ޓްރަމްޕް ނަތަންޔާހޫ އަށް - "ބީބީ، އެންމެން ތިބީ ކަލޭގެ ސަބަބުން ބޯގޮވައި, ފޫހިވެފައި. ހުރިހާ ޔަހޫދީން ވެސް ތިބީ ކަލޭ ދެކެ ފޫހިވެފައި"
ޑޮނަލްޑް ޓްރަމްޕްގެ ވެރިކަމާ ބެހޭގޮތުން ނެރުނު އާ ފޮތެއްގައިވާ ގޮތުން، ޣައްޒާގެ ސުލްހައިގެ މަޝްރޫއާ މެދު އުފެދުނު ހިޔާލުތަފާތުވުންތަކާ ގުޅިގެން ޓްރަމްޕް ވަނީ އިޒްރޭލުގެ ބޮޑުވަޒީރު ނަތަންޔާހޫއަށް ވަރަށް ބޮޑަށް ފާޑުވިދާޅުވެ، ދެ ގައުމުގެ ގުޅުން ކަނޑާލާނެ ކަމުގެ އިންޒާރު ދެއްވާފައި. އީރާނާ ދެކޮޅަށް ކުރި މަސައްކަތްތައް ނާކާމިޔާބުވެ ސުލްހައިގެ ވާހަކަތައް ހުއްޓުމަކަށް އައުމުން، ނަތަންޔާހޫއަކީ ވިސްނުމެއް ނެތް ބޭފުޅެއްގެ ގޮތުގައި ޓްރަމްޕް ސިފަކުރެއްވި ކަމަށްވެސް މި ރިޕޯޓުތަކުގައިވޭ.
އެމެރިކާގެ ރައީސް ޑޮނަލްޑް ޓްރަމްޕާއި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، 2025 ޑިސެމްބަރު 29 ވީ ހޯމަ ދުވަހު ފްލޮރިޑާގެ ޕާމް ބީޗުގައި ހުންނަ ޓްރަމްޕްގެ މާ-އަ-ލާގޯ ރެސިޑެންސްގައި ނޫސްވެރިންނާ ބައްދަލުކުރެއްވުމަށް ވަޑައިގަންނަވަނީ. | ގެޓީ އިމޭޖަސް
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދެކެ "ހުރިހާ ޔަހޫދީން" ފޫހިވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ނިއުޔޯކް ޓައިމްސްގެ ނޫސްވެރިން ކަމަށްވާ މެގީ ހެބަރމަން އަދި ޖޮނަތަން ސްވޯން ލިޔެފައިވާ އާ ފޮތެއްގައި ހާމަކޮށްފައިވާ މި ވާހަކަތުގައި ދެބޭފުޅުން ފޯނުން ކުރެއްވި މި މުއާމަލާތުގައި، ގާތް ދެ އެކުވެރިންގެ ގޮތުގައި އޮތް ގުޅުން "ކަނޑާލާނެ" ކަމުގެ އިންޒާރު ވެސް ޓްރަމްޕް ވަނީ ނަތަންޔާހޫއަށް ދެއްވާފައެވެ.
މި ވާހަކަތައް ހާމަކޮށްފައިވަނީ "ރެޖީމް ޗޭންޖް: އިންސައިޑް ދަ އިމްޕީރިއަލް ޕްރެޒިޑެންސީ އޮފް ޑޮނަލްޑް ޓްރަމްޕް" މި ފޮތުގައެވެ. އަންގާރަ ދުވަހު ބައެއް މީޑިއާތަކުން ވަނީ މި ފޮތުގެ ބައެއް ބައިތައް ނަކަލުކޮށް ޝާއިއުކޮށްފައެވެ.
މި ހޫނު ވާހަކަތައް ދެކެވިފައިވަނީ 2025 ވަނަ އަހަރުގެ ސެޕްޓެމްބަރު މަހުގެ ތެރޭގައި، ޣައްޒާއަށް ޓްރަމްޕް ހުށަހެޅުއްވި ސުލްހައިގެ މަޝްރޫއު ގަބޫލުކުރުމަށް އިޒްރޭލަށް ބާރުއަޅުއްވަމުން ގެންދެވި ދުވަސްވަރު ކަމަށް ރިޕޯޓްތައް ބުނެއެވެ. ޓްރަމްޕް ނަތަންޔާހޫއާ ވާހަކަދެއްކެވީ އެމެރިކާގެ ރިޔާސީ މަންދޫބު ސްޓީވް ވިޓްކޮފް އާއި ޓްރަމްޕްގެ ދަނބިދަރިފުޅު ޖެރެޑް ކުޝްނާގެ ހާޒިރުގައެވެ.
