ޕާކިސްތާނުން އަފްޣާނިސްތާނަށް ބޮން އަޅައިފި، 36 މީހަކު މަރުވެއްޖެ
ޕާކިސްތާނުން އަފްޣާނިސްތާނުގެ އިރުމަތީ ސަރަހައްދުތަކަށް ދިން ވައިގެ ހަމަލާތަކުގައި އާންމުންގެ 36 މީހަކު މަރުވެ، ގިނަ ބަޔަކު ޒަޚަމްވެފައިވާ ކަމަށް ތާލިބާން ސަރުކާރުން ވަނީ ހާމަކޮށްފައި. ޕާކިސްތާނުން މި ހަމަލާތައް އަމާޒުކުރީ އެ ގައުމަށް ހަމަލާދޭ ހަނގުރާމަވެރި ޖަމާއަތްތަކަށް ކަމަށް ބުނި ނަމަވެސް، އަފްޣާނިސްތާނުން ވަނީ އެ ގައުމުގެ ބިމުގައި ހަނގުރާމަވެރިންނަށް ހިމާޔަތްދޭ ކަމަށް ބުނާ ވާހަކަތައް ދޮގުކޮށްފައި.
އަފްޣާނިސްތާނުގެ ޕަކްތިއާ ޕްރޮވިންސްގެ ސަމްކާނީ ޑިސްޓްރިކްޓަށް ޕާކިސްތާނުގެ ސަލާމަތީ ބާރުތަކުން ވައިގެ މަގުން ދިން ހަމަލާއެއްގައި ސުންނާފަތިވެފައިވާ އިމާރާތެއްގެ ކައިރިއަށް މީހުން އެއްވެފައި - 2026 ޖޫން 29 | ރޮއިޓާސް
ޕާކިސްތާނުން އަފްޣާނިސްތާނުގެ އިރުމަތީ ސަރަހައްދުތަކަށް ދިން ވައިގެ ހަމަލާތަކެއްގައި އެތައް ބަޔަކު މަރުވެއްޖެ އެވެ. މި ހަމަލާތަކަކީ ހަނގުރާމަވެރިންނަށް އަމާޒުކޮށް ދިން ހަމަލާތަކެއް ކަމަށް އިސްލާމްއާބާދުން ހޯމަ ދުވަހު ބުނި ނަމަވެސް، އަފްޣާނިސްތާނުގެ ސަރުކާރުން ބުނެފައިވަނީ މި ހަމަލާތަކުގައި އާންމުން މަރުވެފައިވާ ކަމަށެވެ.
މި ހަމަލާތަކަކީ 2021 ވަނަ އަހަރު ކާބުލްގައި ތާލިބާނުންގެ ވެރިކަން ގާއިމުވި ފަހުން، އަވަށްޓެރި ދެ ގައުމުގެ ދެމެދުގައި އުފެދިފައިވާ ނުތަނަވަސްކަމުގެ ތެރެއިން ހިނގި އެންމެ ފަހުގެ ކުރިމަތިލުންތަކެވެ. އަދި މިއީ މިދިޔަ ފެބްރުއަރީ މަހު ދެ ގައުމުގެ ދެމެދުގައި ހިނގި ހަފްތާތަކެއްގެ ދިގު ހަނގުރާމައަށް ފަހު ހިނގި ހަމަލާތަކެކެވެ.
ޕާކިސްތާނުގެ އިންފޮމޭޝަން މިނިސްޓަރު ވިދާޅުވި ގޮތުގައި، މި އޮޕަރޭޝަންތަކުގައި މަދުވެގެން 25 ހަނގުރާމަވެރިން މަރުވެފައިވެ އެވެ. އަދި މި ހަމަލާތަކަކީ މިދިޔަ ހަފްތާ ބަންދުގައި ކަރާޗީއަށް ދިން ނުރައްކާތެރި ހަމަލާގެ ޒިންމާ އުފުލަންޖެހޭ ގްރޫޕަކަށް އަމާޒުކޮށް ދިން ހަމަލާތަކެއް ކަމަށް ޕާކިސްތާނުން ބުނި ނަމަވެސް، އަފްޣާނިސްތާނުގެ ސަރުކާރުން ވަނީ އެ ގައުމުގެ ބިމުގައި ހަނގުރާމަވެރިންނަށް ހިމާޔަތް ދޭ ކަމަށް ބުނާ ވާހަކަތައް ތަކުރާރުކޮށް ދޮގުކޮށްފަ އެވެ.
