އެމެރިކާގެ ޒަމާނީ އިގްތިސާދު ބައްޓަންކުރެއްވި މޭސްތިރިޔާ އެލަން ގްރީންސްޕޭން އަވަހާރަވެއްޖެ

އެމެރިކާގެ މަރުކަޒީ ބޭންކު، ފެޑަރަލް ރިޒާވްގެ ކުރީގެ ޗެއާމަން އެލަން ގްރީންސްޕޭން، އުމުރުފުޅުން 100 އަހަރުގައި އަވަހާރަވެއްޖެ ކަމަށް އޭނާގެ އަނބިކަނބަލުން ވިދާޅުވެއްޖެއެވެ.

އެންބީސީ ނިއުސްގެ ކޮރެސްޕޮންޑެންޓް އެންޑްރިއާ މިޗެލް، އެ ނޫސް އިދާރާ މެދުވެރިކޮށް ނެރުއްވި ބަޔާނެއްގައި ވިދާޅުވީ، އޭނާގެ ފިރިކަލުން އަވަހާރަވީ ޕާކިންސަން ބަލީގެ އުނދަގޫތަކާ ގުޅިގެން ކަމަށެވެ.

މިޗެލްގެ ބަޔާނުގައި ގްރީންސްޕޭން ސިފަކުރައްވާފައިވަނީ، އެމެރިކާގެ ދެ ސިޔާސީ ފިކުރުގެ ރައީސުންގެ ދައުރުތަކުގައިވެސް އެތައް އަހަރެއް ވަންދެން އެމެރިކާގެ އިގްތިސާދު ބައްޓަންކުރުމުގައި އިސް ދައުރެއް އަދާކުރެއްވި ވަރުގަދަ ޝަޚްސިއްޔަތެއްގެ ގޮތުގައެވެ. އަދި އޭނާއަށް ހެދޭ ގޯސްތައް ގަބޫލުކުރެއްވުމުގައި އަބަދުވެސް ތެދުވެރިކަން އިސްކުރެއްވި ބޭފުޅެއްގެ ގޮތުގައެވެ.

ގާތްގަނޑަކަށް 20 އަހަރު ވަންދެން އެލަން ގްރީންސްޕޭން ހުންނެވީ އެމެރިކާގެ އިގްތިސާދު ރައްކާތެރިކޮށް، އެމެރިކާ ޑޮލަރުގެ އަގު ހިފެހެއްޓުމުގެ މުހިންމު މަސްއޫލިއްޔަތާ ހަވާލުވެވަޑައިގެންނެވެ.

އެމެރިކާގެ ރައީސްކަމަށްފަހު ދެވަނައަށް އެންމެ ނުފޫޒުގަދަ މަގާމުގެ ގޮތުގައި ސިފަކުރެވޭ ފެޑަރަލް ރިޒާވްގެ ޗެއާމަންކަން 1987 އިން 2006 އަށް އޭނާ ކުރެއްވިއިރު، އެމެރިކާގެ ތާރީޚުގައި އެންމެ ދިގު މުއްދަތަކަށް އިގްތިސާދު ކުރިއަރައިގެންދިޔަ ދުވަސްވަރުގެ އިސް މޭސްތިރިއަކީ އޭނާއެވެ.

އެމެރިކާގެ މާލީ ނިޒާމުގެ "ގޯޑް އިން ދަ މެޝިން" ނުވަތަ އެންމެ ބާރުގަދަ ފަރާތުގެ ގޮތުގައި ސިފަކުރެވުނު ނަމަވެސް، ފެޑަރަލް ރިޒާވްގައި ހޭދަކުރެއްވި މުއްދަތުގައި އިންޓަވިއު ދެއްވުމަށް އެދި ހުށަހެޅި ހުރިހާ ހުށަހެޅުންތަކަކަށް އޭނާ ވަނީ އިންކާރު ކުރައްވާފައެވެ.

އެހެންނަމަވެސް، މީޑިއާތަކާއި މާލީ ބާޒާރުތަކުން އޭނާގެ ކޮންމެ ބަހަކަށް އިންތިޒާރު ކުރަމުންދިޔައެވެ. އޭނާގެ އޮފީހުގައި ބަހައްޓާފައި ހުރި ބޯޑެއްގައި ވަރަށް ސާދާކޮށް ލިޔެފައިވަނީ "ޒިންމާ ފެށެނީ މިތަނުން" މިހެންނެވެ.

