވަތްތައް އޮޅުވާލައްވައި، މުޅިން ދޮގު މެސެޖެއް ލިބޭ ފަދަ ގޮތަކަށް ވާހަކަދެއްކެވުމަކީ ހައިރާންވާ ކަމެއް ކަމަށެވެ.

ރުޓާގެ މި އިންޓަވިއުއަކީ، އެމެރިކާ އިސްވެ އޮންނަ އަސްކަރީ އިއްތިހާދުގެ ވިލާތުގެ މެންބަރުންނަށް އަމާޒުކޮށް ރައީސް ޑޮނަލްޑް ޓްރަމްޕްގެ ފާޑުކިއުންތަކުން ދިފާއުވުމަށް ދެއްވި އިންޓަވިއުއެއް ކަމަށް ބެލެވެއެވެ. ބުދަ ދުވަހު ވައިޓް ހައުސްގައި ނޭޓޯގެ ވެރިޔާއާ ބައްދަލުކުރައްވައި ޓްރަމްޕް ވަނީ، އެމެރިކާއަށް ވަފާތެރިކަން ކުޑަވުމުގެ ސަބަބުން "މާޔޫސްވެފައިވާ" ގައުމުތަކުގެ ލިސްޓުގައި އިޓަލީ ހިމަނުއްވާފައެވެ.

ރުޓާ އަންނަނީ ތަކުރާރުކޮށް ޓްރަމްޕަށް ވަރަށް ބޮޑަށް ސަނާ ކިޔަމުންނެވެ. އެގޮތުން މިދިޔަ އަހަރު ބޭއްވި ނޫސްވެރިންގެ ބައްދަލުވުމެއްގައި އޭނާ ވަނީ އެމެރިކާގެ ރައީސަށް "ޑެޑީ" ގެ ނަމުންވެސް މުޚާތަބު ކުރައްވާފައެވެ.

އިޓަލީ ސަރުކާރުން މިކަން އާންމުކޮށް ސާފުކޮށްދީފައި މިވަނީ، ޓްރަމްޕާއި އިޓަލީގެ ބޮޑުވަޒީރު ޖޯޖިއާ މެލޯނީއާ ދެމެދު އުފެދުނު ދެބަސްވުމަކަށް ފަހުގައެވެ. ފަރަންސޭސިވިލާތުގައި ދާދިފަހުން ބޭއްވި ޖީ7 ސަމިޓުގެ ތެރެއިން ޓްރަމްޕާއެކު ފޮޓޯއެއް ނެގުމަށް މެލޯނީ "އާދޭސްކުރެއްވި" ކަމަށް ޓްރަމްޕް ވިދާޅުވި ވާހަކަ މެލޯނީ ވަނީ ދޮގުކުރައްވާފައެވެ. މެލޯނީ ވިދާޅުވީ ޓްރަމްޕާ ގާތް ގުޅުމެއް ބޭއްވުމުން އޭނާއަށް ސިޔާސީ އެއްވެސް ފައިދާއެއް ނުލިބޭ ކަމަށާއި، އޭނާގެ މަގުބޫލުކަން ބިނާވެފައިވަނީ ހަމައެކަނި އިޓަލީގެ ގައުމީ މަސްލަހަތު ދިފާއުކުރުމުގެ ގާބިލުކަމުގެ މައްޗަށް ކަމަށެވެ.

މި ހަފުތާގައި އެމެރިކާގެ ސެނެޓުން ވަނީ 48 ވޯޓަށް ވުރެ 50 ވޯޓުގެ އަޣުލަބިއްޔަތުން، އީރާނާއެކު ހިނގަމުންދާ ހަމަނުޖެހުންތަކުން އެމެރިކާ ސިފައިން ބޭލުމަށް ޓްރަމްޕަށް ގޮވާލާ ގަރާރެއް ފާސްކޮށްފައެވެ. މި މަހުގެ ކުރީކޮޅު ހައުސް އޮފް ރެޕްރެޒެންޓޭޓިވްސް އިން ވެސް މި ގަރާރު ފާސްކޮށްފައިވީ ނަމަވެސް، މިއީ ރަމްޒީ ނިންމުމެއްގެ ގޮތުގައި ބެލެވެނީ، ރައީސްގެ ބާރުތައް ހަނިކުރުމަށް ކުރާ މިފަދަ މަސައްކަތްތައް ވީޓޯ ކުރުމުގެ ބާރު ރައީސަށް އޮންނާތީއެވެ.

އެމެރިކާގެ ގާނޫނުއަސާސީ ބުނާގޮތުން ކޮންމެ ހަނގުރާމައެއް ފެށުމުގެ ކުރިން ކޮންގްރެސްގެ ހުއްދަ ހޯދަން ޖެހެއެވެ. ނަމަވެސް، ދެވަނަ ބޮޑު ހަނގުރާމައަށް ފަހު ސީދާ ގޮތެއްގައި ކޮންގްރެސްއިން އެފަދަ ހުއްދައެއް ދީފައެއް ނުވެއެވެ. އޭގެ ބަދަލުގައި، ގާނޫނު ހަދާ މަޖިލީހުން އާންމުކޮށް ނެރެނީ "އޯތޮރައިޒޭޝަން ފޯ ޔޫސް އޮފް މިލިޓަރީ ފޯސް" (އަސްކަރީ ބާރު ބޭނުންކުރުމުގެ ހުއްދަ) އެވެ. މީގެ ސަބަބުން އަސްކަރީ އޮޕަރޭޝަންތައް ހިންގުމުގައި ސަރުކާރަށް ފުޅާ ދާއިރާއެއްގައި ބާރުތައް ލިބިގެންދެއެވެ.