ބަހްރެއިން އާއި ކުވެއިތަށް އީރާން އިން ހަމަލާ ތަކެއް ދީފި

އީރާންގެ ސަރަހައްދު ތަކަށް އެމެރިކާ އިން ދެމުންދާ ހަމަލާތަކާ ގުޅިގެން، އެކަމުގެ ބަދަލު ހިފުމުގެ ގޮތުން އީރާން އިން ކުވެއިތު އަދި ބަހްރެއިން އަށް މިސައިލް އާއި ޑްރޯން ހަމަލާ ތަކެއް ދީފި އެވެ.

އާދީއްތަ ދުވަހު އީރާން އިން ދިން މި ހަމަލާތަކާ އެކު ބަހްރެއިންގައި ނުރައްކަލުގެ ސައިރަން އަޅާފައިވާއިރު، ކުވެއިތުގެ ވައިގެ ދިފާއީ ނިޒާމުން ވަނީ އީރާންގެ ހަމަލާތައް ހުއްޓުވުމުގެ މަސައްކަތް ކޮށްފައި އެވެ.

ކުވެއިތުގެ އަސްކަރިއްޔާ އިން އެކްސްގައި ކުރި ޕޯސްޓެއްގައި ބުނެފައި ވަނީ، އެ ޤައުމަށް އަމާޒު ވަމުންދާ ނުރައްކާތެރި މިސައިލް އަދި ޑްރޯން ހަމަލާ ތަކުން ދިފާއުވުމުގެ މަސައްކަތް ކުވެއިތުގެ އެއާ ޑިފެންސް ފޯސް އިން ކުރަމުންދާ ކަމަށެވެ. އަދި މި ވަގުތަކީ ނުރައްކާތެރި ވަގުތަކަށް ވާތީ، ކަމާ ބެހޭ އިދާރާ ތަކުން ދޭ ސަލާމަތީ އިރުޝާދު ތަކަށް ހުރިހާ ރައްޔިތުން ވެސް ފުރިހަމަ އަށް އަމަލު ކުރުމަށް އަސްކަރިއްޔާ އިން ވަނީ އިލްތިމާސް ކޮށްފައި އެވެ.

ބަހްރެއިންގެ ދާޚިލީ ވުޒާރާ އިން ބުނި ގޮތުގައި، އީރާންގެ ހަމަލާތަކާ ގުޅިގެން އެ ގައުމުގައި ދެ ފަހަރެއްގެ މަތިން ވަނީ ނުރައްކަލުގެ ސައިރަން އަޅާފައި އެވެ. އެ ވުޒާރާ އިން ވަނީ ރައްޔިތުން ކެތްތެރިކަން އިސްކުރުމަށާއި، ވީ އެންމެ އަވަހަކަށް ރައްކާތެރި ހިސާބު ތަކަށް ވަނުމަށް އަންގާފައި އެވެ. ބަހްރެއިންގެ ޚާރިޖީ ވުޒާރާ އިން ނެރުނު ބަޔާނެއްގައި، އީރާން އިން އެ ޤައުމުގެ ސިޔާދަތަށް އަރައިގަނެ ދެމުންދާ ހަމަލާތައް ހަރުކަށި އިބާރާތުން ކުށްވެރި ކޮށްފައިވެ އެވެ.

ބަހްރެއިންގެ ޚާރިޖީ ވުޒާރާ އިން އިތުރަށް ބުނެފައި ވަނީ، އީރާން އިން ބެލިސްޓިކް މިސައިލް އާއި ޑްރޯން ބޭނުން ކޮށްގެން ދެމުންދާ މި ހަމަލާ ތަކަކީ އިއްތިފާގުން ހިނގާ ކަންތައް ތަކެއް ނޫން ކަމަށެވެ. މިއީ ބަހްރެއިންގެ މިނިވަންކަމާއި، ސިޔާދަތަށް ގަސްދުގައި ހުރަސް އެޅުމަށް އީރާން އިން ރާވައިގެން ސިލްސިލާކޮށް ހިންގަމުންދާ އުދުވާނީ އަމަލު ތަކެއްގެ ބައެއް ކަމަށް ވެސް އެ ވުޒާރާ އިން ތުހުމަތު ކޮށްފައިވެ އެވެ.

މި ހަމަލާތަކާ ގުޅޭ ގޮތުން އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނީ، ކުވެއިތާއި ބަހްރެއިން އަށް ހަމަލާ ދިނީ އީރާންގެ ސަރަހައްދު ތަކަށް އެމެރިކާ އިން ދިން ހަމަލާ ތަކުގެ ބަދަލު ހިފުމުގެ ގޮތުން ކަމަށެވެ. އަދި ކުރިއަށް އޮތް ތަނުގައި ވެސް އީރާން އަށް އެއްވެސް ކަހަލަ އުދުވާނީ ހަމަލާއެއް އަތުވެއްޖެ ނަމަ، އޭގެ ރައްދުގައި ވަރުގަދަ ހަމަލާ ތަކެއް ދޭނެ ކަމުގެ އިންޒާރު އީރާން އިން ވަނީ ދީފައި އެވެ.

މި މަސްރަހު ގޯސްވެފައި ވަނީ، ދުނިޔޭގެ ތެލުގެ ވިޔަފާރީގައި މުހިންމު ރޯލެއް އަދާކުރާ ހުރްމުޒްގައި އޮތް ތެޔޮ ޓޭންކަރަކަށް އީރާން އިން ހަމަލާދިން ކަމަށް ބުނެ، އޭގެ ބަދަލު ހިފުމުގެ ގޮތުން އެމެރިކާގެ އަސްކަރިއްޔާ އިން ހޮނިހިރު ދުވަހު އީރާން އަށް ބޮން އެޅުމާ ގުޅިގެންނެވެ. މިއީ ޖެހި ޖެހިގެން ދެވަނަ ދުވަހު އެމެރިކާ އިން އީރާން އަށް ހަމަލާ ދިން ފަހަރެވެ.