އެހެންނަމަވެސް، ފަސޭހައިން ލޯނު ލިބޭނެ މަގު ފަހިކޮށްދިނުމަށް އޭނާ ގެންގުޅުއްވި ސިޔާސަތުގެ ސަބަބުން 1990 ގެ އަހަރުތަކުގެ ފަހުކޮޅު "ޑޮޓް-ކޮމް ބަބުލް" އުފެދި، 2008 ވަނަ އަހަރުގެ މާލީ ކާރިސާއަށް މަގުފަހިވި ކަމަށް ބުނެ ފާޑުކިޔާ ފަރާތްތަކުން ވަކާލާތު ކުރެއެވެ.

އެލަން ގްރީންސްޕޭން އުފަންވީ 1926 ވަނަ އަހަރުގެ މާރިޗު މަހުގެ 6 ވަނަ ދުވަހު ނިއުޔޯކް ސިޓީއަށެވެ. ފަރުނީޗަރު ފިހާރައެއްގައި މަސައްކަތް ކުރެއްވި އޭނާގެ މަންމަ، އޭނާ ބޮޑުކުރެއްވީ އެކަނިމާއެކަނި މަސައްކަތް ކުރައްވައިގެންނެވެ.

އިގްތިސާދީ ދާއިރާއަށް ޝައުގުވެރިވުމުގެ ކުރިން، ޒުވާން ގްރީންސްޕޭން އަކީ ނިއުޔޯކުގެ މަޝްހޫރު "ޖޫލިއާޑް ސްކޫލް އޮފް މިއުޒިކް" އިން އުނގެނި ހުނަރުވެރި މިއުޒީޝަނެކެވެ.

އޭނާ ވަނީ މަޝްހޫރު ޖޭޒް މިއުޒީޝަން ސްޓޭން ގެޓްޒް އާއެކު ބޭންޑެއްގައި މަސައްކަތް ކުރައްވައި، "ހެންރީ ޖެރޯމް ބޭންޑް" އާއެކު މުޅި އެމެރިކާގައި ދަތުރުކުރައްވާފައެވެ. މި ދަތުރުތަކުގެ ސަބަބުން އެމެރިކާގެ ވިޔަފާރިތައް ހިނގާގޮތުގެ އަމަލީ ތަޖުރިބާ އޭނާއަށް ލިބިވަޑައިގަތެވެ.

އޭނާއާއެކު މަސައްކަތްކުރި އެހެން މިއުޒީޝަނުން މަސްތުވާތަކެތި ބޭނުންކުރުމުގައި ވަގުތު ހޭދަކުރިއިރު، ގްރީންސްޕޭން ވަގުތު ހުސްކުރެއްވީ އިގްތިސާދީ އިލްމު އުނގެނުމަށާއި ބޭންޑުގެ އެކައުންޓްތައް ބެލެހެއްޓުމަށެވެ.

އުމުރުން 19 އަހަރުގައި ނިއުޔޯކް ޔުނިވަރސިޓީގައި އިގްތިސާދީ ދާއިރާއިން ކިޔަވަން ފެއްޓެވިއެވެ. އެތަނުން އޭނާ ވެގެންދިޔައީ މިނިވަން ބާޒާރެއްގެ ސިޔާސަތަށް ތާއީދުކުރާ ބޭފުޅަކަށެވެ. އަދި ފަހުން އިގްތިސާދީ ކޮންސަލްޓަންޓެއްގެ ގޮތުގައާއި ޖޭޕީ މޯގަންގެ ބޯޑު މެންބަރެއްގެ ގޮތުގައި މަސައްކަތް ކުރެއްވިއެވެ.

1952 ވަނަ އަހަރު ގްރީންސްޕޭންއާ ބައްދަލުވި ކަނާތު ފިޔައިގެ ފަލްސަފާވެރިޔާ އައިން ރޭންޑްގެ ޚިޔާލުތަކުން އޭނާގެ ވިސްނުމަށް ބޮޑެތި ބަދަލުތަކެއް އައެވެ.

