ޕާކިސްތާނުގައި އުޅަނދަކަށް ހަމަލާދީ 4 ފުލުހުން މަރާލައިފި

ފާކިސްތާނުގެ ހުޅަނގު އުތުރުގައި އަންގާރަ ދުވަހު، ހަނގުރާމަވެރިން ކަމަށް ތުހުމަތު ކުރެވޭ ބަޔަކު ފުލުހުންގެ އުޅަނދަކަށް ހަމަލާދިނުމުގެ ސަބަބުން ހަތަރު ފުލުހުން މަރުވެފައިވާ ކަމަށް ކަމާބެހޭ ފަރާތްތަކުން ބުނެފިއެވެ.

މި ހާދިސާ ހިނގާފައިވަނީ އަފްޣާނިސްތާނުގެ ބޯޑަރު ސަރަހައްދުގައި ހަމަނުޖެހުންތައް ގިނަވެފައިވާ ދަނޑިވަޅެއްގައެވެ.

މި ހަމަލާ ދީފައިވަނީ ޚައިބަރު ޕަޚްތުންޚުވާ ޕްރޮވިންސްގެ ކަރަކް ޑިސްޓްރިކްޓްގައި ތެލާއި ގޭހުގެ މަޢުދަން ނަގާ ސަރަހައްދެއް ކައިރީގައި ފުލުހުން އާދައިގެ މަތިން ސަރަހައްދު ބެލެހެއްޓުމުގެ މަސައްކަތުގައި އުޅެނިކޮށް ކަމަށް އެ ސަރަހައްދުގެ ފުލުހުންގެ ވެރިޔާ ނޫރު ވަލީ ވިދާޅުވިއެވެ. މި ހާދިސާއާ ގުޅިގެން ގިނަ އަދަދެއްގެ ފުލުހުން އެ ސަރަހައްދު ވަށާލައި، ހަމަލާދިން ފަރާތްތައް ހޯދުމަށް ބޮޑު ސަރޗް އޮޕަރޭޝަނެއް ވަނީ ފަށާފައެވެ.

ޕާކިސްތާނުގެ އެތެރޭގެ ކަންތައްތަކާ ބެހޭ ވަޒީރު މުޙުސިން ނަޤުވީ އާއި ޚައިބަރް ޕަޚްތުންޚުވާގެ ޗީފް މިނިސްޓަރ ސުހައިލް އަފްރީދީ ވަކިވަކީން ބަޔާން ނެރުއްވައި މި ހަމަލާ ކުށްވެރިކުރެއްވިއެވެ. އެބޭފުޅުން ވިދާޅުވީ ހަމަލާދިން ފަރާތްތައް ޤާނޫނުގެ ކުރިމައްޗަށް ގެނެވޭނެ ކަމަށާއި، ޝަހީދުވި ފުލުހުންގެ އާއިލާތަކަށް ތައުޒިޔާ ފޮނުއްވާ ކަމަށެވެ.

މި ހަމަލާގެ ޒިންމާ އެއްވެސް ގްރޫޕަކުން މިހާތަނަށް އުފުލާފައެއް ނުވެއެވެ. ނަމަވެސް، މިކަމުގެ ތުހުމަތު އަފްޣާނިސްތާނުގެ ތާލިބާން ސަރުކާރާ ގުޅިފައިވާ ޕާކިސްތާން ތާލިބާން (ޓީޓީޕީ) އަށް ކުރެވޭނެ ކަމަށް ބެލެވެއެވެ. މީގެ ކުރިން ހިންގާފައިވާ އެތައް ހަމަލާއެއްގެ ފަހަތުގައި ޓީޓީޕީ އޮތް ކަމަށް ސަރުކާރުން ތުހުމަތުކުރެއެވެ.

ޕާކިސްތާނުގައި ހަނގުރާމަވެރި ހަމަލާތައް އިތުރުވަމުންދާތީ އަފްޣާނިސްތާނާގެ އެކު ޕާކިސްތާނުން އޮންނަ ގުޅުމަށް ވެސް ވަނީ ބުރޫއަރާފައެވެ. އިސްލާމާބާދުން ތުހުމަތުކުރަނީ 2021 ވަނަ އަހަރު ތާލިބާނުން އަފްޣާނިސްތާނުގެ ވެރިކަން ހޯދި ފަހުން ޓީޓީޕީން މިނިވަންކަމާއެކު އަފްޣާނިސްތާނުގެ ތެރޭގައި ހަރަކާތްތެރިވަމުންދާ ކަމަށެވެ. ނަމަވެސް މި ތުހުމަތު ކާބުލް އިން ވަނީ ދޮގުކޮށްފައެވެ.