އީރާންގެ ވެރިކަން ބަދަލުކޮށް، ދާޚީލީ ހަނގުރާމަ ފެށުމަށް ކުރާ މަސައްކަތާ ދެކޮޅަށް ތުރުކީގެ ވަރުގަދަ އިންޒާރެއް

އީރާންގެ ދާޚިލީ މަސްލަހަތު ނަގާލައި، އެ ޤައުމުގައި ދާޚިލީ ހަނގުރާމައެއް ފެށުމަށް ކުރަމުންދާ މަސައްކަތްތަޚާ ދެކޮޅަށް ތުރުކީ އިން ވަރުގަދަ އިންޒާރެއް ދީފި އެވެ. 

ތުރުކީގެ އިސްތަމްބޫލުގައި އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މި އިންޒާރު ދެއްވާފައި ވަނީ، އެ ޤައުމުގެ ފޮރިން މިނިސްޓަރު ހަކަން ފިދާން އެވެ. 

ތުރުކީގެ ފޮރިން މިނިސްޓަރު ފިދާން ވިދާޅުވީ، އީރާންގެ ވެރިކަން ބަދަލު ކުރުމުގެ ބޭނުމުގައި އެ ޤައުމުގެ ތެރޭގައި ފިތުނަ އުފައްދައި، ދާޚިލީ ހަނގުރާމައެއް ފެށުމަށް ކުރާ ކޮންމެ މަސައްކަތަކީ ތާރީޚީ ގޮތުން ހެދޭނެ ވަރަށް ބޮޑު ގޯހެއް ކަަމަށެވެ. އަދި އީރާންގައި އުޅޭ ތަފާތު ނަސްލުތަކާއި، ދީނީ ގުރޫޕު ތަކުގެ މެދުގައި އޮންނަ ނުތަނަވަސްކަމުގެ ބޭނުން ހިފައިގެން އެ ޤައުމު ހަލާކު ކޮށްލުމަށް ރާވާ އެއްވެސް ރޭވުމަކަށް ތުރުކީ އިން ތާއީދު ނުކުރާނެ ކަމަށް އޭނަ ވިދާޅުވި އެވެ. އެއާ އެކު، މިއީ ކުރިމަތި ވެދާނެ އެންމެ ނުރައްކާތެރި ޙާލަތު ކަމަށް ފިދާން ފާހަގަ ކުރެއްވި އެވެ. 

ތުރުކީ އިން މިފަދަ އިންޒާރެއް ދީފައި މި ވަނީ، އީރާންގެ އެތެރެއަށް ވަދެ ގަތުމަށްޓަކައި ކުރުދީ ހަނގުރާމަ ވެރިންނަަށް ހަތިޔާރު ފޯރުކޮށްދިނުމަށް އެމެރިކާގެ ސަރުކާރުން މަސައްކަތް ކުރަމުންދާ ކަމަށް ރިޕޯޓުތައް ބުނެފައިވާ ވަގުތެއްގަ އެވެ. އަދި އެމެރިކާގެ ރައީސް ޑޮނަލްޑް ޓްރަމްޕް މިފަދަ ހަމަލާ އަކަށް ތާއީދު ކުރައްވާފައިވާ ކަމަށް ވެސް ރިޕޯޓު ތަކުގައި ފާހަގަ ކޮށްފައިވާ ވަގުތެއްގަ އެވެ. ކުރުދީ ހަނގުރާމަވެރި ޖަމާއަތެއް ކަމަށްވާ ޕީކޭކޭއާ ދެކޮޅަށް އެތައް އަހަރެއް ވަންދެން ހަނގުރާމަ ކުރަމުންދާ ތުރުކީ އިން މިފަދަ ކޮންމެ ޙަރަކާތަކާ މެދު ނުހަނު ކަންބޮޑުވެ އެވެ. 

އެ މައްސަލައާ ގުޅޭ ގޮތުން ފިދާން ވިދާޅުވީ، އޭނާ ބުދަ ދުވަހު އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ވާހަކަ ދައްކަވާފައިވާ ކަމަށެވެ. އެމެރިކާ އިން އެފަދަ ކަމެއްގައި ބައިވެރި ނުވާ ކަމަށާއި، އެފަދަ ނިޔަތެއް ނެތް ކަމަށް ރޫބިއޯ ވިދާޅުވި ކަމަށް ފިދާން ހާމަ ކުރެއްވި އެވެ. ނަމަވެސް، އިޒްރޭލް އިން ސަަރަހައްދޫ ކުރުދީ ގުރޫޕު ތަކެއް ބޭނުން ކޮށްގެން މަަސްލަހަތު ނަގާލުމުގެ އިސްތިރާތީޖީއެއް ގެންގުޅޭ ކަމަށް ފިދާން ވަނީ ތުހުމަތު ކުރައްވައިފަ އެވެ. 

އީރާންގެ މަސްލަހަތު ނަގާލުމަށް މަސައްކަތް ކުރާ ހުރިހާ ފަރާތް ތަކަށް އިންޒާރު ދެއްވަމުން ފިދާން ވިދާޅުވީ، މިފަދަ ކަމެއްގެ ސަބަބުން އީރާންގެ ކުށެއް ނެތް އެތައް ރައްޔިތުންނެއް މަރުވެ، އެތައް މިލިއަން ބަޔަކު ރެފިއުޖީންގެ ގޮތުގައި އަވަށްޓެރި ޤައުމު ތަކަށް ހިޖުރަ ކުރަން ޖެހޭނެ ކަމަށެވެ. އަދި ސަރަހައްދީ ކުރުދީ ލީޑަރުން މިފަދަ ތާރީޚީ ގޯހެއް ނުހެއްދެވުމަށް އޭނާ އިލްތިމާސް ކުރެއްވި އެވެ.

އިރާގާއި ސީރިއާ އަށް ފަހު، އީރާންގައި ދިގު މުއްދަތަކަށް ހަނގުރާމަ އާއި ހަމަނުޖެހުން އޮތުމަކީ އެއްވެސް ޤައުމެއްގެ މަސްލަހަތު އޮތް ކަމެއް ނޫން ކަމަށް ވެސް ފިދާން ވިދާޅުވި އެވެ. އީރާންގެ އެތެރޭގައި އުފެދޭ ކޮންމެ ކަމެއްގެ އަސަރު މުޅި ސަރަހައްދަށް ފެތުރިގެން ދާނެ ކަމަށާއި، ތުރުކީ އިން މަސައްކަތް ކުރަނީ އެފަދަ ޙާލަތެއް މެދުވެރިވިޔަ ނުދިނުމަށް ކަމަށް އޭނާ ވިދާޅުވި އެވެ.