ތާލިބާން ސަރުކާރުން ހާމަކުރި ގޮތުގައި، އިރުމަތީ ތިން ޕްރޮވިންސަކަށް ދިން މި ވައިގެ ހަމަލާތަކުގައި އާންމުންގެ 36 މީހަކު މަރުވެ، 163 މީހަކު ވަނީ ޒަޚަމްވެފަ އެވެ.
ސަރުކާރުގެ ތަރުޖަމާނުގެ ނައިބު ހަމްދުﷲ ފިތުރަތު ވިދާޅުވީ، ޕަކްތިއާ ޕްރޮވިންސްގައި މީހުން ސަލާމަތްކުރުމުގެ މަސައްކަތަށް އެ ސަރަހައްދުގެ ރައްޔިތުން އެއްވި ވަގުތު، ދެވަނަ ފަހަރަށް އެ ސަރަހައްދަށް ބޮން އަޅާފައިވާ ކަމަށެވެ.
ޕާކިސްތާނުގެ އިންފޮމޭޝަން މިނިސްޓަރު ވިދާޅުވީ، މި ހަމަލާތަކުގެ ތެރޭގައި ބޯޑަރު ސަރަހައްދުތަކުގައި އެއްގަމު މަގުން ހިންގި އޮޕަރޭޝަންތައް ވެސް ހިމެނޭ ކަމަށެވެ. އަދި މި ހަމަލާތައް އަމާޒުކުރީ ތަހްރީކޭ ތާލިބާން ޕާކިސްތާން (ޓީޓީޕީ) އިން ވަކިވެފައިވާ ޖަމާއަތުލް އަހްރާރު ގްރޫޕަށް ކަމަށް އޭނާ ވިދާޅުވި އެވެ.
އިންފޮމޭޝަން މިނިސްޓަރު އަތާއުﷲ ތަރާރު ނެރުއްވި ބަޔާނެއްގައި ވިދާޅުވީ، ޕަކްތިކާ އަދި ކުނާރުގައި ހުރި ތިން އަމާޒަކަށް ދިން ވަރުގަދަ ހަމަލާތަކުގައި އެ ތަންތަން ސުންނާފަތިކޮށްލާފައިވާ ކަމަށެވެ. އަދި އެއްގަމު މަގުން ހިންގި އޮޕަރޭޝަންތަކުގައި ހަތަރު ހަނގުރާމަވެރިން މަރުވި ކަމަށް ވެސް އޭނާ ވިދާޅުވި އެވެ.
ނުތަނަވަސްކަން ބޮޑުވުން
މިދިޔަ މާޗު މަހު ދެ ގައުމުގެ ދެމެދުގައި ހަމަލާ ބަދަލުކުރުން ހުއްޓާލުމަށް އެއްބަސްވި ނަމަވެސް، އޭގެ ފަހުން ވެސް ދޭތެރެ ދޭތެރެއިން ހަމަލާތައް ދަނީ ބަދަލުކުރަމުންނެވެ. އަފްޣާނިސްތާނުގެ އޮފިޝަލުން ވިދާޅުވާ ގޮތުގައި، މިދިޔަ ޖޫން މަހު ޕާކިސްތާނުން ދިން ހަމަލާތަކުގައި 13 މީހަކު ވަނީ މަރުވެފަ އެވެ.
މެދުއިރުމަތީގައި ހިނގަމުންދާ ހަނގުރާމަ ހުއްޓުވުމަށް އެމެރިކާއާއި އީރާނާ ދެމެދު ޕާކިސްތާނުން މެދުވެރިއެއްގެ ދައުރު އަދާކުރަމުންދާއިރު، ޕާކިސްތާނުން ބުނަނީ އެ ގައުމުގެ އެތެރޭގައި ހިންގާ ހަނގުރާމަވެރި އަމަލުތަކާ ދެކޮޅަށް މަސައްކަތް ކުރުމަށްޓަކައި އަފްޣާނިސްތާނަށް ހަމަލާދޭން ޖެހޭ ކަމަށެވެ.
މިދިޔަ ހޮނިހިރު ދުވަހު ކަރާޗީގައި ހުންނަ ރޭންޖާސް ޕެރަމިލިޓަރީ ކޭމްޕެއްގެ ތެރޭގައި ގޮވާތަކެތި ގޮއްވާލައި، ބަޑީގެ ހަމަލާތަކެއް ވަނީ ދީފަ އެވެ. މިއީ ޕާކިސްތާނުގެ އެންމެ އާބާދީ ބޮޑު ސިޓީގައި ފަހުގެ ތާރީޚެއްގައި ހިނގި އެންމެ ނުރައްކާތެރި އެއް ހަމަލާ އެވެ.