އޭނާ އަބަދުވެސް ކަޅު ކުލައިގެ ސޫޓު ތުރުކުރައްވާތީ، އައިން ރޭންޑް އޭނާއަށް "ދަ އަންޑަޓޭކަރ" ގެ ނަމުން މުޚާތަބު ކުރެއްވިއެވެ.

ނަމަވެސް، މުޖުތަމައުގެ އެންމެންގެ މަސްލަހަތަށްވުރެ ބޮޑަށް، ކޮންމެ މީހަކުވެސް އަމިއްލަ ފައިދާއަށް މަސައްކަތް ކުރުމުން މުޖުތަމައު އެންމެ ފުރިހަމައަށް ހިނގާނެ ކަމަށް އައިން ރޭންޑް ގަބޫލުކުރި ކުރުމަށް ޒުވާން ގްރީންސްޕޭން ތާއީދުކުރެއްވިއެވެ.

1966 ވަނަ އަހަރު އޭނާ ލިޔުއްވި މަޒުމޫނެއްގައި، "ވެލްފެއާ ސްޓޭޓް" ނުވަތަ އިޖުތިމާއީ ރައްކާތެރިކަން ފޯރުކޮށްދޭ ދައުލަތަކީ، މަސައްކަތްތެރި ރައްޔިތުންގެ މުއްސަނދިކަން ސަރުކާރުން އަތުލުމަށް ބޭނުންކުރާ ވަސީލަތެއްގެ ގޮތުގައި ސިފަކުރެއްވިއެވެ.

އައިޒަންހާވަރގެ ދައުރުގައި ކުރިމަތިވި އިގްތިސާދީ ހީނަރުކަން ކުރިއާލާ ލަފާކުރެއްވުމާ ގުޅިގެން، 1968 ވަނަ އަހަރުގެ ރިޔާސީ އިންތިޚާބުގައި ރިޗަޑް ނިކްސަންގެ އެޑްވައިޒަރެއްގެ ގޮތުގައި ގްރީންސްޕޭން މަސައްކަތް ކުރެއްވިއެވެ.

އޭގެ ފަހުން އޭނާ ވެގެންދިޔައީ ކައުންސިލް އޮފް އިކޮނޮމިކް އެޑްވައިޒާސްގެ ވެރިޔާއަށެވެ.

ރައީސް ނިކްސަން އަކީ "ޝައްކު ބޮޑު، އިންސާނުންދެކެ ފޫހިވާ" ބޭފުޅެއްގެ ގޮތުގައި ގްރީންސްޕޭން ފަހުން ސިފަކުރެއްވި ނަމަވެސް، ތަކެތީގެ އަގު އުފުލުން (އިންފްލޭޝަން) ކޮންޓްރޯލް ކުރުމުގައި އޭނާ ހޯއްދެވި ކާމިޔާބީގެ ސަބަބުން ނިކްސަންގެ ފަހުން ވަޑައިގެންނެވި ރައީސުންގެ އިތުބާރު އޭނާއަށް ލިބުނެވެ.

ޖެރަލްޑް ފޯޑްގެ ރައީސްކަމުގައިވެސް އެ މަގާމުގައި ދެމިހުންނެވުމަށް އެދިވަޑައިގަތެވެ. އަދި 1980 ގެ އަހަރުތަކުގެ ކުރީކޮޅު ރޮނަލްޑް ރޭގަން ވަނީ އެމެރިކާގެ ޕެންޝަން ނިޒާމު އިސްލާހުކުރުމުގެ މަސައްކަތް ގްރީންސްޕޭންއާ ހަވާލުކުރައްވާފައެވެ.

އޮގަސްޓް 1987 ގައި ރައީސް ރޭގަން އޭނާ ފެޑަރަލް ރިޒާވްގެ ޗެއާމަންގެ މަގާމަށް އައްޔަންކުރެއްވިއެވެ. އަދި ޖެހިގެން އައި ވިހި އަހަރު ދުވަހު އޭނާ ވެގެންދިޔައީ ދުނިޔޭގެ އެންމެ ނުފޫޒުގަދަ އެކަކަށެވެ.

މަގާމާ ހަވާލުވެވަޑައިގަތުމާއެކު އޭނާއަށް ކުރިމަތިލާންޖެހުނީ ވަރަށް ބޮޑު ގޮންޖެހުމަކާއެވެ.

