އިޒްރޭލުން ބަލަނީ އީރާން އަށް ހަމަލާ ދޭނެ ފުރުސަތަކަށް: ތުރުކީގެ ފޮރިން މިނިސްޓަރު

އީރާން އަށް ހަމަލާ ދޭނެ ފުރުސަތެއް ހޯދުމަށް އިޒްރޭލުން މަސައްކަތް ކުރަމުން އަންނަ ނިޝާންތައް ފެންނަމުންދާ ކަމަށާއި، އެފަދަ ހަމަލާ އަކީ މުޅި ސަރަހައްދުގެ އިސްތިޤުލާލަށް ނުރައްކާ ވާނެ ކަމެއް ކަމަށް ތުރުކީގެ ފޮރިން މިނިސްޓަރު ހަކަން ފިދާން ވިދާޅުވެއްޖެ އެވެ.

ތުރުކީގެ އެންޓީވީ އަށް ހުކުރު ދުވަހު ދެއްވި އިންޓަވިޔުއެއްގައި ފިދާން ވިދާޅުވީ، އީރާން އަށް ހަމަލާ ދޭނެ ފުރުސަތެއް އިޒްރޭލުން ހޯދުމަށް މަސައްކަތް ކުރާ ކަމަށެވެ. އެހެން ނަމަވެސް، ހަމަލާ ދިނުމުގެ ބަދަލުގައި އެހެން މަގެއް އިޒްރޭލުން ހޯދާނެ ކަމަށް އުންމީދު ކުރައްވާ ކަމަށް އޭނާ ވިދާޅުވި އެވެ. 

އެކަމުގައި އެމެރިކާ އާއި އިޒްރޭލު ހިމެނޭތޯ ސުވާލު ކުރުމުން، ފިދާން ވިދާޅުވެފައި ވަނީ ޚާއްސަކޮށް އިޒްރޭލުން ދަނީ އެފަދަ ފުރުސަތެއް ހޯދުމަށް މަސައްކަތް ކުރަމުންނެވެ. 

އިތުރަށް ފިދާން ވިދާޅުވީ، އެންމެ ފަހުން އީރާން އަށް ކުރެއްވި ދަތުރުފުޅުގައި އީރާންގެ އޮފިޝަލުންނާ ސީދާ މަޝްވަރާ ކުރެވުނު ކަމަށާއި، ކަންބޮޑުވުންތައް ވެސް ހިއްސާ ކުރައްވާފައިވާ ކަމަށެވެ. ޚާއްސަކޮށް އީރާންގެ ރަޙުމަތްތެރިޔެއްގެ ހައިސިއްޔަތުން މައުލޫމާތު ފޯރުކޮށްދީފައި ވާނެ ކަމަށާއި، ރަޙުމަތްތެރިން ވާހަކަ ދައްކާނީ ހަގީގަތަށް ކަމަށް އޭނާ ވިދާޅުވި އެވެ. ފިދާންއާ ހަވާލާދީ އެ ވާހަކަ ރިޕޯޓު ކޮށްފައި ވަނީ ތުރުކީގެ ޓުޑޭ ނޫހުންނެވެ. 

ތުރުކީގެ ފޮރިން މިނިސްޓަރު މިހެން ވިދާޅުވެފައިވާއިރު، ބުރާސްފަތި ދުވަހު ތުރުކީގެ ރައީސް ރަޖަބް ޠައްޔިބް އުރުދުޣާން ވަނީ، އީރާންގެ ރައީސް މައްސޫދު ޕެޒެޝްކިއާންއާ ފޯނުން ގުޅުއްވައި މަޝްވަރާ ކުރައްވައިފަ އެވެ. އެ މަޝްވަރާ ތަކުގައި، ބޭރު އެއްވެސް ޤައުމަކުން އީރާން އާ ދެކޮޅަށް ހިންގާ ޙަރަކާތްތަކާ ތުރުކީ އިން ދެކޮޅު ހަދާނެ ކަމަށް އުރުދުޣާން ވަނީ ވިދާޅުވެފަ އެވެ. އެ ޤައުމުގެ ސުލްޙަ އާއި ސަލާމަތަށް ކުރަމުން އަންނަ މަސައްކަތުގެ އަގު ވަޒަން ކުރާ ކަމަށް ވެސް ވިދާޅުވެފައިވެ އެވެ. 

އީރާންގެ އިސް އޮފިޝަލަކު ހުކުރު ދުވަހު ރޮއިޓާސް އަށް ވިދާޅުވެފައި ވަނީ، ދުޝްމަނުންގެ ފަރާތުން އީރާން އަށް ދެވޭ ކޮންމެ ހަމަލާ އަކީ، އެ ޤައުމާ ދެކޮޅަށް ހިންގާ ފުރިހަމަ ހަނގުރާމައެއްގެ ގޮތުގައި ބަލާނެ ކަމަށެވެ. މިއީ އެމެރިކާ އާއި އީރާންގެ އިސްވެރިންނާ ދެމެދު ބަހުގެ ހަމަލާތައް ބަދަލު ކުރަމުން އަަންނަ ދަނޑިވަޅެއްގައި ދައްކަވާފައިވާ ވާހަކަ އެކެވެ. 

މީގެ އިތުރުން އީރާންގެ ސިޔާދަތާ ދެކޮޅަށް، އެމެރިކާ އިން ހަމަ ނުޖެހުން ހިންގައިފި ނަމަ އެކަމުގެ ރައްދު ދޭނެ ކަމަށް ވެސް ވިދާޅުވެފައިވެ އެވެ. އީރާންގެ ލަޝްކަރު އޮތީ އެންމެ ގޯސް ޙާލަތަށް ވެސް ތައްޔާރަށް ކަމަށާއި، އީރާން އޮތީ ހުރިހާ ކަމަކަށް އިސްކަން ދީގެން ކަމަށް ވިދާޅުވެފައިވެ އެވެ.