އީރާނުގެ ފޮރިން މިނިސްޓަރު އައްބާސް އަރަގްޗީ ހުކުރު ދުވަހު އިސްތަންބޫލަށް ވަޑައިގެންފި

އެމެރިކާ އިން އީރާނަށް އަސްކަރީ ހަމަލާއެއް ދީފާނެ ކަމުގެ ބިރު ބޮޑުވެފައިވާ ދަނޑިވަޅެއްގައި، ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ހައްލުކުރުމަށް ތުރުކީން މެދުވެރިއެއްގެ ދައުރު އަދާކުރުމާ ގުޅޭގޮތުން މަޝްވަރާކުރެއްވުމަށް، އީރާނުގެ ފޮރިން މިނިސްޓަރު އައްބާސް އަރަގްޗީ ހުކުރު ދުވަހު އިސްތަންބޫލަށް ވަޑައިގެންފިއެވެ.

އަރަގްޗީގެ މި ދަތުރުފުޅުގައި ތުރުކީގެ ފޮރިން މިނިސްޓަރު ހަކާން ފިދާން އާ ބައްދަލުކުރައްވައި މަޝްވަރާކުރެއްވުމުގެ އިތުރުން، އެ ގައުމުގެ ރައީސް ރަޖަބް ތައްޔިބު އުރުދުޣާން އާ ވެސް ބައްދަލުކުރައްވާނެ ކަމަށް އީރާނުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވެ އެވެ.

މި މަޝްވަރާތައް ކުރިއަށްދާނެ ސީދާ ގަޑިއެއް އަދި ސާފުނުވި ނަމަވެސް، ދެ ގައުމުގެ ފޮރިން މިނިސްޓަރުން ގުޅިފައިވާ ނޫސްވެރިންގެ ބައްދަލުވުމެއް ހުކުރު ދުވަހު މެންދުރުފަހު ބާއްވާނެ ކަމަށް ތުރުކީގެ ކަމާބެހޭ އިދާރާތަކުން ވަނީ ހާމަކޮށްފައެވެ.

އަރަގްޗީ ހުކުރު ދުވަހު ތުރުކީ އަށް މި ވަޑައިގެންނެވީ، އީރާނާ ދެކޮޅަށް އަސްކަރީ ފިޔަވަޅެއް ނާޅާ ފަރުޖެހޭނެ ކަމަށް އުންމީދުކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވިތާ މަދު ގަޑިއިރުތަކެއްގެ ތެރޭގަ އެވެ. އެމެރިކާ އިން ހަމަލާ އެއް ދީފިނަމަ، އެ ގައުމުގެ އަސްކަރީ މަރުކަޒުތަކަށާއި މަތިންދާބޯޓު އުފުލާ މަނަވަރުތަކަށް ހަމަލާދޭނެ ކަމުގެ އިންޒާރު އީރާނުން ވަނީ މީގެ ކުރިން ދީފަ އެވެ.

މި މަހުގެ ކުރީކޮޅު އީރާނުގައި ކުރި މުޒާހަރާތައް ހުއްޓުވުމަށް އެ ގައުމުގެ ސަރުކާރުން ބާރުގެ ބޭނުން ކޮށްފައިވާ ކަމަށް ވިދާޅުވެ، އީރާނަށް އަސްކަރީ ހަމަލާއެއް ދޭނެ ކަމުގެ އިންޒާރު ޓްރަމްޕް ދެއްވަމުން ގެންދަވާތާ މިހާރު ހަފުތާތަކެއް ވަނީ ވެފަ އެވެ.

އެމެރިކާގެ ކަނޑުގެ ސިފައިންގެ ހަމަލާދޭ ގްރޫޕެއް މިދިޔަ ހޯމަ ދުވަހުން ފެށިގެން މެދުއިރުމަތީގެ ކަނޑުގެ ސަރަހައްދުގައި ހަރަކާތްތެރިވަމުންދާއިރު، "ބޭނުން ޖެހިއްޖެ ހާލަތެއްގައި" އީރާނަށް ހަމަލާދިނުމަށް އެ ގައުމު އޮތީ "ތައްޔާރަށް އަދި ފުރިހަމަ ގާބިލުކަމާއެކު" ކަމަށް ޓްރަމްޕް ވަނީ އިންޒާރު ދެއްވާފަ އެވެ.

އީރާނަށް ދީފައިވާ ވަގުތު "ހުސްވަމުންދާ" ކަމަށް މީގެ ކުރިން ވިދާޅުވި ނަމަވެސް، ބުރާސްފަތި ދުވަހުގެ ރޭ ޓްރަމްޕް ވަނީ ކޮންމެވެސް ވަރަކަށް ރޫހު ބަދަލުކުރައްވާފަ އެވެ. އެގޮތުން "އީރާނޭ ކިޔާ ތަނަކަށް އަހަރެމެންގެ އަސްކަރީ ގްރޫޕެއް މިހާރު އެދަނީ ދަތުރުކުރަމުން، އުންމީދަކީ އެ ގްރޫޕުގެ ބޭނުން ހިފަން ނުޖެހުން" ކަމަށް ޓްރަމްޕް ވިދާޅުވިއެވެ.

އީރާނާ ދެކޮޅަށް އަސްކަރީ ފިޔަވަޅު އެޅުމާ ދެކޮޅު ކަމަށް ބުނެ ތުރުކީން ތަކުރާރުކޮށް އަޑުއުފުލަމުންދާއިރު، ހުކުރު ދުވަހު އަރަގްޗީ އާ އެކު ބާއްވާ މަޝްވަރާތަކުގައި ވޮޝިންޓަނާއި ތެހެރާނާ ދެމެދު މެދުވެރިއެއްގެ ދައުރު އަދާކުރުމަށް ތުރުކީން ހުށަހަޅާނެ ކަމަށް ބެލެ އެވެ.