އޮކްޓޫބަރު 1987 ގައި ހިއްސާގެ ބާޒާރު ކުއްލިއަކަށް އަޑިއަށް ގޮސް، ހިއްސާގެ އަގުތަކުން 30 އިންސައްތަ ގެއްލިގެންދިޔަ ހާދިސާގައި އޭނާ ކަންކަން މެނޭޖްކުރެއްވި ހުޝިޔާރު ގޮތުގެ ސަބަބުން ގިނަ ބައެއްގެ ތައުރީފު ލިބުނެވެ.

އިގްތިސާދާ މެދު އޮތް އިތުބާރު ދެމެހެއްޓުމަށް އޭނާ ދެއްވި ބަޔާނުގެ ސަބަބުން ބާޒާރުގެ ހާސްކަން ކުޑަވެ، ބޭންކުތަކަށް ފަސޭހައިން ފައިސާ ލިބޭނެ މަގު ފަހިކޮށްދިނުމުން ބޭންކުތައް ބަނގުރޫޓުވުމުން ސަލާމަތްވިއެވެ.

މިއީ މާލީ ބާޒާރަށް ކޮންމެ ފަހަރަކު ކާރިސާއެއް ކުރިމަތިވުމުން އޭނާ ބޭނުންކުރެއްވި އުސޫލެވެ. ފަހުން "ކުއަންޓިޓޭޓިވް އީޒިންގ" ގެ ނަމުން މަޝްހޫރުވި މި އުސޫލު، 1980 ގެ އަހަރުތަކުގެ ސޭވިންގްސް އެންޑް ލޯން ކާރިސާއާއި، ފުރަތަމަ ގަލްފް ހަނގުރާމައާއި، މެކްސިކޯގެ ފައިސާގެ އަގު ވެއްޓުނު ހާދިސާގެ އިތުރުން، އޭނާ ރިޓަޔަރ ކުރެއްވިތާ މާގިނަ ދުވަސްތަކެއް ނުވަނީސް 2008 ގައި ކުރިމަތިވި ބައިނަލްއަގުވާމީ މާލީ ކާރިސާގައިވެސް ބޭނުންކުރެވުނެވެ.

ޖޯޖް އެޗް.ޑަބްލިއު ބުޝްގެ ވެރިކަމުގައިވެސް ގްރީންސްޕޭން އަލުން އެ މަގާމަށް އައްޔަންކުރެވުނެވެ. ނަމަވެސް، އިގްތިސާދު އިއާދަވުން ލަސްވުމުގެ ސަބަބުން ދެވަނަ ދައުރަކަށް އިންތިޚާބުވުމުގެ ފުރުސަތު ގެއްލުނު ކަމަށް ބުނެ ބުޝް ފަހުން ޝަކުވާ ކުރެއްވިއެވެ.

ހައިރާންވާންޖެހޭ ކަމަކީ، ޑިމޮކްރެޓިކް ޕާޓީގެ ރައީސް ބިލް ކްލިންޓަންވެސް، މި ހަރުކަށި އިގްތިސާދީ މާހިރު އެ މަގާމުގައި ބެހެއްޓެވުމަށް ނިންމެވުމެވެ. އެ ނިންމުމުގެ ފައިދާ ފެނިގެންދިޔައީ، 1990 ގެ އަހަރުތަކުގެ ފަހުކޮޅު އެމެރިކާގެ އިގްތިސާދު ރަންޒަމާނެއް ފަދައިން ކުރިއަރައިގެން ދިއުމުންނެވެ.

ގްރީންސްޕޭން ފަހުން ލިޔުއްވި އޭނާގެ ހަޔާތުނާމާގައި، ދިގު މުއްދަތުގެ އިގްތިސާދީ ކުރިއެރުމަށް ކްލިންޓަން ބެހެއްޓެވި ސާބިތުކަމަށް ތައުރީފު ކުރެއްވިއެވެ. ނަމަވެސް، ރިޕަބްލިކަން ޕާޓީގެ ބައެއް ސަރުކާރުތަކުން ދައުލަތުގެ ޚަރަދުތައް ކޮންޓްރޯލް ނުކުރެވުނު ކަމަށް ވިދާޅުވެ ފާޑުވިދާޅުވިއެވެ.

