އީރާނާ އެމެރިކާގެ މަޝްވަރާ ބޭއްވިދާނެތޯ ސުވާލު އުފެދިއްޖެ، އީރާނުން ބޭނުންވަނީ ބައްދަލުވުން އޮންނަ ތަނާއި އެޖެންޑާ ބަދަލު ކުރަން

މި ހަފުތާގައި އެމެރިކާއާއެކު ބޭއްވުމަށް ހަމަޖެހިފައިވާ މަޝްވަރާތައް ތުރުކީގެ ބަދަލުގައި އޮމާންގައި ބޭއްވުމަށާއި، އެ ބައްދަލުވުމުގައި ހަމައެކަނި ނިއުކްލިއާ މައްސަލައާ ގުޅޭގޮތުން ދެ ގައުމުގެ މެދުގައި ވާހަކަދެއްކުމަށް އީރާނުން ޝަރުތުކުރަމުންދާ ކަމަށް ސަރަހައްދީ މަސްދަރަކުން އަންގާރަ ދުވަހު ބުނެފި އެވެ.

އީރާނުގެ މި ހުށަހެޅުންތަކާ ގުޅިގެން، ކުރިން ރޭވިފައިވާ ގޮތަށް މި ބައްދަލުވުން ކުރިއަށްދާނެތޯ މިހާރު ވަނީ ސުވާލު އުފެދިފަ އެވެ.

މިހާރު ހަމަޖެހިފައިވާ ގޮތުން އަންނަ ހުކުރު ދުވަހު އިސްތަންބޫލްގައި ބޭއްވުމަށް ތާވަލުކޮށްފައިވާ މި މަޝްވަރާތައް ބާއްވާ ތަނާއި އެޖެންޑާ ބަދަލުކުރުމަށް އީރާނުން މަސައްކަތް ފަށާފައި މިވަނީ، މެދުއިރުމަތީގައި އެމެރިކާގެ އަސްކަރީ ބާރުތައް ވަރުގަދަކުރަމުންދާ ދަނޑިވަޅެއްގައި މަސްރަހު ނުތަނަވަސްވެފައި ވަނިކޮށެވެ.

ދެ ގައުމުގެ މެދުގައި އުފެދިފައިވާ މި ނުތަނަވަސްކަމުގެ ސަބަބުން އެއްބަޔަކު އަނެއް ބަޔަކަށް ވައިގެ ހަމަލާދޭނެ ކަމުގެ އިންޒާރުތައް ބަދަލުކުރަމުންދާއިރު، މިކަން ސަރަހައްދީ ބޮޑު ހަނގުރާމައަކަށް ބަދަލުވެދާނެ ކަމުގެ ބިރު އޮތުމުން، ސަރަހައްދީ ބާރުތަކުން ދަނީ މި މައްސަލައަށް ހައްލެއް ހޯދުމަށް ބާރުއަޅަމުންނެވެ.

އެމެރިކާގެ އަސްކަރިއްޔާ އިން އަންގާރަ ދުވަހު ބުނި ގޮތުގައި، އަރަބި ކަނޑުގައި އޮތް އެމެރިކާގެ "އަބްރަހަމް ލިންކަން" މަތިންދާބޯޓު އުފުލާ މަނަވަރާ "ނުރައްކާތެރި" ގޮތަކަށް ކައިރިވި އީރާނުގެ ޑްރޯނެއް އެމެރިކާ ސިފައިން ވަނީ ބަޑިޖަހައި ވައްޓާލާފައެވެ. ރޮއިޓާސް އިން އެންމެ ފުރަތަމަ ރިޕޯޓުކުރި މި ހާދިސާ ހިނގާފައިވަނީ މަސްރަހު އިންތިހާއަށް ހޫނުވެފައިވާ ދަނޑިވަޅެއްގަ އެވެ.

