ސޫރިޔާއަށް އިސްރާއީލުން ދޭ ހަމަލާތައް ތުރުކީން ވަރަށް ބޮޑަށް ކުށްވެރިކޮށްފި

އިސްރާއީލުން ސޫރިޔާގެ ދެކުނުގެ ސަރަހައްދުތަކަށް ވަދެގަނެ، ދެމުންދާ ހަމަލާތައް ތުރުކީވިލާތުގެ ފޮރިން މިނިސްޓްރީން ހޯމަ ދުވަހު ވަރަށް ބޮޑަށް ކުށްވެރިކޮށްފި އެވެ. ގޯލާން ހައިޓްސް ކައިރީގައި އުފެދިފައިވާ ނުތަނަވަސްކަމާ ގުޅިގެން، އެ ސަރަހައްދުގައި ދިރިއުޅޭ ގިނަ އަދަދެއްގެ ރައްޔިތުންނަށް ވަނީ ގެދޮރު ދޫކޮށް ރައްކާތެރި ހިސާބުތަކަށް ދާން މަޖުބޫރުވެފަ އެވެ.

ތުރުކީގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސޫރިޔާގެ ގުނައިތުރާ އަދި ދަރާ އަށް އަމާޒުކޮށް އިސްރާއީލުން ދެމުންދާ ހަމަލާތައް އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އަދި މިއީ ސޫރިޔާގެ ސިޔާދަތާއި، އެ ގައުމުގެ މިނިވަންކަމާއި އިސްތިގުލާލަށް އަރައިގަތުން ކަމަށްވެސް އެ ބަޔާނުގައި ފާހަގަކޮށްފައިވެ އެވެ.

މީގެ އިތުރުން، މި ހަމަލާތަކަކީ ސޫރިޔާގެ ރައްޔިތުންގެ ފުރާނައާއި މުދަލަށް ގެއްލުންދީ، އެ ސަރަހައްދުގައި ދިރިއުޅޭ އާންމު ރައްޔިތުންގެ ދިރިއުޅުން އިތުރަށް ދަތިކުރުވާ އަމަލުތަކެއް ކަމަށް ތުރުކީން ބުނެފައިވެ އެވެ. އަދި މިއީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފަށް އިސްރާއީލުން ހިންގަމުންދާ އަމަލުތަކެއް ކަމަށްވެސް އެ ބަޔާނުގައި ބުނެފައިވެ އެވެ.