މަސައްކަތުން ބޭރުގައި، މި ސީރިއަސް ބޭންކަރަކީ ޓެނިސް ކުޅުމަށް ވަރަށް ލޯބިކުރެއްވި ހުނަރުވެރި ކުޅުންތެރިއެކެވެ.

ކެނެޑާގެ ކުރެހުންތެރިއަކާ ކުރެއްވި ފުރަތަމަ ކައިވެނި އަހަރެއް ނުވަނީސް ރޫޅުނުއިރު، ޓީވީ ތަރި ބާބަރާ ވޯލްޓާސްއާ އެކުވެސް އޭނާ އުޅުއްވިއެވެ. އޭގެ ފަހުން 1997 ވަނަ އަހަރު އޭނާ ކައިވެނި ބައްލަވައިގަތީ އެންބީސީގެ ރިޕޯޓަރު އެންޑްރިއާ މިޗެލްއާއެވެ.

ހަމަ އެ އަހަރު، އިރުމަތީ އޭޝިއާގެ ގައުމުތަކުގެ އިގްތިސާދު އިނދަޖެހިގެން ދިޔަ ދިއުމަކީ އޭނާގެ ގާބިލުކަން އިމްތިހާނު ކުރެވުނު އަނެއް ފަހަރެވެ.

އެމެރިކާގެ އިންޓްރެސްޓް ރޭޓް ދަށްކުރެއްވުމުން، ހާލަތު ރަނގަޅުވާނެ ކަމުގެ އިތުބާރު އޭނާ ދެއްވިއެވެ. އަދި އެކަމުގެ ސަބަބުން ދުނިޔޭގެ އިގްތިސާދަށް އެހީތެރިކަން ލިބުނެވެ.

2000 ވަނަ އަހަރުގެ މާރިޗު މަހު، އިންވެސްޓަރުން މާ ބޮޑު އަގުތަކެއް ދީފައިވާ "ޑޮޓް-ކޮމް" ކުންފުނިތައް ބަނގުރޫޓުވި ހާދިސާގައިވެސް އޭނާ އަމަލުކުރެއްވީ އެފަދަ ގޮތަކަށެވެ.

ފެޑަރަލް ރިޒާވުން އިންޓްރެސްޓް ރޭޓް މަތިކުރުމަށްފަހު، އާންމުން ޚަރަދުކުރުން މަދުކުރުމުން ވަރަށް އަވަހަށް އަލުން އިންޓްރެސްޓް ރޭޓް ދަށްކުރިއެވެ.

ނަމަވެސް، "ޑޮޓް-ކޮމް ބަބުލް" އުފެދުމަށް ފުރުސަތު ލިބުނީ އޭނާ ގެންގުޅުއްވި އިންޓްރެސްޓް ރޭޓް ދަށްކޮށް ބެހެއްޓުމުގެ ސިޔާސަތުގެ ސަބަބުން ކަމަށް ބުނެ ގިނަ ބަޔަކު އޭނާއަށް ފާޑުކިޔެވެ.

ނޯބެލް އިނާމު ހާސިލުކުރައްވާފައިވާ އިގްތިސާދީ މާހިރު ޕޯލް ކްރޫގްމަން އަކީ އޭނާއަށް ފާޑުކިޔުއްވި އެކަކެވެ.

ސެޕްޓެމްބަރު 11 ގެ ހަމަލާތަކަށްފަހު، އެމެރިކާގެ އިގްތިސާދު ހިފެހެއްޓުމަށްޓަކައި އޭނާ އިންޓްރެސްޓް ރޭޓް ވަރަށް ބޮޑަށް ދަށްކުރެއްވިއެވެ. އަދި އިރާގުގެ ރައީސް ސައްދާމް ހުސައިން، ދުނިޔޭގެ ހަކަތައިގެ ބާޒާރު ގަޑުބަޑުކޮށްފާނެތީ، އޭނާ މަގާމުން ދުރުކުރުމަށް ޖޯޖް ޑަބްލިއު ބުޝްއަށް ބާރުއެޅުއްވިއެވެ.

2006 ވަނަ އަހަރު، ފެޑަރަލް ރިޒާވްގެ ޗެއާމަންގެ މަގާމުގައި ރެކޯޑް އަދަދަކަށް، ފަސް ދައުރު ހޭދަކުރެއްވުމަށްފަހު ގްރީންސްޕޭން މަގާމުން ވަކިވެވަޑައިގަތެވެ.

