ތުރުކީވިލާތުގެ ރައީސް ރަޖަބް ތައްޔިބް އުރުދުޣާން، ރަސްމީ ދަތުރުފުޅެއްގައި ސައުދީ އަރަބިއްޔާގެ ވެރިރަށް ރިޔާޟަށް ވަޑައިގެންފި

ތުރުކީވިލާތުގެ ރައީސް ރަޖަބް ތައްޔިބް އުރުދުޣާން، ރަސްމީ ދަތުރުފުޅެއްގައި ސައުދީ އަރަބިއްޔާގެ ވެރިރަށް ރިޔާޟަށް އަންގާރަ ދުވަހު ވަޑައިގެންފިއެވެ.

މި ދަތުރުފުޅުގައި ރައީސް އުރުދުޣާން، ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނާ ބައްދަލުކުރައްވައި، އަލްޔަމާމާ ގަނޑުވަރުގައި ރަސްމީ މަޝްވަރާތައް ބޭއްވުމަށް ވަނީ ހަމަޖެހިފައެވެ.

ތުރުކީގެ ރައީސް ސައުދީ އަރަބިއްޔާ އަށް މި ކުރައްވާ ދަތުރުފުޅަކީ، އީރާނާއި އެމެރިކާއާ ދެމެދު އުފެދިފައިވާ ނުތަނަވަސްކަމާއި، ޔަމަނާއި ސޫރިޔާގެ މަސްރަޙަށް އަންނަމުންދާ ބަދަލުތަކާއެކު ސަރަޙައްދީ މަސްރަޙު ގޯސްވަމުންދާ ދަނޑިވަޅެއްގައި ކުރައްވާ ދަތުރުފުޅެކެވެ.

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެއްބަސްވުމަކަށް ނާދެވިއްޖެނަމަ، އެމެރިކާގެ ރައީސް ޑޮނަލްޑް ޓްރަމްޕް ތެހެރާނަށް އިންޒާރު ދެއްވާފައިވާތީ، އެމެރިކާ އާއި އީރާނާ ދެމެދު އުފެދިފައިވާ ނުތަނަވަސްކަން ކުޑަކުރުމަށްޓަކައި އެމެރިކާ އާއި އީރާނުގެ އިތުރުން ސަރަޙައްދީ ޤައުމުތަކުގެ އިސްވެރިންގެ މެދުގައި ބާއްވާ މަޝްވަރާތަކަށް ތުރުކީވިލާތުން މެދުވެރިއެއްގެ ދައުރު އަދާކުރާނެ ކަމަށް ބެލެވެއެވެ.

ސައުދީ އަރަބިއްޔާ އާއި ތުރުކީވިލާތާ ދެމެދު އޮތް ގުޅުން، ރައީސް އުރުދުޣާންގެ ދަތުރުފުޅުގެ ތެރޭގައި ބާއްވާ "ސައުދީ-ތުރުކީ އިންވެސްޓްމަންޓް ފޯރަމް" އިން ވެސް ރަނގަޅަށް ހާމަވެގެންދާ ކަމަށް ރިޕޯޓުތައް ބުނެ އެވެ.

މި ފޯރަމްގެ މައިގަނޑު މަޤްޞަދަކީ އެކި ދާއިރާތަކުން އިޤްތިޞާދީ އަދި އިންވެސްޓްމަންޓް ގުޅުންތައް ވަރުގަދަކުރުމާއި، ދެ ޤައުމުން އިސްކަންދޭ ދާއިރާތަކުން އެއްބާރުލުން ދެވޭނެ ގޮތްތަކާ މެދު މަޝްވަރާކުރުމުގެ އިތުރުން، ސައުދީ އަރަބިއްޔާގައި ހުރި އިންވެސްޓްމަންޓް ފުރުޞަތުތައް ދެނެގަތުމެވެ.