ކަމާބެހޭ ފަރާތްތަކުން ބުނި ގޮތުގައި، މި ހަމަލާގައި ޕެރަމިލިޓަރީގެ ތިން މީހަކު މަރުވެފައިވާއިރު، މި ހަމަލާގައި ބައިވެރިވި ކަމަށް ތުހުމަތުކުރެވޭ އަފްޣާނިސްތާނުގެ ރައްޔިތަކު ވަނީ ހައްޔަރުކޮށްފަ އެވެ.
ޕާކިސްތާނުން ބުނާ ގޮތުގައި އެ ގައުމުގެ ސިފައިން ހަމަލާދެނީ ވަރަށް ބޮޑަށް ބަލައި، ހަމައެކަނި ހަނގުރާމަވެރިން ފިލައިގެން ތިބޭ ތަންތަނަށާއި ހަތިޔާރު ގުދަންތަކަށެވެ. ޚާއްޞަކޮށް ޕާކިސްތާނާ ދެކޮޅަށް ގިނަ އަހަރުތަކެއް ވަންދެން ހަމަލާދެމުންދާ ޓީޓީޕީގެ މަރުކަޒުތަކަށް އަމާޒުކުރާ ކަމަށް އެ ގައުމުން ބުނެ އެވެ.
ނަމަވެސް، އަފްޣާނިސްތާނުގެ ސަރުކާރުން ވަނީ އެ ގައުމުގެ ބިން ހަނގުރާމަވެރިން ބޭނުންކުރާ ކަމަށް ބުނާ ވާހަކަ ތަކުރާރުކޮށް ދޮގުކޮށްފަ އެވެ. އަދި ޕާކިސްތާނުގެ އޮޕަރޭޝަންތަކުގެ ސަބަބުން އާންމުންގެ ގިނަ ބަޔަކު މަރުވަމުންދާ ކަމަށާއި، އޭގެ ތެރޭގައި މިދިޔަ މާޗު މަހު މަސްތުވާތަކެއްޗަށް ފަރުވާދޭ މަރުކަޒަކަށް ދިން ހަމަލާގައި އެތައް ސަތޭކަ ބަޔަކު މަރުވި ކަމަށް އދ. އިން ބުނެފައިވާ ކަން އަފްޣާނިސްތާނުން ފާހަގަކުރެ އެވެ.
އދ. އިން ހާމަކޮށްފައިވާ ގޮތުގައި، ފެބްރުއަރީ މަހުގެ ފަހުކޮޅު ޕާކިސްތާނާއި އަފްޣާނިސްތާނާ ދެމެދު ހިނގި ހަނގުރާމައިގައި އެތައް ސަތޭކަ ބަޔަކު މަރުވެ، އެތައް ހާސް ބަޔަކު ވަނީ ގެދޮރު ދޫކޮށް ގޮސްފަ އެވެ.
އެ ހަނގުރާމައިގެ ތެރޭގައި ބޯޑަރު ސަރަހައްދުގައި ވަރުގަދަ ކުރިމަތިލުންތަކެއް ހިނގާފައިވާއިރު، ޕާކިސްތާނުން ވަނީ އަފްޣާނިސްތާނުގެ ބޮޑެތި ސިޓީތަކަށް، އޭގެ ތެރޭގައި ވެރިރަށް ކާބުލްއާއި ތާލިބާނުންގެ އެންމެ މަތީ ލީޑަރު ހުންނަވާ ދެކުނުގެ ކަންދަހާރަށް ވެސް މީގެ ކުރިން ދުވަހަކުވެސް ނުދޭ ފަދަ ވަރުގަދަ ވައިގެ ހަމަލާތަކެއް ދީފަ އެވެ.
ޗައިނާ ހިމެނޭ ގޮތަށް ބައެއް ގައުމުތަކުން މެދުވެރިއެއްގެ ދައުރު އަދާކުރި ނަމަވެސް، ދެ ގައުމުގެ ދެމެދުގައި ދާއިމީ ހައްލެއް ހޯދިފައެއް ނުވެ އެވެ. އަދި މިދިޔަ އޮކްޓޯބަރު މަހު ބޯޑަރު ހުރަސްކޮށް ހަމަލާ ބަދަލުކުރަން ފެށި ފަހުން، ދެ ގައުމުގެ ބޯޑަރު އޮތީ ބޮޑުބައެއް ބަންދުކޮށްފަ އެވެ.