އޭގެ އެއް އަހަރު ފަހުން، އެމެރިކާގެ ބޯހިޔާވަހިކަމުގެ ބާޒާރު އަޑިއަށް ދިޔައެވެ. މިއީ ފެޑަރަލް ރިޒާވަށް ކުރިއާލާ ލަފާކުރެވިފައި ނުވާ ކަމެކެވެ. މިކަމާ ގުޅިގެން ކުރިމަތިވި "ސަބް-ޕްރައިމް މޯގޭޖް" ކާރިސާގެ ސަބަބުން ބޭންކުތައް ބަނގުރޫޓުވެ، 1930 ގެ އަހަރުތަކުގެ ބޮޑު ތަދަށްފަހު ދުނިޔެ ދުށް އެންމެ ބޮޑު އިގްތިސާދީ ހީނަރުކަން ކުރިމަތިވިއެވެ.

ފާޑުކިޔާ ފަރާތްތަކުން ބުނާ ގޮތުގައި، ސެޕްޓެމްބަރު 11 ގެ ފަހުން ގްރީންސްޕޭން ގެންގުޅުއްވި އިންޓްރެސްޓް ރޭޓް ދަށްކޮށް ބެހެއްޓުމުގެ ސިޔާސަތުގެ ސަބަބުން ގެދޮރުގެ އަގު އިންތިހާއަށް އުފުލި، ބޭންކުތަކުން ރައްކާތެރިކަމެއް ނެތް ގޮތުގައި ލޯނު ދޫކުރުމަށް މަގުފަހިވިއެވެ.

އަދި ބޭންކުތައް ރެގިއުލޭޓް ކުރުމަށް ނުވަތަ ފާރަވެރިވުމަށް އޭނާ ދެކޮޅު ހެއްދެވުމާއި، "ޑެރިވެޓިވްސް" ފަދަ އޮޅުންބޮޅުން ބޮޑު މާލީ ވަސީލަތްތައް ބޭނުންކުރުމަށް ފުރުސަތު ދެއްވުމަކީ މައްސަލަ ގޯސްވި ސަބަބެއް ކަމަށްވެސް ބުނެވެއެވެ.

އޮކްޓޫބަރު 2008 ގައި ގްރީންސްޕޭން އަމިއްލައަށް އިއުތިރާފުވެވަޑައިގަތީ، މިނިވަން ބާޒާރަށް މާ ބޮޑަށް އިތުބާރު ކުރެއްވުނު ކަމަށާއި، ރައްކާތެރިކަމެއް ނެތް ގޮތުގައި ލޯނު ދޫކުރުމުގެ ނުރައްކަލަށް އެކަށީގެންވާ ސަމާލުކަމެއް ނުދެވުނު ކަމަށެވެ.

އޭނާ ގަބޫލުކުރެއްވި ގޮތުގައި، މާލީ ދާއިރާއަކީ އަމިއްލައަށް ކަންކަން ރަނގަޅު ކުރާނެ ދާއިރާއެކެވެ. ސަބަބަކީ އެއީ އެ ދާއިރާގެ އަމިއްލަ ފައިދާއަށްޓަކައި ކުރަންޖެހޭ ކަމަކަށް ވާތީއެވެ.

އެމެރިކާގެ ކޮންގްރެސްގައި ދެއްވި ބަޔާނެއްގައި، ބޭންކުތައް ރެގިއުލޭޓް ކުރަން ނުޖެހޭނެ ކަމަށް އޭނާ ގެންގުޅުއްވި ވިސްނުން ގޯސްކަން ބޭންކުތަކުން ސާބިތުކޮށްދީފި ކަމަށް އޭނާ އެއްބަސްވެވަޑައިގަތެވެ.

"އަޅުގަނޑުގެ ވިސްނުމުގައި އުނިކަމެއް ހުރިކަން މިހާރު އެނގިއްޖެ. އެއީ ކިހާ ބޮޑު ނުވަތަ ކިހާ ދާއިމީ އުނިކަމެއް ކަމެއް ނޭނގެ. އެކަމަކު އެކަމާ އަޅުގަނޑު ވަރަށް ބޮޑަށް ދެރަވޭ،" އޭނާ ވިދާޅުވިއެވެ.

