އީރާންގެ ހަމަލާ ތަކުގައި ބަހްރެއިންގެ މީހުން ދިރިއުޅޭ އިމާރާތް ތަކަށް ގެއްލުން ލިބުނު

އީރާން އިން ދިން ހަމަލާ ތަކުގައި ބަހްރެއިންގެ މީހުން ދިރިއުޅޭ ބައެއް އިމާރާތް ތަކަށް ގެއްލުން ލިބިފައިވާ ކަމަށް، އެ ޤައުމުގެ ދާޚިލީ ވުޒާރާ އިން ހާމަ ކޮށްފި އެވެ. 

ބަހްރެއިންގެ އިންޓީރިއާ މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އީރާންގެ ހަމަލާތަކާ ގުޅިގެން މުހައްރަ ސަރަހައްދުގެ އިމާރާތަކަށް ގެއްލުން ތަކެއް ލިބިފައިވީ ނަމަވެސް، މި ހާދިސާގައި އެއްވެސް މީހެއްގެ ފުރާނަ އަށް ގެއްލުން ވެފައި ނުވާ ކަމަށެވެ. އަދި މި ހާދިސާގައި އެއްވެސް މީހަކު މަރުވިކަމުގެ ރިޕޯޓެއް މިހާތަނަށް ލިބިފައި ނުވާ ކަމަށް ވެސް އެ މިނިސްޓްރީ އިން ކަށަވަރު ކޮށްދީފައިވެ އެވެ.

މި ހާދިސާއާ ގުޅިގެން ކަމާ ބެހޭ އިދާރާ ތަކުން މިހާރު އެ ސަރަހައްދުގައި ހަރަކާތްތެރި ވަމުންދާ ކަމަށް ބަހްރެއިންގެ ސަރުކާރުން ބުނެ އެވެ. އެގޮތުން ހާދިސާ ހިނގި ސަރަހައްދުގައި ރައްކާތެރި ކަމުގެ ފިޔަވަޅުތައް އެޅުމަށާއި، ލިބިފައިވާ ގެއްލުންތައް ބެލުމަށް ކުރަން ޖެހޭ މަސައްކަތްތައް ކަމާ ގުޅޭ މުއައްސަސާ ތަކުން ކުރަމުންދާ ކަމަށް ދާޚިލީ ވުޒާރާގެ ބަޔާނުގައި ފާހަގަ ކޮށްފައިވެ އެވެ.

އީރާން އިން އިޒްރޭލް އަށް އަމާޒުކޮށް ފޮނުވާލި މިސައިލް ތަކާއި ޑްރޯން ތަކުގެ ސަބަބުން ސަރަހައްދީ ގައުމު ތަކުގެ ވައިގެ ސަރަހައްދަށް ވަނީ ނުތަނަވަސްކަން ވެރިވެފައި އެވެ. ބަހްރެއިންގެ އިމާރާތަކަށް ގެއްލުން ލިބުނު މި ހާދިސާ އަކީ އީރާންގެ ހަމަލާ ތަކުގެ ތެރެއިން އެ ގައުމަށް އޭގެ އަސަރު ފޯރި ފުރަތަމަ ފަހަރެވެ.

މި ހާދިސާއާ ގުޅިގެން އިތުރު ތަފްސީލެއް ބަހްރެއިންގެ ސަރުކާރުން މިހާތަނަށް ހާމަ ކޮށްފައި ނުވެ އެވެ. ނަމަވެސް ސަރަހައްދީ މަސްރަހު ހޫނުވެފައިވާ މި ދަނޑިވަޅުގައި، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް އަޅަން ޖެހޭ ހުރިހާ ފިޔަވަޅެއް އަޅަމުން ދާނެ ކަމުގެ ޔަގީންކަން އެ ގައުމުގެ ސަލާމަތީ ބާރު ތަކުން ވަނީ ދީފައި އެވެ.