ޓައިމްސް އޮފް އިޒްރޭލުން ރިޕޯޓްކޮށްފައިވާ ގޮތުގައި، ޓްރަމްޕް ނަތަންޔާހޫއަށް ވިދާޅުވީ "ބީބީ، އެންމެން ތިބީ ކަލޭގެ ސަބަބުން ބޯގޮވައި ފޫހިވެފައި. ހުރިހާ ޔަހޫދީން ވެސް ތިބީ ކަލޭ ދެކެ ފޫހިވެފައި. މި ފޯނު ކޯލުގައި ތިބި ދެ ޔަހޫދީން (ވިޓްކޮފް އަދި ކުޝްނާ) ވެސް ތިބީ ކަލޭ ދެކެ ފޫހިވެފައި،" ކަމަށެވެ.
ދަ އިންޑިޕެންޑެންޓުން ރިޕޯޓްކޮށްފައިވާ ގޮތުގައި، ޓްރަމްޕް އިތުރަށް ވިދާޅުވީ "އެންމެން ކަލޭ ދެކެ ނަފުރަތު ކުރާއިރު ވެސް އަހަރެން ހުރީ ކަލޭގެ ފަހަތުގައި،" ކަމަށެވެ. އަދި އެއްބަސްވުން ގަބޫލުކުރުމަށް އިޒްރޭލުން އިންކާރުކޮށްފި ނަމަ، ދެ ގައުމުގެ ދެމެދުގައި އޮތް ގުޅުން "ކަނޑާލާނަން" ނުވަތަ ކަނޑާލާނެ ކަމުގެ އިންޒާރު ވެސް ޓްރަމްޕް ދެއްވިއެވެ.
ފެބްރުއަރީ 28 ގައި އީރާނާ ދެކޮޅަށް އެމެރިކާ އާއި އިޒްރޭލުން ފެށި ހަނގުރާމައިގެ ކުރީކޮޅު، ޓްރަމްޕާއި ނަތަންޔާހޫ ވަނީ ދެ ގައުމުގެ ދެމެދުގައި އޮތް ގާތް ގުޅުމަށް ވަރަށް ބޮޑަށް ތައުރީފުކުރައްވާފައެވެ. ނަމަވެސް، އީރާން ބަލިކުރުމަށް ކުރި މަސައްކަތްތައް ނާކާމިޔާބުވެ، ސުލްހައިގެ ވާހަކަތައް ހުއްޓުމަކަށް އައުމުން، ޓްރަމްޕް ވަނީ އިޒްރޭލަށް ވަރަށް ބޮޑަށް ފާޑުވިދާޅުވާން ފައްޓަވާފައެވެ.
މަޝްވަރާތަކުން ވަކިވާނެ ކަމުގެ އިންޒާރު އީރާނުން ދިނުމާ ގުޅިގެން، ލުބުނާނަށް އިޒްރޭލުން ދިން ހަމަލާތައް ޓްރަމްޕް ކުށްވެރިކުރެއްވިއެވެ. އެއް ފަހަރަކު ޓްރަމްޕް ވިދާޅުވީ ނަތަންޔާހޫގެ އެއްވެސް "ބުއްދިއެއް ނެތް" ކަމަށާއި، އޭނާއަކީ "މޮޔައެއް" ކަމަށް ވެސް ޓްރަމްޕް ސިފަކުރެއްވި ކަމަށް ރިޕޯޓްތައް ބުނެއެވެ.
ވޮޝިންޓަން ޕޯސްޓުން ރިޕޯޓްކޮށްފައިވާ ގޮތުގައި، އީރާނާއެކު ދާއިމީ ސުލްހައެއް ގާއިމުކުރުމަށް ކުރެވޭ މަސައްކަތްތަކަށް ނަތަންޔާހޫ ހުރަސްއަޅަން މަސައްކަތް ކޮށްފާނެ ކަމުގެ އިންޒާރު އެމެރިކާގެ އިންޓެލިޖެންސް އިދާރާތަކުން ދާދި ފަހުން ޓްރަމްޕަށް ވަނީ ދީފައެވެ.
މި ދެ ލީޑަރުންނަށް ވެސް އެ ބޭފުޅުންގެ ގައުމުތަކުގެ ތެރެއިން ބޮޑެތި ފާޑުކިޔުންތަކެއް ވަނީ އަމާޒުވެފައެވެ. އިދިކޮޅު ފަރާތްތަކުން ބުނަމުންދަނީ، މިދިޔަ ހަފުތާގައި އެމެރިކާ އާއި އީރާނާ ދެމެދު ސޮއިކުރި ވަގުތީ އެއްބަސްވުމުގެ ސަބަބުން، ހަނގުރާމައިގެ އަސްލު މަގްސަދުތައް ހާސިލުނުވާ ކަމަށެވެ.