އެލަން ގްރީންސްޕޭންގެ ނަން ހަނދާން ކުރެވޭނީ، އެހެން އެންމެންނަށްވުރެ ބޮޑަށް، ޒަމާނީ އެމެރިކާގެ އިގްތިސާދު ބައްޓަންކުރި މީހާގެ ގޮތުގައެވެ.

ވިހި އަހަރު ވަންދެން، އެމެރިކާގެ ރައީސުންނާއި އާންމު ރައްޔިތުން އޭނާ ދެކުނީ މާލީ ކަންކަމުގެ އެންމެ މޮޅު މާހިރުގެ ގޮތުގައެވެ.

އޭނާގެ ފާހަގަކޮށްލެވޭ ޚިދުމަތްތަކުގެ އަގު ވަޒަންކުރުމުގެ ގޮތުން، އެމެރިކާގެ "ޕްރެޒިޑެންޝަލް މެޑަލް އޮފް ފްރީޑަމް" އާއި، އިނގިރޭސި ރާނީ އެލިޒަބަތު ދެވަނަ ދެއްވި އޮނަރަރީ ނައިޓްހޫޑް ލިބިވަޑައިގެންފައިވެއެވެ.

އުމުރުން 90 ގެ އަހަރުތަކުގައިވެސް އޭނާއަކީ އިގްތިސާދީ ލަފާ ހޯދުމަށް ގިނަ ބަޔަކު އެދޭ، އަދި މީޑިއާތަކުގައި ޚިޔާލު ފާޅުކުރައްވާ ބޭފުޅެކެވެ.

ރައީސް ޓްރަމްޕްގެ ފުރަތަމަ ދައުރުގެ ސިޔާސަތުތަކަށް އޭނާ ތާއީދެއް ނުކުރައްވައެވެ. އޭނާ ވިދާޅުވީ ޓްރަމްޕްގެ ސިޔާސަތުތަކަކީ ރައްޔިތުންގެ ދިރިއުޅުމުގެ ފެންވަރު މަތިކުރުމަށް އެހީތެރިވެދޭނެ ކަންކަމެއް ނޫން ކަމަށެވެ.

އަދި އިނގިރޭސިވިލާތް ވިލާތުގެ އިއްތިހާދުން ވަކިވުމަށް ނިންމި ނިންމުމަށް (ބްރެކްސިޓް) ފާޑުވިދާޅުވެ، އެއީ "އެންމެ ގޯސް ނަތީޖާ" ކަމަށް ސިފަކުރެއްވިއެވެ.

އުމުރުން 100 އަހަރު ފުރެން ކައިރިވެފައިވަނިކޮށް، 2023 ވަނަ އަހަރު އޭނާ ވަނީ ބައިޑަންގެ ސަރުކާރުން އިންޓްރެސްޓް ރޭޓް މާ އަވަހަށް މަތިކުރަމުންދާ ކަމަށް ބުނެ ޓީވީ މެދުވެރިކޮށް އިންޒާރު ދެއްވާފައެވެ.

އޭނާގެ 100 ވަނަ އުފަންދުވަސް ފާހަގަކުރީ 2026 ވަނަ އަހަރުގެ މާރިޗު މަހުއެވެ.

އެލަން ގްރީންސްޕޭން ހަނދާން ކުރެވޭނީ އެމެރިކާގެ އިގްތިސާދު ދިގު މުއްދަތަކަށް ބެލެހެއްޓެވި ބޭފުޅެއްގެ ގޮތުގައެވެ. އޭނާގެ ދައުރުގައި އެމެރިކާގެ ޖީޑީޕީ ދަށްވީ އެންމެ ފަހަރަކުއެވެ.

އެހެންނަމަވެސް، އޭނާއަށް ފާޑުކިޔާ ފަރާތްތަކުގެ ކުރިމަތީގައި، އޭނާގެ އަގު ދަށަށް ދިޔައީ ބޭންކުތައް ރެގިއުލޭޓް ކުރުމާ ދެކޮޅަށް ގެންގުޅުއްވި ހަރުކަށި ވިސްނުމާއި، އޭނާގެ ދައުރުގައި ކުރިމަތިވި ބޮޑު ދެ މާލީ ކާރިސާއާ ގުޅިގެންނެވެ.