ތުރުކީ ވިލާތުން ރަސްމީ މަރުހަބާ ދަންނަވަމުން ދަނިކޮށް އަރިއަޅާލައިގެން ނައިޖީރިއާގެ ރައީސް ބިންމައްޗަށް ވެއްޓިއްޖެ

ތުރުކީވިލާތުގައި ބޭއްވި ރަސްމީ އިސްތިގުބާލުގެ ރަސްމިއްޔާތެއްގެ ތެރެއިން ނައިޖީރިއާގެ ރައީސް ބޯލާ ޓިނޫބޫ އަރި އަޅާލައި ވެއްޓުނު ނަމަވެސް، އެމަނިކުފާނުގެ ހާލުކޮޅު ވަރަށް ރަނގަޅު ކަމަށް އަރިސް ބޭފުޅަކު ވިދާޅުވެއްޖެ އެވެ.

އުމުރުފުޅުން 73 އަހަރުގެ ޓިނޫބޫ އަރިއަޅާލީ، ތުރުކީގެ ވެރިރަށް އަންކާރާގައި ބޭއްވި ރަސްމީ އިސްތިގުބާލުގެ ތެރެއިން އެ ގައުމުގެ ރައީސް ތައްޔިބު އުރުދުޣާން  އެމަނިކުފާނަށް މަރުހަބާ ވިދާޅުވަމުން ގެންދަވަނިކޮށެވެ.

ތުރުކީގެ ރައީސްގެ އެކްސް އެކައުންޓުގައި އާންމުކޮށްފައިވާ ރަސްމީ ވީޑިއޯއިން ފެންނަ ގޮތުގައި، ސިފައިންނާއި އިއްޒަތްތެރިންގެ ސަފުތަކުގެ ކައިރިން ހިންގަވާފައި ވަޑައިގަތުމަށްފަހު ކަނާތްފަރާތަށް ޖެހިވަޑައިގަންނަވަނިކޮށް ޓިނޫބޫ އަރިއަޅާލައި ބިންމައްޗަށް ވެއްޓެއެވެ. އެއަށްފަހު ވީޑިއޯ މަތިން ނަގާފައިވާ މަންޒަރަކަށް ބަދަލުވާ އިރު، މީހުން އެހީތެރިވެގެން ރައީސް ކޮޅަށް ތެދުކުރާ މަންޒަރު ފެނެ އެވެ. އަދި އޭގެ 45 ސިކުންތު ފަހުން ޓިނޫބޫ އާއި ރަޖަބް ތައްޔިބު އުރުދުޣާން އެކުގައި ތިއްބަވާ މަންޒަރު ވީޑިއޯ އިން ފެނެ އެވެ.

މި ހާދިސާގައި ޓިނޫބޫއަށް އެއްވެސް އަނިޔާއެއް ލިބިވަޑައިގެންފައި ނުވާ ކަމަށް ފެންނަ އިރު، އެމަނިކުފާނުގެ އެހީތެރިއެއް ކަމަށްވާ ސަންޑޭ ދާރޭ ވިދާޅުވީ އެއަށްފަހު ދެ ގައުމުގެ ދެމެދުގައި ބޭއްވުނު ބައްދަލުވުންތަކުގައި ރައީސް ބައިވެރިވެވަޑައިގެންނެވި ކަމަށެވެ. މި ހާދިސާގެ ވީޑިއޯ ކްލިޕްތައް ސޯޝަލް މީޑިއާގައި ހަލުއި ކަމާ އެކު ދަނީ ދައުރުވަމުންނެވެ.

މިއީ ނައިޖީރިއާގެ ރައީސް މި ގޮތަށް ވެއްޓުނު ފުރަތަމަ ފަހަރެއް ނޫން ކަން ފާހަގަ ކުރެވެ އެވެ. މީގެ ކުރިން 2024 ވަނަ އަހަރުގެ ޖޫން މަހު އާންމު ތަނެއްގައި ރައީސް ޓިނޫބޫ ވެއްޓުނު ހާދިސާއަކާ ގުޅިގެން އެމަނިކުފާނު ވަނީ މަޖާޒީ ގޮތަކަށް ވާހަކަފުޅު ދައްކަވާފަ އެވެ. އެ ފަހަރު ވިދާޅުވީ މީހުންނަށް ހީވީ އެމަނިކުފާނު މަޝްހޫރު ނެށުމެއްގެ ހަރަކާތެއް ދައްކަވަނީ ކަމަށެވެ.

އެ ފަހަރުގެ ހާދިސާ އެހީތެރިއަކު ސިފަކުރެއްވީ "ފިޔަވަޅު އެޅުއްވުމުގައި ހެއްދެވުނު ކުޑަ ގޯހެއް"ގެ ގޮތުގަ އެވެ. އަދި އެ ހާދިސާއާ ގުޅިގެން ގިނަ ބަޔަކު ޓިނޫބޫ އަށް ހަމްދަރުދީ ފާޅުކުރި އެވެ. އޭގެ ތެރޭގައި އިދިކޮޅު ލީޑަރު އާތިކޫ އަބޫބަކުރު ހިމެނިވަޑައިގަންނަވާ އިރު، އޭނާ ވަނީ އެއީ "ހިތާމަވެރި ހާދިސާ އެއް" ކަމަށް ވިދާޅުވެފައެވެ.

ޓިނޫބޫ ތުރުކީ އަށް ކުރައްވާ މި ދަތުރުފުޅަކީ "ދެ ގައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކުރުމަށް" ކުރައްވާ ދަތުރުފުޅެއް ކަމަށް ނައިޖީރިއާ ގެ ރައީސްގެ އޮފީހުން ނެރުނު ބަޔާނެއްގައި ބުނެފައިވެ އެވެ.

މި ހާދިސާ އާ ގުޅިގެން އުފެދިފައިވާ ކަންބޮޑުވުންތައް ނައްތާލުމުގެ ގޮތުން، އަންގާރަ ދުވަހުގެ މެންދުރުފަހު ދާރޭ އެކްސްގައި ކުރެއްވި ޕޯސްޓެއްގައި ބޮޑު އަކުރުން ލިޔުއްވާފައިވަނީ: "ދައުލަތުގެ ދަތުރުފުޅު އޮމާންކަމާއެކު ކުރިއަށްދާ އިރު، ރައީސް ޓިނޫބޫ ހުންނެވީ ވަރަށް ރަނގަޅު ހާލުކޮޅެއްގައި" ކަމަށެވެ.

އަދި އަންކާރާ ގައި ބޭއްވި ރަސްމީ އިސްތިގުބާލަށް ފަހު، ތުރުކީގެ ރައީސާއި ދެ ގައުމުގެ ސަރުކާރުގެ އިސް އޮފިޝަލުންނާއެކު ތާވަލު ކުރެވިފައިވާ ބައްދަލުވުންތައް ކުރިއަށް ގެންދެވި ކަމަށް ވެސް އޭނާ ވިދާޅުވިއެވެ.

ނަމަވެސް މިކަމާ ގުޅޭ އިތުރު ތަފްސީލެއް އޭނާ ދެއްވާފައެއް ނުވެއެވެ.

ޓިނޫބޫ ނައިޖީރިއާ ގެ ރައީސްކަމުގެ މަގާމާ ހަވާލުވެވަޑައިގަތީ 2023 ވަނަ އަހަރު ބޭއްވި އިންތިޚާބު ކާމިޔާބު ކުރެއްވުމަށްފަހު އެވެ.