"އެމީހުން ބޭނުންވަނީ މަޝްވަރާތަކުގެ ފޯމެޓާއި އޭގެ ދާއިރާ ބަދަލުކުރަން،" އީރާނުގެ ހުށަހެޅުންތަކުގެ މައުލޫމާތު އެނގޭ ސަރަހައްދީ ޑިޕްލޮމެޓަކު ވިދާޅުވި އެވެ.

އޭނާ އިތުރަށް ވިދާޅުވި ގޮތުގައި، އެމެރިކާ އިން ބެލިސްޓިކް މިސައިލްގެ މައްސަލަ އާއި ސަރަހައްދީ ގައުމުތަކުގައި ހަރަކާތްތެރިވާ އީރާނަށް ތާއީދުކުރާ ޖަމާއަތްތަކުގެ ވާހަކަ މަޝްވަރާގައި ހިމަނަން ބޭނުންވި ނަމަވެސް، އީރާނުން ބޭނުންވަނީ ހަމައެކަނި ނިއުކްލިއާ މައްސަލައާ ގުޅޭގޮތުން އެމެރިކާ އާ އެކު ވާހަކަދެއްކުމަށެވެ.

ވައިޓް ހައުސްގެ ޕްރެސް ސެކްރެޓަރީ ކެރޮލީން ލީވިޓް އަންގާރަ ދުވަހު ފޮކްސް ނިއުސް އަށް ދެއްވި އިންޓަވިއުއެއްގައި ވިދާޅުވީ، އީރާނާއެކު ބާއްވާ މަޝްވަރާތައް އަދިވެސް އޮތީ މި ހަފުތާގެ ފަހުކޮޅު ބާއްވާ ގޮތަށް ތާވަލުކުރެވިފައި ކަމަށެވެ.

މިކަމުގެ މައުލޫމާތު އެނގޭ މަސްދަރަކުން އަންގާރަ ދުވަހު ބުނި ގޮތުގައި، މި މަޝްވަރާތަކުގައި ޑޮނަލްޑް ޓްރަމްޕްގެ ދަނބިދަރިފުޅު ޖެރެޑް ކުޝްނަރާއި، އެމެރިކާގެ ހާއްސަ މަންދޫބު ސްޓީވް ވިޓްކޮފްގެ އިތުރުން އީރާނުގެ ފޮރިން މިނިސްޓަރު އައްބާސް އަރަގްޗީ ބައިވެރިވެވަޑައިގަތުމަށް ވަނީ ހަމަޖެހިފަ އެވެ.

މީގެ އިތުރުން ސަރަހައްދީ އެހެން ބައެއް ގައުމުތަކުގެ ވަޒީރުންވެސް މި ބައްދަލުވުމުގައި ބައިވެރިވެވަޑައިގަންނަވާނެ ކަމަށް ކުރިން އޮތީ ބެލެވިފަ އެވެ.

އީރާނުގެ ޑިޕްލޮމެޓިކް މަސްދަރަކުން މީގެ ކުރިން ބުނެފައިވަނީ، މި މަޝްވަރާތަކާ މެދު ތެހެރާނުން މާ ބޮޑު އުންމީދެއް ނުކުރާ ކަމަށާއި ނަމަވެސް މާ ބޮޑަށް މާޔޫސް ވެސް ނުވާ ކަމަށެވެ. އަދި އިސްލާމީ ޖުމްހޫރިއްޔާގެ ދިފާއީ ގާބިލުކަމާ ގުޅޭގޮތުން އެއްވެސް މަޝްވަރާއެއް ނުކުރެވޭނެ ކަމަށާއި، ކޮންމެ ފަދަ ހާލަތަކަށް ވެސް އީރާން އޮތީ ތައްޔާރަށް ކަމަށް އެ މަސްދަރުން ބުންޏެވެ.

"އެމެރިކާ އިން ވެސް ސީރިއަސް، ނަތީޖާ އެއް ނެރެވޭނެ ފަދަ މަޝްވަރާތަކެއް ކުރަން ގަސްދުކުރޭތޯ ނުވަތަ ނޫންތޯ އަދި ފެންނާނެ،" އެ މަސްދަރުން ބުންޏެވެ.